ବଞ୍ଚିବାର ରାହା ଯୋଗାଇଛି ସଲପ ରସ

ଗଜପତି (ବିବେକାନନ୍ଦ ବେହେରା): ବଞ୍ଚିବାର ରାହା ଯୋଗାଇଛି ସଲପ ରସ । ସଲପ ରସରେ ପ୍ରସୁତ ଗୁଡରେ ରହିଛି ଔଷଧୀୟ ଗୁଣ । ଏଣୁ ଏହାକୁ ନେଇ ଜୀବନ ଜୀବିକା ଆଶାରେ ଆଦିବାସୀ ଲୋକ । ଆଦିବାସୀଙ୍କ ଜୀବନର ମୁଖ୍ୟ କାମ ହେଲା ଜଙ୍ଗଲରୁ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରିବା ଏବଂ ତାକୁ ସ୍ଥାନୀୟ ବଜାରରେ ବିକ୍ରିବଟା କରି ପରିବାର ପ୍ରତିପୋଷଣ କରିବା । ଜଙ୍ଗଲ ହିଁ ଏମାନଙ୍କ ଜୀବନ ଜୀବିକା କହିଲେ ଅତ୍ୟୁକ୍ତି ହେବ ନାହିଁ । ତେବେ ଜଙ୍ଗଲରେ ଥିବା ସଲପ ଗଛରୁ ରସ ସଂଗ୍ରହ କରି ଏହାକୁ ପାନୀୟ ଓ ଖାଦ୍ୟ ରୂପେ ବ୍ୟବହାର କରିବା ଏହି ଆଦିବାସୀଙ୍କୁ ନୂଆ ଦିଗ ପ୍ରଦାନ କରିଛି । ସଲପ ରସରୁ ଗୁଡ଼ ପ୍ରସ୍ତୁତ କରି ଦୈନନ୍ଦିନ କାମରେ ବ୍ୟବହାର କରିବା ସହିତ ବଜାରରେ ଓ ବାହାର ରାଜ୍ୟକୁ ବିକ୍ରିକରି ଭଲ ଦି ପଇସା ରୋଜଗାର କରୁଛନ୍ତି ମୋହନା ବ୍ଲକ ଅନ୍ତର୍ଗତ ପିଣ୍ଡିକି ପଞ୍ଚାୟତ ଅଧିନ ଚିକିସମେରା ଗାଁର ଲୋକ ।

କାହିଁ କେଉଁ କାଳରୁ ଆଦିବାସୀ ସଂପ୍ରଦାୟର ଲୋକେ ଜଙ୍ଗଲରେ ଥିବା ଏହି ସଲପ ଗଛରୁ ରସ ସଂଗ୍ରହ କରି ସେଥିରୁ ଗୁଡ ପ୍ରସ୍ତୁତ କରି ସେମାନଙ୍କ ପର୍ବପର୍ବାଣୀ ଓ ଘରେ ବ୍ୟବହାର କରୁଥିଲେ । ଏହି କୌଳିକ ବୃତ୍ତିକୁ ଆପଣାଇଛନ୍ତି ଗ୍ରାମର ୪ଟି ପରିବାରର ଲୋକେ । ସେମାନେ ହେଲେ ବାବୁଲା ମଳିକ, ଶ୍ୟାମ ମଳିକ, ଡ୍ରିକି ମଳିକ, କାଳିଆ ମଳିକ । ଏମାନେ ୨ ମାସ ହେଲା ଗୁଡ ପ୍ରସ୍ତୁତିରେ ଲାଗି ପଡିଛନ୍ତି । ପ୍ରତ୍ୟେକ ଦିନ ସକାଳେ ଓ ସଞ୍ଜରେ ୧୧ଟି ସଲପ ଗଛରୁ ନିର୍ଗତ ପ୍ରାୟ ୧୨୦ ଲିଟର ରସକୁ ହାଣ୍ଡି ସାହାଯ୍ୟରେ ସଂଗ୍ରହ କରୁଛନ୍ତି । ତାକୁ ବଡ଼ କଡେଇରେ ରଖି କାଠ ଚୁଲି ଲଗାଇ ଗରମ କରାଯାଏ । ରସର ସମସ୍ତ ପାଣି ବାଷ୍ପିଭୂତ ହେବା ପରେ ଶେଷରେ ସେଥିରୁ ୪୦ରୁ ୫୦ କିଲୋ ଗୁଡ ପ୍ରସ୍ତୁତ ହୁଏ । ଏହି ଗୁଡକୁ ହାଇଦ୍ରାବାଦ କମ୍ପାନୀର ଜନୈକ ବ୍ୟକ୍ତି ଆସି କିଲୋପ୍ରତି ୧୬୦ ଟଙ୍କା ମୂଲ୍ୟରେ କିଣି ନେଇଥାନ୍ତି ବୋଲି ଗୁଡ଼ ପ୍ରସ୍ତୁତକାରୀ କହିଛନ୍ତି । ଏହି ଗୁଡକୁ ଔଷଧ ରୂପେ ମଧ୍ୟ ବ୍ୟବହାର କରାଯାଏ । ବିଶେଷ କରି ବାତ ହେଲେ ଗୁଡକୁ ଗରମ ପାଣିରେ ସିଝାଇ ସେହି ପାଣିକୁ ଥଣ୍ଡା କରି ପିଇବା ଦ୍ୱାରା ବାତ ରୋଗରୁ ଉପଶମ ମିଳିଥାଏ । ଏପରିକି ଗୋଡ଼, ହାତ, ଅଣ୍ଟା ବିନ୍ଧା ମଧ୍ୟ ଦୂର ହୁଏ ବୋଲି ଗୁଡ ପ୍ରସ୍ତୁତକାରୀ କହିଛନ୍ତି ।

୧୦ କିଲୋ ଗୁଡ ପ୍ରସ୍ତୁତ ପାଇଁ ଏମାନଙ୍କୁ ୫ ରୁ ୭ ଘଣ୍ଟା ସମୟ ଲାଗିଥାଏ । ଅପରପକ୍ଷେ ଏହି ବୃତ୍ତିକୁ ଏବେ ସ୍ଥାନୀୟ ବ୍ଳକର ଲୁବୁରୁ ଓ ଟାଙ୍ଗିଲିପଦର ଗାଁର କିଛି ଲୋକ ଆପଣାଇଥିବା ଜଣାପଡେ । ଯଦି ସରକରାଙ୍କ ତରଫରୁ ଏହି ଗୁଡ ପ୍ରସ୍ତୁତକାରୀଙ୍କୁ ସହାୟତା ମିଳନ୍ତା ତେବେ ସେମାନେ ଅଧିକରୁ ଅଧିକ ପରିମାଣର ଗୁଡ଼ ପ୍ରସ୍ତୁତ କରି ବାହାର ରାଜ୍ୟକୁ ବିକ୍ରିକରି ଲାଭବାନ ହୋଇପାରନ୍ତେ ବୋଲି କହିଛନ୍ତି । ଗୁରୁତ୍ବପୂର୍ଣ୍ଣ କଥା ହେଲା ଅବକାରୀ ବିଭାଗ ସଲପ ରସ ବିକ୍ରି କରିବା ଉପରେ ରୋକ ଲଗାଇଛି । ଯାହାକୁ ନେଇ ଦୁଃଖ ପ୍ରକାଶ କରିଛନ୍ତି ଏହାକୁ ନେଇ ବଞ୍ଚୁଥିବା ବ୍ୟବସାୟୀ ।