କଳାକାରଙ୍କୁ ମିଳୁନି ସେମାନଙ୍କର ପ୍ରାପ୍ୟ । ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ଦାବି…

ମୁଁ ବି କଳାକାର, ମୋର ଦୁଃଖ ସଂସ୍କୃତି ବିଭାଗ କେବେ ବୁଝିବ ?
ବାଲେଶ୍ୱର, (ଏଫ୍ଟୁଏସ୍) : କଳାକାରମାନଙ୍କ ସୁବିଧା ପାଇଁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ତିଆରି କରିଥିଲା ଅନଲାଇନରେ ସାଂସ୍କୃତିକ କାର୍ଯ୍ୟକ୍ରମ ପରିଚାଳନା ବ୍ୟବସ୍ଥା CTMS । ଏହାଦ୍ୱାରା ସମସ୍ତ ବର୍ଗର କଳାକାର ଘରେ ବସି କାମ ପାଇବାର ସୁଯୋଗ ପାଇବା ସହ କାର୍ଯ୍ୟକ୍ରମ ପରିବେଷଣର ୧୫ ଦିନ ଭିତରେ ସେମାନଙ୍କର ପ୍ରାପ୍ୟ ପାଇବାର ବ୍ୟବସ୍ଥା ରହିଥିଲା । ଏହି ବ୍ୟବସ୍ଥା ଏତେ ଜଟିଳ ଥିଲା ଯେ ଏହାକୁ ସାଧାରଣ କଳାକାରଟିଏ ବୁଝିବାକୁ ବର୍ଷେ ଲାଗିଗଲା । କେହି କେହି କଳାକାର ମେଞ୍ଚାଏ ସାଂସ୍କୃତିକ କାର୍ଯ୍ୟକ୍ରମ କଲେ ତ କେହି ବିଲକୁଲ କାର୍ଯ୍ୟକ୍ରମ ପାଇଲେ ନାହିଁ । କିନ୍ତୁ ଦୁଃଖ ଓ ପରିତାପର ବିଷୟ ଯେଉଁ କଳାକାରମାନେ ବିଭିନ୍ନ ସ୍ଥାନରେ ନିଜର କଳା ପରିବେଷଣ କରିଥିଲେ ଏବଂ ପରିବେଷଣ ଜନିତ ପ୍ରମାଣ ପତ୍ର ଦେଇଥିଲେ ସେମାନେ ମାସ ମାସ ଧରି ମୋନଙ୍କର ପ୍ରାପ୍ୟ ପାଇବାରୁ ବଂଚିତ ରହିଛନ୍ତି । ଏ ନେଇ ସେମାନେ ବାରମ୍ବାର ସଂସ୍କୃତି ବିଭାଗକୁ ଦୌଡ଼ି ଦୌଡ଼ି ନୟାନ୍ତ ହେଲେଣି ସିନା ସେମାନଙ୍କ ଗୁହାରୀ ଶୁଣିବାକୁ କେହି ନାହାନ୍ତି ।

ଅପରପକ୍ଷେ ପ୍ରାପ୍ୟ ବାବଦରେ ବିଭାଗୀୟ କର୍ତ୍ତୁପକ୍ଷଙ୍କୁ ପଚାରିବାରୁ କାହାରି ପାଖରେ କିଛି ସନ୍ତୋଷ ଜନକ ଉତ୍ତର ନାହିଁ । ଆଗକୁ ଆସୁଛି ପାର୍ବଣର ଋତୁ । ପାର୍ବଣ ଋତୁରେ ଓଡ଼ିଶାର ସାଂସ୍କୃତିକ ଭାଇଚାରାକୁ ଚଳ ଚଞ୍ଚଳ କରି ରଖିବାକୁ ଦଳ ଗୁଡ଼ିକ ପ୍ରସ୍ତୁତ ହେଉଥିବା ବେଳେ ସରକାର ଏ ସବୁ ଦିଗ ପ୍ରତି ଆଖି ବୁଜି ଦେଇଛନ୍ତି । କଳାକାରଟିଏ ତାହାର ପାଉଣା ଗଣ୍ଡାକ ପାଇଁ ବାରମ୍ବାର ବିଭାଗକୁ ଦୌଡ଼ିବାକୁ ପଡ଼ୁଛି । ଗୋଟିଏ ପରିବେଷଣ ପିଛା ପାରିଶ୍ରମିକ ମିଳୁଛି ୧୩ ହଜାର ଟଙ୍କା । ତେବେ ଏହି ପାରିଶ୍ରମିକ ଜଣଙ୍କର ନୁହେଁ । ଗୋଟିଏ ପରିବେଷଣ ପାଇଁ ଦଳରେ ୧୨ ରୁ ୧୫ ଜଣ କଳକାର ରୁହନ୍ତି । ଏହି ଆଧାରରେ ହିସାବ କଲେ ଜଣଙ୍କ ପିଛା ମୋଟାମୋଟି ଭାବେ ଏକ ହଜାରରୁ ୮୦୦ ଟଙ୍କା ମିଳେ । ସମସ୍ତ ବର୍ଗର ଆର୍ଥିକ ସ୍ଥିତି ବଢ଼ୁଥିବାବେଳେ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ କଳାକାରମାନଙ୍କୁ ସେମାନଙ୍କର ପ୍ରାପ୍ୟ ଦେବାରେ ଟାଳଟୁଳ ନିତୀ ଅବଲମ୍ବନ କରୁଛି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି କଳାକାର ସଂଘ । ବିଭାଗୀୟ ଅଧିକାରୀଙ୍କ ନିରବତା କଳାକାରମାନଙ୍କ ମନରେ ଗଭୀର କ୍ଷତ ସୃଷ୍ଟି କରିଛି । ଏ ନେଇ ସଂସ୍କୃତି ବିଭାଗର ଦୃଷ୍ଟି ଆକର୍ଷଣ ପାଇଁ ଶାନ୍ତିପୂର୍ଣ୍ଣ ଆନ୍ଦୋଳନ କରି ନିଜର ଦାବି ଉପସ୍ଥାପନ କରିଛନ୍ତି ବହୁ କଳାକାର । ଆଗାମୀ ଦିନରେ ବିଭାଗୟ କର୍ତ୍ତୁପକ୍ଷ ଏ ଦିଗରେ ଧ୍ୟାନ ଦେଇ ପଦକ୍ଷେପ ନେବାକୁ ଦାବି ହୋଇଛି । ଯଦି କଳାକାରଙ୍କ ଦାବି ପୂରଣ ନ ହୁଏ ତେବେ କଳାକାରମାନେ ବାଧ୍ୟ ହୋଇ ରାଜରାସ୍ତାରେ ଓଡ଼ିଆ ଅସ୍ମିତାର ପ୍ରଚାର କରିବେ ବୋଲି ଚେତାବୀ ଦେଇଛି ଅଲ୍ ଓଡ଼ିଶା ପରଫରମିଙ୍ଗ ଆର୍ଟିଷ୍ଟ ଆସୋସିଏସନ୍ ।