ଗାଁ ରହିଛି, ହେଲେ ବିକାଶର ଗୁଞ୍ଜରଣ ଶୂନ୍ୟ… ମୀରାବାଇ ଜାଣିଲେ ଲୋକଙ୍କ ଦୁଃଖ, ହେଲେ ସରକାର ନିରବ !

ବେଗୁନିଆପଡା : କୁହାଯାଏ ଗାଁ ବିକାଶରୁ ହିଁ ସମ୍ଭବ ହୋଇପାରେ ଦେଶର ବିକାଶ । ଆମ ଦେଶ ଭାରତ ଏକ ବିକଶୀଳ ରାଷ୍ଟ୍ର । ଏହି ବିକଶୀଳ ରାଷ୍ଟ୍ର ମଧ୍ୟରେ ରହିଛି ଆମ ରାଜ୍ୟ ଓଡିଶା । ହେଲେ ଆମ ରାଜ୍ୟର ଏପରି କିଛି ସ୍ଥାନ ରହିଛି ଯେଉଁଠାରେ ଲୋକେ ଆଜି ବି ମୌଳିକ ସୁବିଧାରୁ ବଞ୍ଚିତ । ଏମିତି ଏକ ଗାଁ ହେଉଛି ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ କାଳିମେଘି ପଞ୍ଚାୟତର ତେଲିମାଳ । ବଣ ପାହାଡର ଘେରା ଭିତରେ ଅବସ୍ଥିତ ଏହି ଗ୍ରାମରେ ବସବାସ କରନ୍ତି ୩୦ରୁ ଅଧିକ ପରିବାର । କିନ୍ତୁ ଆଜି ପର୍ଯ୍ୟନ୍ତ ସରକାରଙ୍କ କୌଣସି ଯୋଜନା ଏଠାରେ ପହଁଚି ପାରିନି । ଫଳରେ ଉପଯୁକ୍ତ ସୁବିଧା ପାଇପାରି ନାହାଁନ୍ତି ଏହି ଗ୍ରାମବାସୀ । ନା ଅଛି ପାଠ ପଢିବାର ବ୍ୟବସ୍ଥା, ନା ଅଛି ବିଶୁଦ୍ଧ ପାନୀୟ ଜଳର ବ୍ୟବସ୍ଥା । ଆଉ ସ୍ବାସ୍ଥ୍ୟବସ୍ଥା କଥା ନ କହିବା ଭଲ । ଏପଟେ ଗ୍ରାମରେ ସ୍କୁଲ କି ଅଙ୍ଗନଓ୍ୱାଡିଟିଏ ବି ନାହିଁ । ସେଥିପାଇଁ ଆଜିବି ପାଠ ପଢିବାରୁ ବଞ୍ଚିତ ଅନେକ ଶିଶୁ । ଆଉ ଯେଉଁମାନେ ପାଠ ପଢିବାକୁ ଯାଆନ୍ତି ସେମାନେ ଗ୍ରାମଠାରୁ ୬ କିଲୋମିଟର ଦୂର ବରବରା ଗ୍ରାମକୁ ଯାଉଛନ୍ତି । ଏପରିକି ସରକାରଙ୍କ ବାସଗୃହ ଯୋଜନାରେ ଗୋଟିଏ ହେଲେ ପରିବାର ଏପର୍ଯ୍ୟନ୍ତ ବାସଗୃହ ନପାଇବା ଅତ୍ୟନ୍ତ ଦୁଃଖର ବିଷୟ । ସ୍ୱାଧୀନତାର ୭୫ବର୍ଷ ପରେ ମଧ୍ୟ କାହିଁକି ପ୍ରଶାସନର ନଜର ଆଜି ପର୍ଯ୍ୟନ୍ତ ଏହି ଗାଁ ଉପରେ ପଡିଲା ନାହିଁ ତାହା ଏବେ ପ୍ରଶ୍ନବାଚୀ ।

ଏଭଳି ସ୍ଥଳେ ଗ୍ରାମବାସୀଙ୍କ ପାଇଁ ଦେବଦୂତ ସାଜି ସେଠାରେ ପହଞ୍ଚିଛନ୍ତି ସମାଜସେବୀ ମୀରାବାଇ ଦେଓ ଓ ତାଙ୍କ ସହଯୋଗୀ ସୁଜାତା ପଟ୍ଟନାୟକ । ଗ୍ରାମବାସୀଙ୍କ ପାଖରେ ପହଞ୍ଚି ସେମାନେ ଶିଶୁମାନଙ୍କୁ ପାଠ୍ୟ ଉପକରଣ ଯଥା ସିଲଟ୍, ଖଡି ଓ ମାଣ୍ଡିଆରେ ପସ୍ତୁତ ଖାଦ୍ୟ ସାମଗ୍ରୀ ବଣ୍ଟନ କରିଛନ୍ତି । ଆଗାମୀ ଦିନରେ ଶିଶୁମାନେ କିଭଳି ଭଲରେ ପାଠ ପଢିପାରିବେ ଓ ଗ୍ରାମକୁ କିଭଳି ସମସ୍ତ ସୁବିଧା ମିଳିପାରିବ ସେ ଦିଗରେ ପଦକ୍ଷେପ ନେବାପାଇଁ ପ୍ରତିଶ୍ରୁତି ଦେଇଛନ୍ତି । ଏହାସହ ସରକାରଙ୍କ ମିଲେଟ୍ ମିଶନରେ ଉତ୍ପାଦିତ ମାଣ୍ଡିଆକୁ ନେଇ କିଭଳି ଗ୍ରାମବାସୀ ସ୍ବାବଲମ୍ବୀ ହେଇପାରିବେ ସେ ଦିଗରେ ସମସ୍ତ ସହଯୋଗ ଯୋଗାଇବେ ବୋଲି ପ୍ରତିଶ୍ରୁତି ମଧ୍ୟ ଦେଇଛନ୍ତି ।

ଏତେ ବର୍ଷର ସରକାର ଜାଣିପାରିଲେନି ଲୋକଙ୍କ ଦୁଃଖ । ଏଭଳି ସ୍ଥଳେ ଲୋକଙ୍କ ଦୁଃଖ ବୁଝି ସେଠାରେ ପହଞ୍ଚିଲେ ସମାଜସେବୀ ମୀରାବାଇ । ତେବେ ଖବର ପ୍ରସାରଣ ପରେ ସରକାର ଏ ଦିଗରେ ଯଥା ସମ୍ଭବ ପଦକ୍ଷେପ ନେବେ ବୋଲି ବିଶ୍ବାସ ।

ରିପୋର୍ଟ : ବେଗୁନିଆପଡାରୁ ବାପୁନି କୁମାର ମାଲୁ