ହାତଗୁଞ୍ଜା ନଦେଲେ ମିଳି ପାରୁନି ଆବାସ ଗୃହ…
ଢେଙ୍କାନାଳ : ଆବାସ ଯୋଜରେ କେଳେଙ୍କାରୀ ଅଭିଯୋଗ । ହାତଗୁଞ୍ଜା ନଦେଲେ ମିଳି ପାରୁନି ଆବାସ ଗୃହ । ଏ ନେଇ ଉପଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ ଆଣିଛନ୍ତି ଗ୍ରାମବାସୀ । ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ଠୋକର ପଞ୍ଚାୟତରେ ଆବାସ ଯୋଜନାରେ ଅନିୟମିତତା ନେଇ ଅଭିଯୋଗ ଆଣିଛନ୍ତି ଠୋକରବାସୀ । କେନ୍ଦ୍ର ତଥା ରାଜ୍ୟ ସରକାର ଗରିବ ହିତାଧିକାରୀମାନଙ୍କୁ ଆବାସ ଯୋଜନାରେ ପକ୍କା ଘର ଯୋଗାଇ ଦେବା ନେଇ କୋଟି କୋଟି ଟଙ୍କାର ବ୍ୟୟ ଅଟକଳ ପ୍ରସ୍ତୁତ କରୁଛନ୍ତି । ହେଲେ ପରବର୍ତ୍ତୀସ୍ତରରେ ଏହାର ସୁପରିଚାଳନାରେ କୋହଳ ମନୋଭାବ କାରଣରୁ ବହୁ ଗରିବ ହିତାଧିକାରୀ ସରକାରୀ ଯୋଜନାରୁ ବଞ୍ଚିତ ହେଉଛନ୍ତି । ଗୋଟିଏ ପଟେ ଯୋଗ୍ୟ ହିତାଧିକାରୀ ସରକାରୀ ଯୋଜନାରୁ ବାଦ୍ ପଡୁଥିବାବେଳେ ଅଯୋଗ୍ୟ ଲୋକ ଆବାସ ଗୃହ ପାଇବା ଘଟଣା ଯୋଜନାର ଅବହେଳିତ ଚିତ୍ରକୁ ପ୍ରଦର୍ଶିତ କରେ । ଆଉ ହାତଗୁଞ୍ଜା ନେଇ କାମ କରୁଥିବା ଅଧିକାରୀଙ୍କ ମନୋଭାବ ବ୍ରିଟିଶ୍ ଶାସନକୁ ମନେ ପକାଇଦିଏ ।
ଠୋକର ପଞ୍ଚାୟତର ଅନେକ ଯୋଗ୍ୟ ହିତାଧିକାରୀ ଆବାସ ଗୃହ ଖଣ୍ଡେ ପାଇଁ ପଞ୍ଚାୟତରୁ ବ୍ଲକ ଦୌଡ଼ି ଦୌଡ଼ି ନୟାନ୍ତ ହୋଇଗଲେଣି । ହେଲେ ନା ତାଙ୍କୁ ଆଜି ପର୍ଯ୍ୟନ୍ତ ମିଳିଲା ନାହିଁ ଆବାସ ଗୃହ । ଓଲଟା ହାତଗୁଞ୍ଜା ଦେଲେ ଆବାସ ଗୃହ ମିଳିବ ବୋଲି ଅଭିଯୋଗ ଆଣିଛନ୍ତି ଠୋକର ପଞ୍ଚାୟତର ଗ୍ରାମବାସୀ । ଏ ନେଇ ହିନ୍ଦୋଳ ଉପଜିଲ୍ଲାପାଳଙ୍କ ନିକଟରେ ୮ ରୁ ୧୦ଟି ଲିଖିତ ଅଭିଯୋଗ ଆଣିଛନ୍ତି ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ଠୋକର ପଞ୍ଚାୟତବାସୀ । ଏବାବଦରେ ଠୋକର ସରପଞ୍ଚ ରୋଜିତା ମାଝୀଙ୍କୁ ପଚାରିବାରୁ ସେ କହିଛନ୍ତି ଯେ, ପଞ୍ଚାୟତରେ ମୋଟ ୮୬ଟି ଘର ଆସିଥିଲା । ସେଥିମଧ୍ୟରୁ ୭୯ଟି ଆବାସ ଗୃହ ଯୋଗ୍ୟ ହିତାଧିକାରୀଙ୍କୁ ମିଳିଥିବାବେଳେ ୭ଟି ଆବାସ ଗୃହ ଭେରିଫାଇ ପାଇଁ ଯାଇଛି । ଏହା ସହ ସେ ଆବାସ ଗୃହ ଦୁର୍ନୀତି ଅଭିଯୋଗକୁ ଖଣ୍ଡନ କରିବା ସହ ସରପଞ୍ଚଙ୍କୁ ବଦଲାମ କରିବା ପାଇଁ ବିରୋଧୀଙ୍କ ଏହା ଚକ୍ରାନ୍ତ ବୋଲି କହିଛନ୍ତି । ଏପରିକି ଯେଁଉ ସବୁ ଅଭିଯୋଗ ଆସୁଛି ଏହା ପୂର୍ବତନ ସରପଞ୍ଚଙ୍କ ସମୟର କହି ଅଭିଯୋଗକୁ ଖଣ୍ଡନ କରିଛନ୍ତି ସରପଞ୍ଚ ରୋଜିତା ମାଝୀ ।
ଅପରପକ୍ଷେ ଗ୍ରାମବାସୀଙ୍କ ଅଭିଯୋଗକୁ ଗୁରୁତର ସହ ନେଇ ସଠିକ୍ ତଦନ୍ତ କରି ଯୋଗ୍ୟ ହିତାଧିକାରୀଙ୍କୁ ଆବାସ ଗୃହରେ ଘର ଯୋଗାଇ ଦେବାକୁ ଅନୁରୋଧ କରିଛନ୍ତି ବୁଦ୍ଧିଜୀବୀ ।
ରିପୋର୍ଟ : ଢେଙ୍କାନାଳରୁ ସୁଜିତ କୁମାର ବେହେରା
