ଅମୃତ ଭାରତ ଯୋଜନାରେ ୫୦୮ଟି ଷ୍ଟେସନର ପୁର୍ନବିକାଶ ପାଇଁ ଭିତ୍ତିପ୍ରସ୍ତର ସ୍ଥାପନ କଲେ ପ୍ରଧାନମନ୍ତ୍ରୀ

ଜଟଣୀ : ମାନ୍ୟବର ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ଆରମ୍ଭ ହୋଇଥିବା ଅମୃତ ଭାରତ ଷ୍ଟେସନ୍ ଯୋଜନାରେ ଯାତ୍ରୀମାନଙ୍କୁ ବିଶ୍ୱ ସ୍ତରୀୟ ସୁବିଧା ତଥା ସେବା ଯୋଗାଇବା ପାଇଁ ସାରା ଦେଶରେ ରେଳ ଷ୍ଟେସନ ଭିତ୍ତିଭୂମିକୁ ଆଧୁନିକରଣ ତଥା ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି । ଏହି ଯୋଜନା ଅନ୍ତର୍ଗତ ଭାରତୀୟ ରେଳବାଇର ୧୩୦୯ଟି ଷ୍ଟେସନର ନବୀକରଣ ସହ ଆଧୁନିକରଣ ପାଇଁ ଯୋଜନା କରାଯାଇଛି । ଏହି ଯୋଜନାରେ ଓଡିଶାର ୫୭ଟି ଷ୍ଟେସନ ରହିଥିବା ବେଳେ ଖୋର୍ଦ୍ଧାରୋଡ଼ ଡିଭିଜନର ୨୫ ଷ୍ଟେସନକୁ ସାମିଲ୍ କରାଯାଇଛି । ପ୍ରଥମ ପର୍ଯ୍ୟାୟରେ ଖୋର୍ଦ୍ଧରୋଡ ଡିଭିଜନର ୧୧ଟି ଷ୍ଟେସନର ପୁନଃବିକାଶ କରାଯିବ I ଏ ନେଇ ବିଧିବଦ୍ଧ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀରୁ ଭିଡିଓ କନଫରେନ୍ସିଂ ଜରିଆରେ ଅମୃତ ଭାରତ ଯୋଜନା ଅଧୀନରେ ୫୦୮ଟି ଷ୍ଟେସନର ପୁର୍ନବିକାଶ ପାଇଁ ଭିତ୍ତିପ୍ରସ୍ତର ସ୍ଥାପନା କରିଛନ୍ତି I

ଏ ନେଇ ଭାରତ ସରକାରଙ୍କ ପକ୍ଷରୁ ୫୩୮କୋଟି ଟଙ୍କାର ବ୍ୟୟ ବରାଦ କରାଯାଇଛି I ଷ୍ଟେସନର ଆଧୁନିକରଣ ସହିତ ନୂତନ ଷ୍ଟେସନ୍ ବିଲଡିଂ, ଷ୍ଟେସନ୍ ଫାସେଡ୍, ପ୍ରବେଶଦ୍ୱାର, ପ୍ରତୀକ୍ଷାଳୟ, ପାରିପାର୍ଶ୍ଵିକ କ୍ଷେତ୍ର ଇତ୍ୟାଦିରେ ଉନ୍ନତିକରଣ ହେବ I ଲିଫ୍ଟ, ପ୍ଲାଟଫର୍ମ ଆଶ୍ରୟସ୍ଥଳ, ଆଧୁନିକ ଆସବାବପତ୍ର ସହିତ ଉନ୍ନତ ବିଶ୍ରାମଗାର, ଆଧୁନିକ ସୁବିଧା ସହିତ ପ୍ରିମିୟମ୍ ଟଏଲେଟ୍ ସୁବିଧା ଇତ୍ୟାଦି ପ୍ରଦାନ କରାଯିବ I ଏହି ଅବସରରେ ଇଷ୍ଟ କୋଷ୍ଟ ରେଲୱେ ପକ୍ଷରୁ ବ୍ୟାପକ କାର୍ଯ୍ୟକ୍ରମ ଆୟୋଜିତ ହୋଇଯାଇଛି ।

ଏହି କାର୍ଯ୍ୟକ୍ରମରେ ରାଜ୍ୟସଭା ସାଂସଦ ମୁନ୍ନା ଖାଁ, ଜଟଣୀ ବିଧାୟକ ସୁରେଶ କୁମାର ରାଉତରାୟ, ଅନ୍ୟାନ୍ୟ ମନ୍ୟଗଣ୍ୟ ବ୍ୟକ୍ତି ଓ ଛାତ୍ରଛାତ୍ରୀମାନେ ଉପସ୍ଥିତ ଥିଲେ । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମହାମହିମ ରାଜ୍ୟପାଳ ପ୍ରଫେସର ଗଣେଶୀ ଲାଲ ଯୋଗ ଦେଇ ଅମୃତ ଭାରତ ଯୋଜନାକୁ ପ୍ରଶଂସା କରିଥିଲେ ।

ରିପୋର୍ଟ : ଜଟଣୀରୁ ପ୍ରଶାନ୍ତ କୁମାର ସାହୁ