ବନ୍ଧା ହେଲେ କେନ୍ଦ୍ରାପଡ଼ା ଅତିରିକ୍ତ ଯୋଗାଣ ଅଧିକାରୀ…

ବନ୍ଧା ହେଲେ କେନ୍ଦ୍ରାପଡ଼ା ଅତିରିକ୍ତ ଯୋଗାଣ ଅଧିକାରୀ ପ୍ରଦୀପ କୁମାର ମହାପାତ୍ର । ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଟିମ୍ ପ୍ରଦୀପଙ୍କୁ ଗିରଫ କରିଛି । ଶୁକ୍ରବାର ଅତିରିକ୍ତ ଯୋଗାଣ ଅଧିକାରୀ ଘରେ ଭିଜିଲାନ୍ସ ଚଢ଼ାଉ କରିଥିଲା । ଭୁବନେଶ୍ୱର, କଟକ ଓ କେନ୍ଦ୍ରାପଡ଼ାର ୫ଟି ଠିକଣାରେ ଚଢାଉ କରାଯାଇଥିଲା । ପ୍ରଦୀପଙ୍କ ନାଁରେ ଭୁବନେଶ୍ୱର ଓ କଟକରେ ଦୁଇଟି ବିଲ୍ଡିଂ ଠାବ କରାଯାଇଛି । ଏହାଛଡ଼ା ଟ୍ୱିନସିଟିରେ ଦୁଇଟି ପ୍ଲଟ ମଧ୍ୟ ରହିଛି । ପ୍ରଦୀପଙ୍କ ନାଁରେ ୨ କୋଟି ୮୬ ଲକ୍ଷ ଟଙ୍କାର ବ୍ୟାଙ୍କ ଜମା ଥିବା ଜଣାପଡିଛି । ଚଢ଼ାଉ ବେଳେ ଅନେକ ସୁନା ଅଳଙ୍କାର, ହୀରା ଗହଣା ସମେତ ନଗଦ ୧ ଲକ୍ଷ ୨୧ ହଜାର ୫୦୦ ଟଙ୍କା ଜବତ କରିଥିଲା ଭିଜିଲାନ୍ସ ଟିମ୍ । ପ୍ରଦୀପଙ୍କ ଆଖି ଖୋସି ହେବା ପରି ସମ୍ପତ୍ତି ଦେଖି ଭିଜିଲାନ୍ସ ଅଧିକାରୀ ଆଶ୍ଚର୍ଯ୍ୟ ହୋଇଯାଇଥିଲେ । ପରେ ତାଙ୍କୁ ଅଟକ ରଖାଯାଇ ପଚରାଉଚରା କରାଯାଇଥିଲା । ତେବେ ସମ୍ପତ୍ତି ସଂପର୍କରେ ସନ୍ତୋଷ ଜନକ ଉତ୍ତର ଦେଇ ପାରିନଥିଲେ ଅତିରିକ୍ତ ଯୋଗାଣ ଅଧିକାରୀ । ଏ ନେଇ ତାଙ୍କୁ ଭିଜିଲାନ୍ସ ଗିରଫ କରିଥିବା ସୂଚନା ରହିଛି । ଏହି ଚଢାଉରେ ୪ଜଣ ଡିଏସପି, ଜଣେ ଆସିଷ୍ଟାଣ୍ଟ କମାଣ୍ଡାଣ୍ଟ, ୫ଜଣ ଇନସ୍ପେକ୍ଟର ସାମିଲ ଥିଲେ । ଏତେ ସମ୍ପତ୍ତି କେଉଁଠାରୁ ଆଣିଲେ ତାର ତଦନ୍ତ କରୁଛି ଭିଜିଲାନ୍ସ ଟିମ୍ ।