ପିଏମଶ୍ରୀ କେନ୍ଦ୍ରୀୟ ବିଦ୍ୟାଳୟରେ ଜାତୀୟ ମହାକାଶ ଦିବସ ପାଳିତ…
ଗଜପତି, (ଏଫ୍ଟୁଏସ୍/ ବିବେକାନନ୍ଦ ବେହେରା) : ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ଉପଖଣ୍ଡ ବେତାଗୁଡ଼ା ସ୍ଥିତ ପିଏମଶ୍ରୀ କେନ୍ଦ୍ରୀୟ ବିଦ୍ୟାଳୟରେ “ଜାତୀୟ ମହାକାଶ ଦିବସ” ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଗତବର୍ଷ ଅଗଷ୍ଟ ୨୩ ରେ ଚନ୍ଦ୍ରର ଦକ୍ଷିଣ ମେରୁରେ ଭାରତର ଚନ୍ଦ୍ରଯାନ-୩ ପହଞ୍ଚିଥିଲା । ଏହା ଭାରତୀୟ ମହାକାଶ ଇତିହାସର ଏକ ସ୍ୱର୍ଣ୍ଣିମ ଦିବସ ଥିଲା । ତେଣୁ ଏହି ଦିନରେ ପ୍ରତିବର୍ଷ ରାଷ୍ଟ୍ରୀୟ ମହାକାଶ ଦିବସ ଭାବେ ପାଳନ କରାଯିବାକୁ କେନ୍ଦ୍ର ସରକାରଙ୍କ ପକ୍ଷରୁ ଘୋଷଣା ହୋଇଥିଲା । ମୁଖ୍ୟତଃ ଏହା ଭାରତୀୟ ନାଗରିକ ଓ ବୈଜ୍ଞାନିକଙ୍କ ମଧ୍ୟରେ ମହାକାଶ ଅଭିଯାନ ଦୃଷ୍ଟିଭଙ୍ଗିକୁ ଅଧିକ ବ୍ୟାପକ କରିବା ଆଶା ରହିଛି । ଦେଶବ୍ୟାପୀ ପ୍ରଥମ କରି ଏହି ରାଷ୍ଟ୍ରୀୟ ମହାକାଶ ଦିବସ ପାଳନ କରା ଯାଉଥିବା ବେଳେ ଗଜପତି ଜିଲ୍ଲା ପାରଳାଖେମୁଣ୍ଡି ଠାରେ ଥିବା ପିଏମଶ୍ରୀ କେନ୍ଦ୍ରୀୟ ବିଦ୍ୟାଳୟରେ ମଧ୍ୟ ଏହି କାର୍ଯ୍ୟକ୍ରମ ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମ କରାଯାଇଛି ।
ଏହି ଅବସରରେ ବିଦ୍ୟାଳୟରେ ଆୟୋଜିତ ଏସେମ୍ଳି କାର୍ଯ୍ୟକ୍ରମରେ ଉପସ୍ଥିତ ଛାତ୍ରଛାତ୍ରୀ ମାନଙ୍କୁ ବିଦ୍ୟାଳୟର ଅଧ୍ୟକ୍ଷ ଶ୍ରୀ ଦୁର୍ଗା ପ୍ରସାଦ ପଣ୍ଡା ଜାତୀୟ ମହାକାଶ ଦିବସ ପାଳନର ଆଭିମୁଖ୍ୟ ସହ ଏହାର ଉଦେ୍ଦଶ୍ୟ ଓ ଦୃଷ୍ଟିଭଙ୍ଗୀ ସମ୍ପର୍କରେ କହି ଦିବସର ବିଷୟ ବାର୍ତ୍ତା:- “ଚନ୍ଦ୍ରକୁ ଛୁଇଁ ଜୀବନକୁ ଛୁଇଁବା – ଭାରତର ମହାକାଶ ଗାଥା’ ଉପରେ ସୂଚନା ପ୍ରଦାନ କରିଥିଲେ । ଏଥିରେ ମନୋନୀତ ଛାତ୍ରଛାତ୍ରୀମାନେ ଭାଗନେଇ କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ ନିଜର ପ୍ରତିକ୍ରିୟା ରଖିଥିଲେ ।
ଏଥିରେ ଛାତ୍ରଛାତ୍ରୀଙ୍କ ମଧ୍ୟରେ ମହାକାଶ ଅଭିଯାନ ସମ୍ପର୍କିତ ଏକ ଚିତ୍ରକଳା ପ୍ରତିଯୋଗୀତା ଅନୁଷ୍ଠିତ ହେବା ସହ ଭିଡିଓ ଚିତ୍ର ମାଧ୍ୟମରେ ମହାକାଶ ଅଭିଯାନ ସମ୍ପର୍କରେ ବିଭିନ୍ନ ଉପାଦେୟ ଚିତ୍ର ପ୍ରଦର୍ଶନ କରା ଯାଇଥିଲା । ପରେ ଏ ସମ୍ପର୍କିତ ଏକ ମହାକାଶ ଅଭିଯାନ ତଥା ଚନ୍ଦ୍ରଯାନ ୩ ଉପରେ ବିଭିନ୍ନ ଚିତ୍ର ଦେଖାଇ ଓ ବୁଝାଇ ପିଲାଙ୍କ ମନରେ ଏ ସମ୍ପର୍କିତ ଉପାଦେୟ ଧାରଣା ଦିଆ ଯାଇଥିଲା ।
କାର୍ଯ୍ୟକ୍ରମ ସମ୍ପର୍କରେ ବିଦ୍ୟାଳୟର ଛାତ୍ରୀ ରାଜଶ୍ରୀ ପାତ୍ର ଏବଂ ଛାତ୍ର ଶୁଭ ପ୍ରକାଶ ସୋରେନ ସେମାନଙ୍କ ପ୍ରତିକ୍ରିୟା ରଖିବା ସହ ବିଦ୍ୟାଳୟର ପ୍ରିନିସିପାଲ ଶ୍ରୀ ଦୁର୍ଗା ପ୍ରସାଦ ପଣ୍ଡା କହିଛନ୍ତି ଯେ , ପିଲାଙ୍କ ମଧ୍ୟରେ ବିଜ୍ଞାନ ଓ ପ୍ରଯୁକ୍ତି କେତେଦୂର ଆଗେଇଛି ଓ କିଭଳି , ତାହା ଅବଗତ କରାଇବା ଏବଂ ମହାକାଶ ବିଜ୍ଞାନକୁ କିଭଳି ସାଧାରଣ ଶିକ୍ଷା ସ୍ତରରେ ସମ୍ପ୍ରସାରଣ କରି ଏ ଦିଗରେ ପ୍ରେରଣା ଯୋଗାଇବା ସହ ଛାତ୍ର ଛାତ୍ରୀ ମାନଙ୍କ ମଧ୍ୟରେ ମହାକାଶ କାର୍ଯ୍ୟକ୍ରମ ପାଇଁ ଆଗ୍ରହ ବଢାଇବା ସହ ଅନୁପ୍ରାଣିତ କରିବ ଏବଂ ସର୍ବୋପରି ଛାତ୍ର ଓ ଶିକ୍ଷକଙ୍କ ମଧ୍ୟରେ ମହାକାଶ କ୍ଷେତ୍ରରେ ଜ୍ଞାନବୃଦ୍ଧି ଦିଗରେ ସହାୟକ ହେବ , ତାହାହିଁ ଏହି କାର୍ଯ୍ୟକ୍ରମ ମୂଳଲକ୍ଷ୍ୟ ବୋଲି କହିଥିଲେ ।
