ୟୁପିଏସସିରୁ ଉତ୍ତୀର୍ଣ୍ଣ ଅଧିକାରୀ ‘ଡକାୟତ’, କହୁ କହୁ କହିଦେଲେ କେନ୍ଦ୍ରମନ୍ତ୍ରୀ

ବାଲିଆପାଳ : ୟୁପିଏସସି ପାଇଥିବା ଅନେକ ବଡ ବଡ ଅଧିକାରୀଙ୍କୁ ଡକାୟତ ବୋଲି ସମ୍ବୋଧନ କରି ଏବେ ହରଡ ଘଣାରେ କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁ । ଏପରିକି ସେ କହିଛନ୍ତି ଯେ, ଚିକେନ ଚୋର ଏଠି ଦୋଷୀ ସାବ୍ୟସ୍ତ ହୋଇ ଜେଲ ଯାଉଛି, ମାତ୍ର ବଡ ବଡ ଖଣି ଚୋର ଏଠି ଖୁଲମଖୋଲା ବୁଲୁଛନ୍ତି । କେନ୍ଦ୍ରମନ୍ତ୍ରୀ ତଥା ଓଡିଶାର ବିଜେପି ନେତାଙ୍କ ଏହି ବୟାନ ଏବେ ଚାରିଆଡେ ରାଜନୈତିକ ଉଷ୍ମତାକୁ ବୃଦ୍ଧି କରିଛି ।

ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ଜାମକୁଣ୍ଡା ସରକାରୀ ଉଚ୍ଚ ବିଦ୍ୟାଳୟର ସୁବର୍ଣ୍ଣ ଜୟନ୍ତୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଆଦିବାସୀ କଲ୍ୟାଣ ତଥା ଜଳ ସମ୍ପଦ ବିଭାଗର କେନ୍ଦ୍ରମନ୍ତ୍ରୀ ବିଶ୍ଵେଶ୍ଵର ଟୁଡୁ । ଏହି ଅବସରରେ ସେ ପିଲାମାନଙ୍କ ସହିତ ନିଜର ଅନୁଭୂତି ବୟାନ କରୁ କରୁ କହିଥିଲେ ଯେ, ତାଙ୍କର ଭାବନା ଥିଲା ୟୁପିଏସସିରୁ ଉତ୍ତୀର୍ଣ୍ଣ ହେଉଥିବା ଅଧିକାରୀଙ୍କ ଜ୍ଞାନ ସର୍ବୋଚ୍ଚ । ମାତ୍ର ଏବେ ତାଙ୍କର ସେହି ଭାବନାରେ ପରିବର୍ତ୍ତନ ଆସିଛି ।

ସୁବର୍ଣ୍ଣ ଜୟନ୍ତୀ କମିଟିର କାର୍ଯ୍ୟକାରୀ ସଭାପତି ତଥା ଅବସର ପ୍ରାପ୍ତ ବାୟୁସେନା ଅଧିକାରୀ କମଳ ଲୋଚନ ପିଳାଙ୍କ ସଭପତିତ୍ବରେ ଅନୁଷ୍ଠିତ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ବିଶ୍ଵେଶ୍ଵର ଟୁଡୁଙ୍କ ଏହି ଅଭିଭାଷଣ ଏବେ ଚାରିଆଡେ ଭାଇରାଲ ହେବାରେ ଲାଗିଛି ।

କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବାଲେଶ୍ୱର ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ଯୋଗ ଦେଇ ଶିକ୍ଷାର ଉପଯୁକ୍ତ ବିକାଶରେ ପିତାମାତା, ଶିକ୍ଷକ ଓ ସମାଜର ଗୁରୁତ୍ବପୂର୍ଣ୍ଣ ଭୂମିକା ଉପରେ ନିଜର ବକ୍ତବ୍ୟ ପ୍ରଦାନ କରିଥିଲେ । ଏହାସହ ମାତୃଭାଷାର ବିକାଶ ଓ ବ୍ୟଵହାରକୁ ପ୍ରାଧାନ୍ୟ ଦେବା ପାଇଁ ସମସ୍ତଙ୍କୁ କହିଥିଲେ । ଏଥିରେ ସମ୍ମାନିତ ଅତିଥି ଭାବେ ପୂର୍ବତନ ମନ୍ତ୍ରୀ ରଘୁନାଥ ମହାନ୍ତି, ସାହିତ୍ୟିକ ଡ. ହରିଶ ଚନ୍ଦ୍ର ବେହେରା, ଡ. ଶିଶିର ଚନ୍ଦ୍ର ଜେନା ପ୍ରମୁଖ ଉପସ୍ଥିତ ରହି ନିଜ ନିଜର ବକ୍ତବ୍ୟ ରଖିଥିଲେ ।

ରିପୋର୍ଟ: ବାଲିଆପାଳରୁ ଚନ୍ଦନ ଅଣ୍ଡିଆ