ଖବର ପ୍ରଭାବ…ଜିଲ୍ଲା ପ୍ରଶାସନର ହସ୍ତକ୍ଷେପ ପରେ ଚେତିଲେ ହିନ୍ଦୋଳ ବିଡ଼ିଓ

ମୁଣ୍ଡ ନୁଆଇଁ ଶେଷରେ ମହିଳା କନିଷ୍ଠ ଯନ୍ତ୍ରୀଙ୍କୁ କଲେ ବଦଳି
ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ଓ ଜିଲ୍ଲାପାଳଙ୍କୁ ଧନ୍ୟବାଦ୍ ଜ୍ଞାପନ କଲେ ବୁଦ୍ଧିଜୀବୀ
ଢେଙ୍କାନାଳ, (ଫ୍ରିଟୁସ୍ପିକ୍/ ସୁଜିତ୍ କୁମାର ବେହେରା) : ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକରେ ସହକାରୀ ଯନ୍ତ୍ରୀ ଓ କନିଷ୍ଠ ଯନ୍ତ୍ରୀଙ୍କ ବଦଳି ନାଟକରେ ଯବନିକା ପଡ଼ିଛି । ଢେଙ୍କାନାଳ ଜିଲ୍ଲାପାଳଙ୍କ ବଦଳି ଆଦେଶ ପତ୍ର ସଂଖ୍ୟ ୪୦୩୬ ତା ୦୩-୧୦-୨୦୨୪ ଅନୁଯାୟୀ ଏହି ବ୍ଲକର ୫ ଜଣ କନିଷ୍ଠ ଯନ୍ତ୍ରୀ ଓ ଜଣେ ସହକାରୀ ଯନ୍ତ୍ରୀଙ୍କୁ ଅନ୍ୟତ୍ର ବଦଳି ପାଇଁ ହୋଇଥିବା ଆଦେଶକୁ ଅବମାନନା କରି ସ୍ଥାନୀୟ ବିଡ଼ିଓ ଜଣେ ମହିଳା ଯନ୍ତ୍ରୀଙ୍କୁ ଏଠାରୁ ବଦଳି ନକରି ଚର୍ଚ୍ଚାରେ ରହି ଆସିଥିଲେ । ବିଭିନ୍ନ ସ୍ଥାନରେ କେତେକ ପଞ୍ଚାୟତ ପ୍ରତିନିଧି ପଞ୍ଚାୟତବାସୀ ଓ ବୁଦ୍ଧିଜୀବୀ ଏନେଇ ଚର୍ଚ୍ଚା କରୁଥିବା ଶୁଣା ଯାଇଥିଲା । ଏ ସମ୍ପର୍କରେ ସବିଶେଷ ତଥ୍ୟ ହାସଲ ପାଇଁ ସୂଚନା ଅଧିକାର ଆଇନ ବଳରେ ବିଡ଼ିଓ ମହାଶୟଙ୍କୁ ଦୁଇ ଦୁଇ ଥର ଦରଖାସ୍ତ କରାଯାଇଥିଲା । ପ୍ରଥମ ସୂଚନା ବହୁ ବିଳମ୍ବରେ ମିଳିଥିବାବେଳେ ଏଥିରେ ବିଭ୍ରାନ୍ତିକର ତଥ୍ୟ ଥିବାରୁ ପୁନଃ ଦ୍ୱିତୀୟବାର ଦରଖାସ୍ତ କରାଯାଇଥିଲା । ବଦଳି ପ୍ରକ୍ରିୟା ଅନିୟମିତତା ରହି ଥିବାରୁ ଏ ସମ୍ପର୍କରେ ଗଣମାଧ୍ୟମରେ ବହୁବାର ଖବର ପ୍ରସାରଣ କରାଯାଇଥିଲା । ଶେଷରେ ଜିଲ୍ଲାପାଳ ଏଥିରେ ହସ୍ତକ୍ଷେପ କରି ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କୁ ଏଭଳି ବ୍ୟତିକ୍ରମ ସମ୍ପର୍କରେ ଦୃଷ୍ଟି ଦେଇ ତ୍ୱରିତ ପଦକ୍ଷେପ ନେବାକୁ ନିଦେ୍ର୍ଦଶ ଦେଇଥିଲେ । ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କ ନିର୍ଦ୍ଦେଶକ୍ରମେ ହିନ୍ଦୋଳ ବିଡ଼ିଓ ପତ୍ର ସଂଖ୍ୟା ୧୬୯୧ ତା ୦୫-୦୫-୨୦୨୫ ରିଖରେ ବ୍ଲକର ସଂପୃକ୍ତ ମହିଳା କନିଷ୍ଠ ଯନ୍ତ୍ରୀ ସିଲାରାଣୀ ସାହୁଙ୍କୁ ଭୁବନ ବ୍ଲକ କାର୍ଯ୍ୟାଳୟକୁ ବଦଳି କରିଥିବା ଜଣା ପଡ଼ିଛି । ଏ ନେଇ ପତ୍ର ସଂଖ୍ୟା ୧୬୯୨ ରେ ଢେଙ୍କାନାଳ ସଦର ବିଡ଼ିଓଙ୍କୁ ଅବଗତ କରାଇବା ସହ ତାଙ୍କ ବଦଳରେ ସଦର ବ୍ଲକର ଅଳକା ବତି ସାମଲ ନାମ୍ନୀ କନିଷ୍ଠ ଯନ୍ତ୍ରୀଙ୍କୁ ଏଠାରେ ନିଯୁକ୍ତ ପାଇଁ ଆଦେଶ ହୋଇଛି । ଏ ସମ୍ପର୍କରେ ହିନ୍ଦୋଳ ବିଡ଼ିଓଙ୍କ ପକ୍ଷରୁ ସଂପୃକ୍ତ କନିଷ୍ଠ ଯନ୍ତ୍ରୀ ସରପଞ୍ଚ, ବ୍ଲକର ସମସ୍ତ ବିଭାଗୀୟ ଅଧିକାରୀ, ସିଡିଓ କମ୍ ଇଓ ଢେଙ୍କାନାଳ ଜିଲ୍ଲା ପରିଷଦଙ୍କୁ ଜଣାଇ ଦେଇଥିବା ସୂଚନା ମିଳିଛି ।