ରାଣୀ ଆଉଟ୍ । ପୁରୁଣା କର୍ମୀଙ୍କ ଉପପରେ ଭରସା ଦେଖାଇଲା ବିଜେଡି…
ରୋଚକ ମୋଡ ନେଇଛି ଦେବଗଡ଼ ବିଧାନସଭା । ଏଠାରୁ ବିଜେଡି ତାର ପ୍ରାର୍ଥୀଙ୍କୁ ବଦଳାଇଛି । ପୂର୍ବରୁ ଦେବଗଡ ପାଇଁ ଅରୁନ୍ଧତୀଙ୍କ ନାଁ ଘୋଷଣା କରାଯାଇଥିବାବେଳେ ଏବେ ଏହାକୁ ବଦଳାଇ ରୋମାଞ୍ଚ ରଞ୍ଜନ ବିଶ୍ୱାଳଙ୍କ ନାଁ ଘୋଷଣା କରିଛି ବିଜେଡି । ରୋମାଞ୍ଚ ୨୦୧୯ରେ ମଧ୍ୟ ଏହି ଆସନରୁ ବିଜେଡି ଟିକେଟରେ ଲଢ଼ିଥିଲେ । ତେବେ ଦେବଗଡରେ କାହିଁକି ପ୍ରାର୍ଥୀ ବଦଳାଇଲା ବିଜେଡି ? କାହିଁକି କଟିଗଲା ଅରୁନ୍ଧତୀ ଦେବୀଙ୍କ ଟିକେଟ୍ ? ବିଜେଡିର ଶେଷ ପର୍ଯ୍ୟାୟ ପ୍ରାର୍ଥୀ ଘୋଷଣା ହେବା ପରେ ଏହି ଚର୍ଚ୍ଚା ଏବେ ଜୋର ଧରିଛି । ନିକଟରେ ସମ୍ବଲପୁର ବିଜେପି ସାଂସଦ ନୀତେଶ ଗଙ୍ଗଦେବଙ୍କ ପତ୍ନୀ ତଥା ଦେବଗଡର ରାଣୀ ଅରୁନ୍ଧତୀ ଦେବୀ ବିଜେଡିରେ ସାମିଲ ହେଇଥିଲେ । ତାଙ୍କୁ ଟିକେଟ୍ ଦେଇ ପୁଣି ଟିକେଟ୍ କାଟିଦେଇଛି ବିଜୁ ଜନତା ଦଳ । ଏହାବଦଳରେ ଦଳ ସ୍ଥାନୀୟ ନେତା ରୋମାଞ୍ଚ ରଞ୍ଜନ ବିଶ୍ୱାଳଙ୍କୁ ପୁଣିଥରେ ଭରସା କରିଛି ଦଳ ।
ସୂଚନା ଅନୁସାରେ, ଦେବଗଡରେ ବିଜୁ ଜନତା ଦଳ ପ୍ରଥମେ ଦେବଗଡର ରାଣୀଙ୍କୁ ଟିକେଟ୍ ଦେଇଥିଲା । ଅରୁନ୍ଧତୀଙ୍କୁ ଟିକେଟ୍ ଦେଇ ବଡ ଚାଲ୍ ଖେଳିଥିଲା ବିଜୁ ଜନତା ଦଳ । ହେଲେ ସେହି ଚାଲ୍ କିନ୍ତୁ ବିଜେଡିର ସଫଳ ହେଇନଥିଲା । ଅରୁନ୍ଧତୀ ଦେବୀଙ୍କୁ ଟିକେଟ୍ ମିଳିବା ପରେ ରୋମାଞ୍ଚ ରଞ୍ଜନ ବିଶ୍ୱାଳଙ୍କ ସମର୍ଥକମାନେ ତାଙ୍କୁ ସମର୍ଥନ ଦେଇନଥିଲେ । ଏ ନେଇ ରୋମାଞ୍ଚ ରଞ୍ଜନ ବିଶ୍ୱାଳ ଓ ଦଳରେ ଥିବା ତାଙ୍କର ସମର୍ଥକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା । ଶୁଣାଯାଉଥିଲା, ଗତ ୫ ବର୍ଷ ଧରି ଦେବଗଡ଼ ବିଧାନସଭା ନିର୍ବାଚନ ମଣ୍ଡଳୀର ବିଭିନ୍ନ ସ୍ଥାନକୁ ଯାଇ ଲୋକ ସଂପର୍କକୁ ମଜବୁତ କରିଥିବା ରୋମାଞ୍ଚ ରଞ୍ଜନ ବିଶ୍ୱାଳ ସ୍ୱାଧୀନ ଭାବେ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଛନ୍ତି । ତେବେ ଏସବୁ ଭିତରେ ତାଙ୍କୁ ପୁଣି ଥରେ ପ୍ରାର୍ଥୀ କରାଯାଇଛି ।
ଅନ୍ୟପଟେ ଅରୁନ୍ଧତୀ ଦେବୀ ବିଜେଡିରେ ସାମିଲ ହେବା ପରେ ବିଜେପି ସାଂସଦ ନୀତେଶ ଗଙ୍ଗଦେବ ମଧ୍ୟ ଚଳିତ ନିର୍ବାଚନରେ ବିଜେଡିକୁ ସମର୍ଥନ ଦେବେ ବୋଲି କୁହାଯାଉଥିଲା । ହେଲେ ନୀତେଶଙ୍କ ସମର୍ଥନ ମଧ୍ୟ ଅରୁନ୍ଧତୀ ଦେବୀଙ୍କୁ ମିଳିନଥିଲା । ଏପରିକି ସୋସିଆଲ୍ ମିଡିଆରେ ନୀତେଶ ବିଜେପି ଛାଡିଥିବା ନେଇ ପୋଷ୍ଟ ସେୟାର କରିବା ସହ, ପରେ ତାଙ୍କର ସୋସିଆଲ୍ ମିଡିଆ ଆଇଡି ହ୍ୟାକ୍ ହୋଇଥିଲା ବୋଲି ସ୍ପଷ୍ଟୋକ୍ତି ରଖିଥିଲେ । ଯାହା ପରେ ରାଜପରିବାର ଭିତରେ ସବୁକିଛି ଠିକ୍ ନଥିବା ସ୍ପଷ୍ଟ ହେଇଥିଲା ।
୨୦୧୯ରେ ଏହି ଆସନରୁ ବିଜେଡି ପ୍ରାର୍ଥୀ ରୋମାଞ୍ଚ ରଞ୍ଜନ ବିଶ୍ୱାଳ ବିଜେପି ପ୍ରାର୍ଥୀ ସୁବାସ ପାଣିଗ୍ରାହୀଙ୍କ ଠାରୁ ୫ ହଜାରରୁ ଅଧିକ ଭୋଟ୍ ବ୍ୟବଧାନରେ ହାରିଯାଇଥିଲେ । ହେଲେ ଏହାପରେ ମଧ୍ୟ ପୌର ଓ ପଞ୍ଚାୟତ ନିର୍ବାଚନରେ ବିଜେଡିକୁ ସଫଳତା ଦେବାରେ ସେ ପ୍ରମୁଖ ଭୂମିକା ଗ୍ରହଣ କରିଥିଲେ । ତେଣୁ ସାଧାରଣ ନିର୍ବାଚନରେ ପୁଣିଥରେ ରୋମାଞ୍ଚ ବିଶ୍ୱାଳଙ୍କ ଉପରେ ଦଳ ଆସ୍ଥା ପ୍ରକଟ କରିବା ସହିତ, ଦେବଗଡ ଦାୟିତ୍ୱ ଦେଇଛି ।
