ବାଲେଶ୍ୱରରେ ସେକ୍ସ ରାକେଟ ଠାବ: ୨ ବାଂଲାଦେଶୀ ମହିଳା ସହ ୬ ଯୁବତୀ ଉଦ୍ଧାର, ୧୩ ଗିରଫ
ବାଲେଶ୍ୱର : ଆଳୁ ଖୋଳୁଖୋଳୁ ମହାଦେବ ମିଳିଲା ଭଳି ବାଲେଶ୍ୱର ପୋଲିସ ଏକ ଅପହରଣ ମାମଲାର ତଦନ୍ତ କରୁକରୁ ପୁରା ସେକ୍ସ ରାକେଟର ସନ୍ଧାନ ପାଇଛି । ଯେଉଁଥିରେ ବାଲେଶ୍ଵର ଜିଲ୍ଲାର ବିଭିନ୍ନ ସ୍ଥାନର କିଛି ଦଲାଲମାନେ ଯୁବତୀଙ୍କୁ ପ୍ରଲୋଭିତ କରି ଏମିତି କାର୍ଯ୍ୟରେ ଲଗାଉଥିବା ବାଲେଶ୍ଵର ପୋଲିସ ଅନୁସନ୍ଧାନରୁ ଜାଣିବାକୁ ପାଇଛି ।
ଏହି ଘଟଣାରେ ବାଲେଶ୍ଵର ଜିଲ୍ଲାର ବିଭିନ୍ନ ଥାନା ଅଞ୍ଚଳରୁ ୧୩ ଜଣଙ୍କୁ ଗିରଫ କରାଯାଇଥିବା ବେଳେ ୬ ଜଣ ଯୁବତୀଙ୍କୁ ଉଦ୍ଧାର କରାଯାଇଛି । ଅପରପକ୍ଷେ ଘଟଣାରେ ପୋଲିସ ଆହୁରି ଅଧିକ ତଦନ୍ତ ଜାରି ରଖିଛି । ସେକ୍ସ ରାକେଟରେ ଜିଲ୍ଲାର ଅନେକ ଦଲାଲଙ୍କ ସମ୍ପୃକ୍ତି ଥିବାବେଳେ ଆଗାମୀ ଦିନରେ ପୋଲିସ ତଦନ୍ତ କରି ଘଟଣାରେ ସମ୍ପୃକ୍ତ ବ୍ୟକ୍ତିଙ୍କୁ ଖୋଜି ବାହାର କରିବ ବୋଲି ବାଲେଶ୍ଵର ଏସପି ସାଗରିକା ନାଥ ସୂଚନା ଦେଇଛନ୍ତି । ଏହି ଘଟଣା ସମ୍ପର୍କରେ ଏସପି ଏକ ସାମ୍ବାଦିକ ସମ୍ମିଳନୀ ଜରିଆରେ ସବିଶେଷ ତଥ୍ୟ ପ୍ରଦାନ କରିଛନ୍ତି ।
ଏସପି ସାଗରିକା ନାଥଙ୍କ ସୂଚନା ଅନୁସାରେ, କିଛିଦିନ ପୂର୍ବରୁ ପଶ୍ଚିମବଙ୍ଗର ଚବିଶପ୍ରଗଣା ଅଞ୍ଚଳର ଦୁଇଜଣ ଯୁବତୀ ନିଖୋଜ ନେଇ ମାମଲା ରୁଜୁ ହୋଇଥିଲା । ଏହାକୁ ନେଇ ପଶ୍ଚିମବଙ୍ଗ ଅଞ୍ଚଳର ଏକ ସାମାଜିକ ଅନୁଷ୍ଠାନ ପକ୍ଷରୁ ଯୁବତୀମାନେ ବାଲେଶ୍ଵରକୁ ଚାଲାଣ ହୋଇ ଆସିଥିବା ବାଲେଶ୍ଵର ପୋଲିସକୁ ସୂଚନା ଦିଆଯାଇଥିଲା । ଏହାକୁ ନେଇ ବାଲେଶ୍ଵର ଏସପି ତତ୍ପରତା ପ୍ରକାଶ କରିବା ସହ ବିଭିନ୍ନ ଥାନା ଅଧିକାରୀଙ୍କୁ ଏ ବିଷୟରେ ଖୋଳତାଡ଼ ଆରମ୍ଭ କରିବା ପାଇଁ ନିର୍ଦ୍ଦେଶ ଦେଇଥିଲେ । ବସ୍ତା ଥାନା ଅଞ୍ଚଳରେ କେତେଜଣ ବ୍ୟକ୍ତି ବିଭିନ୍ନ ଅଞ୍ଚଳରୁ ଯୁବତୀମାନଙ୍କୁ ଟଙ୍କାର ଲୋଭ ଦେଖାଇ ସେକ୍ସ ରାକେଟ ଚଳାଉଥିବା ପୋଲିସ ଖବର ପାଇଥିଲା । ଏହାକୁ ନେଇ ବସ୍ତା ପୋଲିସ ଛାନଭିନ ଆରମ୍ଭ କରିଥିଲା । ଏହାସହ ଜଳେଶ୍ୱରରେ ମଧ୍ୟ ଠିକ୍ ଏଭଳି ଘଟଣା ପୋଲିସ ତଦନ୍ତରୁ ଜାଣିବାକୁ ପାଇଥିଲା ।
ଯୁବତୀ ଚାଲାଣ ଓ ସେକ୍ସ ରାକେଟ ଚଳାଉଥିବା ଜଣେ ବେପାରୀଙ୍କୁ ବସ୍ତା ପୋଲିସ ଗିରଫ କରିବା ପରେ ଏଥିରେ ଆହୁରି ଅନେକ ବ୍ୟକ୍ତି ସମ୍ପୃକ୍ତି ଥିବା ପୋଲିସ ଜାଣିବାକୁ ପାଇଥିଲା । କିଛି ଦଲାଲ ରାଜ୍ୟ ତଥା ରାଜ୍ୟ ବାହାରୁ ଯୁବତୀମାନଙ୍କୁ ଚାକିରୀର ଲୋଭ ଦେଖାଇ ତଥା ଏକ ସୁନ୍ଦର ଲାଇଫ ଷ୍ଟାଇଲର ପ୍ରଲୋଭନ ଦେଖାଇ ସେମାନଙ୍କୁ ଚାଲାଣ କରିଥାନ୍ତି । ପରବର୍ତ୍ତୀ ସମୟରେ ସେମାନଙ୍କୁ ଦେହ ବ୍ୟବସାୟରେ ନିୟୋଜିତ କରି ଦଲାଲ ଓ ସେକ୍ସ ରାକେଟ ଚଳାଉଥିବା ବ୍ୟକ୍ତିମାନେ ମାଲେମାଲ ହୋଇଥାନ୍ତି । ଏଥିପାଇଁ ରାଜ୍ୟ ବାହାରର କିଛି ଦଲାଲ ବାଲେଶ୍ଵର ଅଞ୍ଚଳର ବସ୍ତା, ଜଳେଶ୍ବର ଆଦି ଅଞ୍ଚଳର କିଛି ବ୍ୟକ୍ତିଙ୍କୁ ହାତ କରି ଯୁବତୀ ଚାଲାଣ ସହ ସେମାନଙ୍କୁ ଦେହ ବ୍ୟବସାୟରେ ନିଯୁକ୍ତ କରି ଟଙ୍କା ରୋଜଗାର କରୁଥିଲେ ।
ପଶ୍ଚିମବଙ୍ଗର ଉକ୍ତ ଦୁଇ ଯୁବତୀଙ୍କୁ ଦଲାଲମାନେ ବସ୍ତା ଓ ଜଳେଶ୍ବର ଅଞ୍ଚଳରେ ରଖି ଦେହ ବ୍ୟବସାୟରେ ସାମିଲ କରିବା ସହିତ ମିଛ ପ୍ରମାଣପତ୍ର ଦେଇ ସ୍ୱାମୀ ସ୍ତ୍ରୀ ଭାବେ ରହୁଥିବା ପୋଲିସ ତଦନ୍ତରୁ ଜଣାପଡିଛି । ସବୁଠୁ ବଡ଼କଥା ହେଲା ଦେହ ବ୍ୟବସାୟରେ କିଛି ମହିଳା ସାମିଲ ହୋଇ ଯୁବତୀମାନଙ୍କୁ ଚାଲାଣ କରୁଥିବା ପୋଲିସ କହିଛି ।
ବାଲେଶ୍ବରରୁ ରଞ୍ଜନ ଦେ
