କୁମାରୀପାରି ଛକରେ ଯୁବକଙ୍କୁ ମରଣାନ୍ତକ ଆକ୍ରମଣ…

ଗଞ୍ଜାମ, (ଏଫ୍ଟୁଏସ୍/ ବାପୁନି କୁମାର ମାଲୁ) : ଗଞ୍ଜାମ ଜିଲ୍ଲା ବେଗୁନିଆପଡା ଥାନା ଅନ୍ତର୍ଗତ କୁମ୍ଭୀର ଗାଁ ପଂଚାୟତର କୁମାରୀପାରି ଗାଁରେ ଜଣେ ଯୁବକଙ୍କୁ ମରଣାତ୍ମକ ଆକ୍ରମଣ । କୁମାରୀପାରି ଗାଁ ଦୋକାନରେ ଚା ପିଉଥିବା ବେଳେ ଆକ୍ରମଣ । ଆକ୍ରମଣରେ ଶିକାର ହୋଇଥିବା ଯୁବକ ଜଣକ ହେଲେ ପ୍ରମୋଦ ତାରିଣୀଙ୍କ ପୁଅ ସୁଶାନ୍ତ କୁମାର ତାରିଣୀ । ଏ ନେଇ ବେଗୁନିଆପଡା ଥାନାରେ ଅଭିଯୋଗ । ତଥ୍ୟ ଅନୁସାରେ, ସୁଶାନ୍ତ ଗାଁ ଦୋକାନରେ ବସି ଚା ପିଉଥିଲେ । ଏହି ସମୟରେ ସେହି ଗ୍ରାମର ଲକ୍ଷ୍ମଣ ଭୂୟାଁଙ୍କ ପୁଅ ସୁଶାନ୍ତ ଭୂୟାଁ ହଠାତ୍ ଏକ ଧାରୁଆ ଅସ୍ତ୍ରରେ ସୁଶାନ୍ତ କୁମାରଙ୍କୁ ଆକ୍ରମଣ କରିଥିଲା । ଫଳରେ ସୁଶାନ୍ତ ତାରିଣୀ ଅଚେତ ଅବସ୍ଥାରେ ପଡିଯାଇଥିଲେ । ଗୁରୁତର ସୁଶାନ୍ତଙ୍କୁ ପ୍ରଥମେ ସୁମଣ୍ଡଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଗୁରୁତର ହେବାରୁ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଛି । ଖବର ପାଇ ବେଗୁନିଆପଡା ପୋଲିସ ଘଟଣା ସ୍ଥଳରେ ପହଂଚି ତଦନ୍ତ କରିଛି । ସୁଶାନ୍ତ ତାରିଣୀଙ୍କ ସମ୍ପର୍କୀୟ ଭାଇ ସରୋଜ କୁମାର ତାରିଣୀ ବେଗୁନିଆପଡା ଥାନାରେ ଏ ନେଇ ଏତଲା ଦେଇଥିବା ଜଣାପଡିଛି । ପୋଲିସ ପକ୍ଷରୁ ଥାନା କେଶ ନମ୍ବର ୩୫୨/ ୨୦୨୪ ରେ ମାମଲା ରୁଜୁ କରି ତଦନ୍ତ ଜାରି ରହିଥିବା ଥାନା ଅଧିକାରୀ ଅଶୋକ କୁମାର ହାଁସଦା ସୂଚନା ଦେଇଛନ୍ତି । ତେବେ ସୁଶାନ୍ତ ତାରିଣୀଙ୍କ ଉପରକୁ ସୁଶାନ୍ତ ଭୂୟାଁ କାହିଁକି ଆକ୍ରମଣ କଲା ତାହା ଖବର ଲେଖାହେବା ପର୍ଯ୍ୟନ୍ତ ଜଣାପଡିନାହିଁ ।