ହାଟ ରହିଛି ହେଲେ ସୁବିଧା ନାହିଁ…

କୋଟପାଡ଼ : କୋରାପୁଟ ଜିଲ୍ଲା କୋଟପାଡ଼ ସହରରେ ପ୍ରତ୍ୟେକ ମଙ୍ଗଳବାର ଦିନ ଲାଗେ ସାପ୍ତାହିକ ହାଟ । ଏହି ହାଟ ଉପରେ ଛତିଶଗଡ ଏବଂ ଅବିଭକ୍ତ କୋରାପୁଟ ଜିଲ୍ଲାର ବିଭିନ୍ନ ଅଞ୍ଚଳରୁ ବ୍ୟବସାୟୀ ଆସି ବଜାର ଲଗେଇଥାନ୍ତି । କହିବାକୁ ଗଲେ, କୋଟପାଡ଼ ସପ୍ତାହିକ ହାଟରେ ବହୁତ ଜନ ଗହଳି ଦେଖିବାକୁ ମିଳେ । କିନ୍ତୁ ବିଡମ୍ବନାର ବିଷୟ କୋଟପାଡ଼ ହାଟପଦା ଉପରେ ପଡୁନି ପ୍ରଶାସନର ନଜର । ଫଳରେ ତାହାର ବ୍ୟବସ୍ଥା ଆଜି ପର୍ଯ୍ୟନ୍ତ ସୁଧୁରିବାର ନାଁ ଧରୁନି । ହାଟ ପଡୁଥିବା ସ୍ଥାନରେ ନା ରହିଛି ଭଲ ସେଡ ନା ଭଲ ରାସ୍ତା । ବର୍ଷା ଦିନ କାଦୁଅ ଜୁଡୁବୁଡୁ ଅବସ୍ଥାରେ ଚାଲେ ହାଟପଦା ବଜାର । ବର୍ତ୍ତମାନ ଲଗାତାର ବର୍ଷା କାରଣରୁ ହାଟ ଅଞ୍ଚଳ କାଦୁଅ ହୋଇଯିବାରୁ ବାଧ୍ୟ ହୋଇ ବିଚ୍ ରୋଡ଼ରେ ବସୁଛି ସାପ୍ତାହିକ ହାଟ । ଫଳରେ ଦେଖାଦେଇଛି ଟ୍ରାଫିକ ସମସ୍ୟା । ଆମିଷଠାରୁ ଆରମ୍ଭ କରି ପନିପରିବା, ଏପରିକି କପଡା ବ୍ୟବସାୟୀ ଭଳି ବିଭିନ୍ନ ଉଠା ଦୋକାନ ଜାତୀୟ ରାଜପଥ କଡ଼ରେ ଲାଗିଛି । ଏହା ସହ ଅବୈଧ ଗାଡି ପାର୍କିଂ ଯୋଗୁଁ ବଢ଼ିବାରେ ଲାଗିଛି ଟ୍ରାଫିକ ସମସ୍ୟା ।

ଆଶ୍ଚର୍ଯ୍ୟର ଘଟଣା କୋଟପାଡ଼ ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟାଳୟଠାରୁ ମାତ୍ର ୫୦ମିଟର ଦୂରତାରେ ବସେ ଏହି ସପ୍ତାହିକ ହାଟ । ତେବେ କତ୍ତୃପକ୍ଷ ଟ୍ରାଫିକ ସମସ୍ୟା ବାବଦରେ ସବୁ ଜାଣି ମଧ୍ୟ ନିରବଦ୍ରଷ୍ଟା । ଏପରିକି RMC କର୍ମଚାରୀଙ୍କ ନଜର ଅଡୁଆଳରେ ଏହି ବ୍ୟବସ୍ଥା । ଟିକସ ଆଦାୟବେଳେ ତତ୍ପର RMC କତ୍ତୃପକ୍ଷ କିଭଳି ହାଟପଦାର ଉନ୍ନତି ହେବ ସେ ଦିଗରେ ଗୁରୁତ୍ୱ ଦେବାରେ ବିଫଳ । କୋରାପୁଟର କୁନ୍ଦୁଲିରେ ପରେ ଦ୍ବତୀୟ ସ୍ଥାନରେ ରହିଥିବା କୋଟପାଡ଼ ହାଟପଦାର ଅବସ୍ଥା କହିଲେ ନସରେ । ଏହି ରାସ୍ତା ଦେଇ ତିନୋଟି ସ୍କୁଲ ରହିଥିବା ବେଳେ କୁନି କୁନି ଛୁଆ ବିପଦ ସଂକୁଳ ପରିସ୍ଥିତିରେ ସ୍କୁଲକୁ ଯାତାୟାତ କରିଥାନ୍ତି । ଏହାବାଦ୍ ଏହି ଭିଡ଼ ରାସ୍ତା ଦେଇ ଥାନା, କଚେରୀ, ତହସିଲ ଅଫିସ, ବ୍ଲକ ଅଫିସ, ଟ୍ରଜେରିକୁ ଯିବାକୁ ପଡୁଥିବା ବେଳେ ସାଧାରଣ ଜନତା ନାନାଦି ଅସୁବିଧାର ସମ୍ମୁଖୀନ ହୋଇଥାଆନ୍ତି । ଏ ନେଇ କୋଟପାଡ଼ ବୁଦ୍ଧିଜୀବୀ ପ୍ରଶାସନ ନିକଟରେ କୁନ୍ଦୁଲି ଭଳି କୋଟପାଡ଼ ହାଟପଦାର ଉନ୍ନତିକରଣ କରାଯିବା ପାଇଁ ଅନୁରୋଧ କରିଛନ୍ତି ।

ରିପୋର୍ଟ : କୋଟପାଡ଼ରୁ ସୁନୀଲ ଦାଶ