ଶାରଦୀୟ ଆଗମନରେ ଖିଲି ଖିଲି ହୋଇ ନାଚି ଉଠୁଛି କାଶତଣ୍ଡୀ…

ସାଲେପୁର : ନିର୍ମଳ ଆକାଶରେ ଭସା ବାଦଲର ଛାୟାରେ ଖିଲି ଖିଲି ହୋଇ ହସୁଛି କାଶତଣ୍ଡୀ । ଦଦୁଲ୍ୟମାନ ଅବସ୍ଥାରେ କାଶତଣ୍ଡୀ ନାଚି ନାଚି ଶରତ ଋତୁ ସାଙ୍ଗରେ ଶାରଦୀୟ ସମ୍ଭାର ନେଇ ଆସିଛି । ଧରିତ୍ରୀ ମାତାର ବକ୍ଷକୁ ଧୋବଳ ଚାଦରରେ ଢାଙ୍କି ମା ଦଶଭୁଜା ଦୁର୍ଗାଙ୍କୁ ଆମନ୍ତ୍ରଣ କରିଥାଏ କାଶତଣ୍ଡି ରାଣୀ । କାଶତଣ୍ଡୀ ଫୁଲ ପ୍ରକୃତିର ଏକ ବିଚିତ୍ର ସୃଷ୍ଟି l ଶରତ ଆସିଲେ ରାସ୍ତା କଡ଼ ନଈ ପଠାମାନଙ୍କରେ ଦେଖିବାକୁ ମିଳିଥାଏ କାଶତଣ୍ଡୀର ସମ୍ଭାର । କୁହାଯାଏ କାଶତଣ୍ଡୀ ଫୁଲର ଚାମର ସ୍ପର୍ଶରେ ଧରାବତରଣ କରନ୍ତି ମା ଦଶଭୁଜା ଦୁର୍ଗା l ମାଙ୍କ ଆଗମନରେ ଧୋବ ଫର ଫର ଚାଦରରେ ଧରଣୀର ଶୋଭା ମଣ୍ଡନ କରୁଥିବା କାଶତଣ୍ଡୀକୁ ଦେଖିଲେ କବି ମନ ମଧ୍ୟ ଉତଫୁଲିତ ହୋଇ ଉଠେ ଏବଂ କବି ଲେଖନୀରୁ ଆପେ ଆପେ ଝରିପଡେ କବିତାର ନିର୍ଝରିଣୀ ।

କଟକ ଜିଲ୍ଲା ମହାନଦୀ ଓ ଚିତ୍ରୋତ୍ପଳା ନଦୀ ପଠା ଓ ପାର୍ଶ୍ୱବର୍ତ୍ତୀ ସ୍ଥାନରେ ଦୃଶ୍ୟମାନ ହୋଇଥାଏ ଏହି କାଶତଣ୍ଡୀର ସମ୍ଭାର । ଓଡ଼ିଆ ସାହିତ୍ୟ ଓ ସଂସ୍କୃତି ସହ ଓତଃପ୍ରୋତ ଭାବେ ଜଡିତ, ରେଖାପଞ୍ଚମୀରେ କାଶତଣ୍ଡୀ ଫୁଲର ବେଣୀ ଘର କବାଟରେ ବାନ୍ଧି ପୂଜା କରାଯାଏ l ଶରତ ଋତୁର ଆଗମନରେ ଶାରଦୀୟ ଦୁର୍ଗା ପୂଜାର ପ୍ରତୀକ ଭାବେ କାଶତଣ୍ଡୀ ଫୁଲ ଜନମାନସକୁ ବିମୋହିତ କରିଥାଏ l

ରିପୋର୍ଟ : ସାଲେପୁରରୁ ଅଭୟ ଜେନା