ବସୁଧା ଯୋଜନା ଏବେ ବସୁଧାରେ ଲୀନ । ପାଣି ପାଇଁ ଡହଳ ବିକଳ ସାଧାରଣ ଜନତା…

ଗଜପତି : ବସୁଧା ଯୋଜନା ଏବେ ବସୁଧାରେ ଲୀନ । ଉଭୟ କେନ୍ଦ୍ର ଓ ରାଜ୍ୟ ସରକାର ସହରାଞ୍ଚଳରୁ ଆରମ୍ଭ କରି ଗ୍ରାମାଞ୍ଚଳରେ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ବିଭିନ୍ନ ପ୍ରକଳ୍ପମାନ କରିଛନ୍ତି । ଏବଂ ଏଥିପାଇଁ କୋଟି କୋଟି ଟଙ୍କାର ବ୍ୟୟ ବରାଦ ମଧ୍ୟ କରୁଛନ୍ତି । ହେଲେ ବିଭାଗୀୟ କର୍ତ୍ତୃପକ୍ଷଙ୍କ ଖାମଖିଆଲି ମନୋଭାବ ଯୋଗୁଁ ସରକାରଙ୍କ ଜନହିତକର ପ୍ରକଳ୍ପ ଜନସାଧାରଣଙ୍କ କାମରେ ଆସୁନି । ଏପରି ସ୍ଥଳେ ବିଭାଗୀୟ ଯନ୍ତ୍ରୀ ଓ ଠିକାଦାରମାନେ ମାଲେମାଲ ହେଉଥିବା ବେଳେ ସରକାରଙ୍କ ଏହି ପାନୀୟ ଜଳ ଯୋଗାଣ ଯୋଜନା ବିଫଳତାର ଚରଣ ସୀମାରେ ପହଞ୍ଚିଛି । ଜଳ ଯୋଗାଣ ନିମନ୍ତେ ସମସ୍ତ ଭିତ୍ତିଭୂମୀ ଥାଇ ମଧ୍ୟ ପାଣି ମୁନ୍ଦାଏ ପାଇଁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।

ଗଜପତି ଜିଲ୍ଲା ଗୋଷାଣି ବ୍ଲକ ରମ୍ପା ପଞ୍ଚାୟତ ଅନ୍ତର୍ଗତ ଏସ୍.ଉରୁଡା ଗ୍ରାମରେ ବସୁଧା ଯୋଜନାରେ ବିକଳ ଚିତ୍ର ଦେଖିବାକୁ ମିଳିଛି । ବିଶୁଦ୍ଧ ପାନୀୟ ଜଳ ପାଇଁ ଜନସାଧାରଣ ଡହଳବିକଳ ହେଉଥିବା ବେଳେ ପାନୀୟ ଜଳ ସେବାରୁ ବଞ୍ଚିତ ହୋଇଥିବା ନେଇ ସେମାନେ ଅଭିଯୋଗ କରିଛନ୍ତି । ଏହି ଗ୍ରାମରେ ଗତ ୨୦୧୭ ମସିହାରେ ପାନୀୟ ଜଳ ଯୋଗାଇଦେବା ଲାଗି ବିଭାଗ ତରଫରୁ ତିରିଶି ହଜାର ଲିଟର ବିଶିଷ୍ଟ ଓଭର ହେଡ ଟାଙ୍କି ନିର୍ମାଣ କରାଯାଇଥିଲା । ଏଥିପାଇଁ ପମ୍ପହାଉସ ମଧ୍ୟ ନିର୍ମାଣ ହୋଇଛି । ଆଉ ଗ୍ରାମର ସମସ୍ତ ଘର ଘରକୁ ଟ୍ୟାପ ମଧ୍ୟ ଦିଆସରିଛି । ମାତ୍ର ପମ୍ପହାଉସର ମୋଟରଟି ସେତେବେଳେ ଦିନେ କି ଦିନ ଚାଲି ଖରାପ ହୋଇଯାଇଥିଲା । ଆଉ ସେବେଠାରୁ ଆଜି ପର୍ଯ୍ୟନ୍ତ ଅର୍ଥାତ୍ ଛଅ ବର୍ଷ ହେଲା ଏହି ପାନୀୟ ଜଳ ପ୍ରକଳ୍ପ ବନ୍ଦ ହୋଇ ପଡିଥିବା କହିଛନ୍ତି ଗ୍ରାମବାସୀ ।

ଏହି ଓଭର ହେଡ ପାଣି ଟାଙ୍କି ଉପରେ ଏସ୍. ଉରୁଡା ଗ୍ରାମର ଉପରସାହି, ଜକାର ସାହି, ଢେପସାହି, କେ.ଉରୁଡା, ନୂଆସାହି ଆଦିର ପ୍ରାୟ ପନ୍ଦର ଶହରୁ ଉର୍ଦ୍ଧ୍ବ ଅଧିବାସୀ ନିର୍ଭର କରନ୍ତି । ପାନୀୟ ଜଳ ପ୍ରକଳ୍ପ ନିମନ୍ତେ ବସାଯାଇଥିବା ଟ୍ରାନ୍ସଫର୍ମରଟି ଗତ ୨୦୧୮ ମସିହାରେ ସାମୁଦ୍ରିକ ଝଡ ତିତିଲିରେ ଭାଙ୍ଗିରୁଜି ଯାଇଥିଲା । ହେଲେ ଆଜି ପର୍ଯ୍ୟନ୍ତ ଟ୍ରାନ୍ସଫର୍ମରଟି ବସାଯାଇ ପାରିଲା ନାହିଁ । ଗ୍ରାମରେ ଜଳ ଯୋଗାଣ ନିମନ୍ତେ ଅନ୍ୟ ବିକଳ୍ପ ଭାବେ ନଳକୂପ ରହିଥିଲେ ମଧ୍ୟ ଏଗୁଡିକ ଅନେକ ମାତ୍ରାରେ ରକ୍ଷଣା ବେକ୍ଷଣ ଅଭାବରୁ ଖରାପ ହୋଇଯାଇଛି । ଏହାସହ ଗୋଟିଏ କି ଦୁଇଟି ନଳକୂପରୁ ପାଣି ଆସୁଛି ହେଲେ ତାହା କଳଙ୍କିଯୁକ୍ତ ପାଣି କାରଣରୁ ଏହା ବ୍ୟବହାର ଉପଯୋଗୀ ନୁହେଁ । ଏପରି ସ୍ଥଳେ ଏହି ଗ୍ରାମାଞ୍ଚଳରେ ଗୋଟିଏ ମାତ୍ର କୂପ ରହିଥିବାରୁ ମହିଳାମାନେ ପ୍ରାୟ ଦୁଇ କିମି ରାସ୍ତା ଅତିକ୍ରମ କରି ହାଣ୍ଡିଏ ଲେଖାଏଁ ପାଣି ବୋହି ନିଜର ତଷ୍ଣା ମେଣ୍ଟାଉଛନ୍ତି ।

ଏହି ସମସ୍ୟା ନେଇ ବିଭିନ୍ନ ସ୍ତରରେ ବିଭିନ୍ନ ସମୟରେ ଜିଲ୍ଲା ପ୍ରଶାସନ, ସ୍ଥାନୀୟ ପ୍ରଶାସନକୁ ଜଣାଇଛନ୍ତି ଗ୍ରାମବାସୀ, ହେଲେ ଫଳ ଶୂନ୍ୟ । ଏପରିକି ଚଳିତ ଜୁଲାଇ ୩୧ ତାରିଖରେ ଗୋଷାଣି ବ୍ଲକ ଲାବାଣ୍ୟଗଡରେ ହୋଇଥିବା ଜିଲ୍ଲାପାଳଙ୍କ ଜନ ଶୁଣାଣି ଶିବିରରେ ଅଭିଯୋଗ କରାଯାଇଥିଲା । ଅଭିଯୋଗକୁ ଶୁଣି ଜିଲ୍ଲାପାଳ ସ୍ମୃତି ରଞ୍ଜନ ପ୍ରଧାନ ନିଜେ ଗ୍ରାମବାସୀଙ୍କୁ ପ୍ରତିଶୃତି ଦେଇଥିଲେ ଯେ, ଦଶରୁ ପନ୍ଦର ଦିନ ମଧ୍ୟରେ ଏହି ସମସ୍ୟାର ସମାଧାନ କରାଯିବ । ଏହାରି ଭିତରେ ଜିଲ୍ଲାପାଳଙ୍କ ପ୍ରତିଶୃତିକୁ ବିତିଲାଣି ମାସେ, ହେଲେ ପାନୀୟ ଜଳ ସମସ୍ୟାର ସମାଧାନ ହୋଇପାରି ନଥିବା ଜଣାପଡିଛି ।

ରିପୋର୍ଟ : ଗଜପତିରୁ ବିବେକାନନ୍ଦ ବେହେରା