ଗୁରୁଦିବସରେ ସମାଜ କଲ୍ୟାଣ ପାଇଁ ଶପଥ ପାଠ । ସମାଜରେ ବାଲ୍ୟ ବିବାହ ରୋକିବାରେ ସହଯୋଗ କରିବେ ଶିକ୍ଷକ…

କୋଟପାଡ଼ : ଆଜି ହେଉଛି ସେପ୍ଟେମ୍ବର ୫ ତାରିଖ ପବିତ୍ର ଗୁରୁ ଦିବସ । ଏହି ଅବସରରେ କୋରାପୁଟ ଜିଲ୍ଲା କୋଟପାଡ଼ ସହରର ବିଭିନ୍ନ ଶିକ୍ଷାନୁଷ୍ଠାନରେ ଧୁମଧାମରେ ପାଳିତ ହୋଇଯାଇଛି ଗୁରୁଦିବସ । କୋଟପାଡ଼ ସିଦ୍ଧାର୍ଥ ଇଂରାଜୀ ମାଧ୍ୟମିକ ଶିକ୍ଷା ଅନୁଷ୍ଠାନରେ ଆଜି ଗୁରୁଦିବସ ପାଳିତ ହେବା ସହ, ମାନ୍ୟଗଣ୍ୟ ଅତିଥିଙ୍କ ଉପସ୍ଥିତିରେ ଅନୁଷ୍ଠାନ ପରିସରରେ ଏକ ବୁଦ୍ଧ ପ୍ରତିମୂର୍ତ୍ତି ପ୍ରତିଷ୍ଠା କରାଯାଇଛି । ସେହିଭଳି କୋଟପାଡ଼ ପ୍ରାଥମିକ ଶିକ୍ଷକ ସଙ୍ଘ ଦ୍ୱାରା ନିଆରା ଢଙ୍ଗରେ ଗୁରୁ ଦିବସ ସମାରୋହ ପାଳିତ ହୋଇଯାଇଛି । ଏଥିରେ ଭାରତର ପ୍ରଥମ ଉପରାଷ୍ଟ୍ରପତି ଡ଼ ସର୍ବପଲ୍ଲୀ ରାଧାକୃଷ୍ଣନଙ୍କ ସ୍ମୃତିଚାରଣ କରାଯିବା ସହ ଶିକ୍ଷକଙ୍କ ସମାଜ, ରାଜ୍ୟ ତଥା ଦେଶର ପ୍ରଗତି ପାଇଁ ଦାଇତ୍ୱ ଓ ଅବଦାନ ବିଷୟରେ ଆଲୋକପାତ କରାଯାଇଥିଲା । କାର୍ଯ୍ୟକ୍ରମରେ କୋରାପୁଟ ଜିଲ୍ଲାପାଳଙ୍କ ଅନୁରୋଧକ୍ରମେ ସମାଜରେ ବାଲ୍ୟ ବିବାହ ରୋକିବାରେ ଶିକ୍ଷକଙ୍କ ସହଯୋଗ ପାଇଁ ଶପଥ ପାଠ କରାଯାଇଥିଲା । ଏହି ଅଞ୍ଚଳର ଅବସରପ୍ରାପ୍ତ ଶିକ୍ଷକଙ୍କୁ ସମ୍ବର୍ଦ୍ଧିତ କରିବା ସହ ଗୁରୁ ପରମ୍ପରାକୁ ସୁଦୃଢ କରିବା ପାଇଁ ସାଙ୍ଗଠନିକ ଆଭିମୁଖ୍ୟ ଦିଗରେ ମଧ୍ୟ ବିଚାର ବିମର୍ଶ କରାଯାଇଛି ।

ରିପୋର୍ଟ : କୋଟପାଡ଼ରୁ ସୁନୀଲ ଦାଶ