ସିନ୍ଦୁର ପୂରଣ କଲା ସିନ୍ଦୁରର ପ୍ରତିଶୋଧ…

ଭାରତରେ ଜୟକାର, ପାକିସ୍ତାନରେ ହାହାକାର
ଆତଙ୍କବାଦ ବିରୁଦ୍ଧରେ ଭାରତର ଏୟାରଷ୍ଟ୍ରାଇକ୍
ନିପାତ ହେଲେଣି ୩୦୦ ଆତଙ୍କୀ
ଆତଙ୍କବାଦ ବିରୁଦ୍ଧରେ ଭାରତର କଡା ଆଭିମୁଖ୍ୟ । ରାତିଅଧିଆ ଏୟାରଷ୍ଟ୍ରାଇକରେ ଥରହର ପାକିସ୍ତାନ । ପାକିସ୍ତାନ ଆତଙ୍କୀ ହମଲାର ମୁହଁତୋଡ ଜବାବ ଦେଇଛି ଭାରତୀୟ ସେନା । ପାକିସ୍ତାନ ଆତଙ୍କବାଦ ବିରୋଧରେ ମଙ୍ଗଳବାର ରାତିରେ ଆରମ୍ଭ ହୋଇଛି ‘ଅପରେସନ୍ ସିନ୍ଦୁର’ । ଏବେ ଯାଏଁ ୯ ଟି ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରିଛି ଭାରତୀୟ ବାୟୁସେନା । ଏପ୍ରିଲ୍ ୨୨ ରେ କାଶ୍ମୀର ପହଲଗାମରେ ହୋଇଥିବା ଆତଙ୍କୀ ଆକ୍ରମଣରେ ୨୭ ହିନ୍ଦୁଙ୍କ ଜୀବନ ଯାଇଛି । ପହଲଗାମ୍ ଯାଇଥିବା ଭାରତୀୟଙ୍କୁ ଧର୍ମ ଆଧାରରେ ଟିଆରଏଫର ଆତଙ୍କୀ ଗୁଳିବିଦ୍ଧ କରିବା ସହ ମୋଦୀଙ୍କୁ କହିଦେବାକୁ ଚେତାବନୀ ଦେଇଥିଲେ । ଏହାପରେ ଭାରତ ସରକାର ଆରମ୍ଭ କରିଥିଲେ ଆତଙ୍କବାଦ ବିରୁଦ୍ଧରେ ଯାତ୍ରା । ଭାରତୀୟ ମା’ର ସିନ୍ଦୂରର ପ୍ରତିଶୋଧ ନେବାକୁ ଏହି ଏୟାରଷ୍ଟ୍ରାଇକ ପାଇଁ ‘ଅପରେସନ୍ ସିନ୍ଦୁର’ ନାଁ ରଖିଲେ ଖୋଦ୍ ପ୍ରଧାନମନ୍ତ୍ରୀ ମୋଦୀ । ଅପରେସନ୍ ସିନ୍ଦୁର ପରେ ଏବେ ଭାରତରେ ଖୁସିର ମହୋତ୍ସବ ।
ଏହି ଆତଙ୍କବାଦୀ ସଙ୍ଗଠନ ପାକିସ୍ତାନର ପ୍ରଶ୍ରୟ ପାଇଥିବା ଲସ୍କର- ଏ -ତୋଇବାର ଏକ ମୁଖ୍ୟ ଅଙ୍ଗ ଯେଉଁଥିରେ ଉଭୟ ପାକିସ୍ତାନୀ ସେନାର ସମ୍ପୃକ୍ତି ଥିବା କୁହାଯାଉଥିଲା । ଏହାପରେ ସାରା ଦେଶରେ ଆରମ୍ଭ ହୋଇଯାଇଥିଲା ପାକ୍ ବିରୋଧୀ ସ୍ଲୋଗାନ୍ । ପାକିସ୍ତାନ ଓ ପିଓକେର ପାଖାପାଖି ୧୦୦ କିଲୋମିଟର ଭିତରକୁ ପଶି ୯ଟି ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରିଛି ଭାରତୀୟ ବାୟୁସେନା । ଯେଉଁଥିରେ ୩୦୦ ଜଣ ଆତଙ୍କବାଦୀ ନିପାତ ହୋଇଛନ୍ତି । ଏହି ହମଲାରେ ସାମିଲ ହୋଇଥିଲେ ୮ ସୁଖୋଇ, ୪ ରାଫେଲ୍ । ଏଥିସହ ବ୍ରହ୍ମୋସ ମିସାଇଲ୍ ମଧ୍ୟ ମାଡ଼ ହୋଇଛି ।
ପୁରା ଦେଶରେ ଜୟ ହିନ୍ଦ ନାରା ଲାଗି ରହିଛି । ଆତଙ୍କୀ ଆକ୍ରମଣରେ ପ୍ରାଣ ହରାଇଥିବା ପୀଡିତ ପରିବାରରେ ପ୍ରତିଶୋଧର ବହ୍ନି ଏବେ ଟିକେ ଶୀତଳ ହୋଇଛି । ସେପଟେ ଆକ୍ରମଣକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ ପୂର୍ଣ୍ଣ ସମର୍ଥନ ଦେବା ସହ ଭାରତୀୟ ସେନା ପାଇଁ ‘ଜୟ ହିନ୍ଦ୍’ ସ୍ଲୋଗାନ ଦେଇଛନ୍ତି । ଭାରତୀୟ ସଶସ୍ତ୍ର ବଳକୁ ନେଇ ସେ ଗର୍ବିତ ବୋଲି କହିବା ସହ ତାଙ୍କ ସହ ଅନ୍ୟ କଂଗ୍ରେସ ନେତା ମଧ୍ୟ ଭାରତର ଆକ୍ରମଣକୁ ପୂର୍ଣ୍ଣ ସମର୍ଥନ ଜଣାଇଛନ୍ତି ।
ପାକିସ୍ତାନର ମୁଜାଫରାବାଦ, କୋଟଲି ଓ ବହାବଲପୁର ଭଳି ସ୍ଥାନକୁ ଟାର୍ଗେଟ ହୋଇଛି । ପାକିସ୍ତାନୀ ଗଣମାଧ୍ୟମ ମଧ୍ୟ ଭାରତର ଆଟାକ୍ ନେଇ ସ୍ପଷ୍ଟ କରିଛି । ଜବାବ ହମଲା ବାବଦରେ ଆମେରିକା, ବ୍ରିଟେନ୍, ରୁଷ୍ ଓ ସାଉଦି ଆରବକୁ ଅବଗତ କରାଇଛି ଭାରତ । ଆମେରିକା ଜାତୀୟ ସୁରକ୍ଷା ପରାମର୍ଶଦାତାଙ୍କୁ ଅବଗତ କରାଇଛନ୍ତି ଏନଏସଏ ଅଜିତ ଡୋଭାଲ୍ । ସେପଟେ ଭାରତର ଏୟାରଷ୍ଟ୍ରାଇକ ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, “ମୁଁ ଜାଣିଥିଲି ଭାରତ ପ୍ରତିଶୋଧ ନେବ” ।