ବସ୍ତାରେ ପଞ୍ଜିକୃତ କଳା ସଂସ୍କୃତି ସଂଘର ସମାବେଶ ଅନୁଷ୍ଠିତ
ବାଲେଶ୍ବର : ବାଲେଶ୍ବର ଜିଲ୍ଲା ବସ୍ତା ବ୍ଲକ ଦରଡା ଗ୍ରାମପଞ୍ଚାୟତ କଲ୍ୟାଣ ମଣ୍ଡପରେ ପଞ୍ଜିକୃତ କଳା ସଂସ୍କୃତି ସଂଘର ସମାବେଶ ଅନୁଷ୍ଠିତ ହୋଇଯାଇଛି । ଏହି ସମାବେଶରେ ଉଦଘାଟକ ଭାବେ ବ୍ଲକ ଅଧ୍ୟକ୍ଷା ଅଞ୍ଜଳି ଦାସ ଯୋଗ ଦେଇ କାର୍ଯ୍ୟକ୍ରମକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ସଂଗଠନର ସମ୍ପାଦକ ପୂର୍ଣ୍ଣଚନ୍ଦ୍ର ବେହେରାଙ୍କ ଆହ୍ବାନରେ ଅତିଥିଙ୍କ ସହିତ କଳାକାରମାନେ ଏକ ବର୍ଣ୍ଣାଢ଼୍ୟ ସମାବେଶରେ ଦରଡା ସାମଲ କଲ୍ୟାଣ ମଣ୍ଡପରୁ ଦରଡା ଶିବ ମନ୍ଦିର ପର୍ଯ୍ୟନ୍ତ ବିଭିନ୍ନ କଳା ପ୍ରଦର୍ଶନ କରିବା ପରେ ସଭାକାର୍ଯ୍ୟ ଆରମ୍ଭ ହୋଇଥିଲା । ଏଥିରେ ମୁଖ୍ୟ ଅତିଥି ଭାବେ ବ୍ଲକ ଏସିଓ ସୌମ୍ୟା ଦାସ, ସମାଜସେବୀ ରଞ୍ଜନ କୁମାର ଦାସ ଯୋଗ ଦେଇ କଳା ଓ କଳାକାରଙ୍କ ମଧ୍ୟରେ ଥିବା ବିଭିନ୍ନ ସମସ୍ୟା ସମ୍ପର୍କରେ ନିଜର ମତପୋଷଣ କରିଥିଲେ ।
କଳାକୁ କେହି ସୃଷ୍ଟି କରି ନଥାଏ, ଏହା ଇଶ୍ବରଦତ୍ତ । ସୃଷ୍ଟିର ଏକ ନିଆରା ପରମ୍ପରା କଳା ବୋଲି ଅତିଥିମାନେ ସମ୍ବୋଧନ କରିଥିଲେ । ସମାବେଶରେ କଳାକାରଙ୍କର ବାସ୍ତବ ଚୟନ ଓ କଳାକୁ ନେଇ ବଞ୍ଚିଆସୁଥିବା ହିତାଧିକାରୀଙ୍କ ମଧ୍ୟରେ ସ୍ବଚ୍ଛତା ଆଣିବାକୁ ପ୍ରୟାସ ଜାରି ରହିଥିବା ବେଳେ ଏହି ଅବସରରେ ୭୫ ଟି ଦଳ ପଞ୍ଜିକୃତ କରିଥିଲେ । ଏଥିସହିତ ପଞ୍ଜିକୃତ କଳାକାରଙ୍କୁ କ୍ଷେତ୍ର ଅନୁସାରେ ଚୟନର ବ୍ୟବସ୍ଥା ରଖିବାକୁ ଆଲୋଚନା କରାଯାଇଥିଲା । ବ୍ଲକ କଳା ସଂସ୍କୃତି ସଂଘରେ ପ୍ରଶାସକ ଓ କଳାକାର ଉଭୟଙ୍କ ଯୁଗ୍ମ କମିଟିରେ ଉପସଭାପତିଙ୍କ ବ୍ୟତୀତ ଆଉ ସାତ ଜଣଙ୍କୁ କମିଟିରେ ଅନ୍ତର୍ଭୁକ୍ତ କରିବାକୁ ସଂଘ ପକ୍ଷରୁ ଆବାହକ ନିବେଦନ କରିଥିଲେ ।
ରିପୋର୍ଟ : ବସ୍ତାରୁ ଭରତ କୁମାର ଦାସ
