ରାଜ୍ୟରେ ନାହିଁ ମୁଖ୍ୟମନ୍ତ୍ରୀଙ୍କ ବାସଭବନ !

ନୂଆ ମୁଖ୍ୟମନ୍ତ୍ରୀଙ୍କ ନୂଆ ଠିକଣା । ଅବାଧରେ ଭେଟୁଛନ୍ତି ଅଫିସର ଏବଂ ନେତା…

ରାଜ୍ୟରେ ଏବେ ଆରମ୍ଭ ହୋଇଛି ବିଜେପି ସରକାର । ଜୁନ୍ ୧୨ ତାରିଖରେ ରାଜ୍ୟର ପ୍ରଥମ ବିଜେପି ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ମୋହନ ମାଝୀ । ଏହାରି ଭିତରେ ରାଜ୍ୟରେ ମୁଖ୍ୟମନ୍ତ୍ରୀଙ୍କ ବାସଭବନକୁ ନେଇ ଚର୍ଚ୍ଚା ଜୋର ଧରିଛି । ନୂଆ ମୁଖ୍ୟମନ୍ତ୍ରୀଙ୍କ ବାସଭବନ ଠିକଣା କେଉଁଠି ତାହାକୁ ନେଇ ଚର୍ଚ୍ଚା । କାରଣ ବିଗତ ୨୪ ବର୍ଷ ଧରି ନବୀନ ଶାସନ ଗାଦିରେ ବସି ଆସୁଥିବାବେଳେ ନବୀନ ନିବାସରୁ ହିଁ ଶାସନ ବ୍ୟବସ୍ଥା ସମ୍ଭାଳୁଥିଲେ । ଏପରିକି ତାଙ୍କ ପୂର୍ବରୁ ଜାନକୀ ବଲ୍ଲଭ ପଟ୍ଟନାୟକ, ହେମାନନ୍ଦ ବିଶ୍ୱାଳ, ଗିରିଧର ଗମାଙ୍ଗଙ୍କ ଭଳି ମୁଖ୍ୟମନ୍ତ୍ରୀମାନେ ରାଜଭବନ ଏବଂ ଏଜି ସ୍କୋୟାର ମଧ୍ୟରେ ଅବସ୍ଥିତ ଏକ ସରକାରୀ କ୍ବାର୍ଟର୍ସରେ ରହୁଥିଲେ । ଏକଦା ଏହି ବାସଭବନ ପାୱାର କରିଡରର କେନ୍ଦ୍ରବିନ୍ଦୁ ଥିଲା । ମାତ୍ର ୨୦୦୦ ମସିହାରୁ ନବୀନ ଶାସନ ଗାଦିରେ ବସିବା ପରଠୁ ଏହି କ୍ବାର୍ଟର୍ସକୁ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠରେ ପରିଣତ କରିଥିଲେ ।

ଦୀର୍ଘ ୨୪ ବର୍ଷ ଧରି ମୁଖ୍ୟମନ୍ତ୍ରୀଙ୍କୁ ଅପେକ୍ଷା କରି ରହିଥିବା ଏହି ସରକାରୀ ବାସଭବନ, ଏବେ ନୂଆ ମୁଖ୍ୟମନ୍ତ୍ରୀଙ୍କ ଅପେକ୍ଷାରେ । ସାଧାରଣ ପ୍ରଶାସନ ବିଭାଗ ପକ୍ଷରୁ କ୍ବାର୍ଟର୍ସ ଖୋଜିବା ଆରମ୍ଭ ହୋଇଛି । ମୁଖ୍ୟମନ୍ତ୍ରୀଙ୍କ ଅଭିଯୋଗ କକ୍ଷ ସହ କିଛି ଖାଲି କ୍ବାର୍ଟର୍ସକୁ ତାଲିକାଭୁକ୍ତ କରାଯାଇଛି । କ୍ବାର୍ଟର୍ସ ଚୟନ ହେବା ପରେ ଏହାର ନବୀକରଣ ସହ ଆବଶ୍ୟକ ସୁବିଧା ବ୍ୟବସ୍ଥା କରାଯିବ । ତେବେ ଏଥିପାଇଁ କିଛି ସମୟ ଲାଗିବ । ତେଣୁ ଉପଯୁକ୍ତ ଘର ମିଳିବା ଯାଏଁ ରାଜ୍ୟ ଅତିଥି ଭବନକୁ ନୂଆ ମୁଖ୍ୟମନ୍ତ୍ରୀଙ୍କ ପାଇଁ ଅସ୍ଥାୟୀ ସରକାରୀ ବାସଭବନ ଭାବେ ପ୍ରସ୍ତୁତ କରାଯାଇଛି ।

ସେପଟେ ରାଜ୍ୟ ଅତିଥି ଭବନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଠିକଣା ହେବାକ୍ଷଣି ଅବାଧରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଭେଟିଛନ୍ତି ଅଫିସର ଏବଂ ନେତା । ପୁରୀରୁ ଫେରିବା ପରେ ରାଜ୍ୟ ଅତିଥି ଭବନରେ ସରକାରୀ ଅଧିକାରୀଙ୍କୁ ଡାକି ଆଲୋଚନା କରୁଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ପ୍ରଥମେ ନଗର ଉନ୍ନୟନ ସଚିବ ଜି. ମାଥିଭାଥନନଙ୍କ ସହ ଆଲୋଚନା କରୁଛନ୍ତି । ବିଧାନସଭା ସଚିବ ଦାଶରଥୀ ଶତପଥୀ ମଧ୍ୟ ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି । ପରେ ଅନ୍ୟ ବିଭାଗର ସଚିବଙ୍କୁ ଡାକିପାରନ୍ତି ମୁଖ୍ୟମନ୍ତ୍ରୀ । ଏହାସହ ରାଜ୍ୟ ଅତିଥି ଭବନରେ ବିଭିନ୍ନ ଦଳର ନେତାମାନେ ମଧ୍ୟ ମୁଖ୍ୟମନ୍ତ୍ରୀଙ୍କୁ ଭେଟୁଛନ୍ତି ।