ଓଏଏସ୍ ପରୀକ୍ଷାରେ ତିନିଥର ଫେଲ୍ ହେବାପରେ ଶେଷରେ ସଫଳ ହେଲେ ରାଜେନ୍ଦ୍ର

ଦୃଢ ଇଚ୍ଛା ଶକ୍ତି ହିଁ ପରୀକ୍ଷାରେ କରିଛି ସଫଳ । ତିନି ତିନି ଥର ପରୀକ୍ଷା ଦେଇ ସେ ଅକୃତକାର୍ଯ୍ୟ ହୋଇଥିଲେ । ମାତ୍ର ତାଙ୍କର ଦୃଢ ଇଚ୍ଛା ଶେଷରେ ତାଙ୍କୁ ସଫଳତାର ସ୍ବାଦ ଚଖାଇଛି । ଚଳିତ ବର୍ଷ ଓଏଏସ୍ ପରୀକ୍ଷାରେ ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ପି. ନୂଆଗାଁର ରାଜେନ୍ଦ୍ର ଜେନା 118 ତମ ସ୍ଥାନରେ କୃତକାର୍ଯ୍ୟ ହୋଇଛନ୍ତି । ବାରମ୍ବାର ଅକୃତକାର୍ଯ୍ୟ ହେବା ପରେ ଧର୍ଯ୍ୟହରା ନ ହୋଇ ବରଂ ଏହାର କାରଣ ଖୋଜି ସେ ଦିଗପ୍ରତି ତର୍ଜମା କରିବା ସହ ସେହି ବିଷୟରେ ପ୍ରସ୍ତୁତ ହୋଇ ପରୀକ୍ଷା ଦେଇଥିଲେ ରାଜେନ୍ଦ୍ର । ଆଉ ଶେଷରେ ସେ ସଫଳତା ମଧ୍ୟ ହାସଲ କରିଛନ୍ତି । ତେବେ ସେ କୃତକାର୍ଯ୍ୟ ହେବା ପରେ ଗଣମାଧ୍ୟମ ପ୍ରତିନିଧି ତାଙ୍କୁ ପ୍ରଶ୍ନ କରିଥିଲେ ଯେ, ଗଞ୍ଜାମ ଜିଲ୍ଲାର ପିଲା ହୋଇ ଯଦି ତାଙ୍କୁ ଗଞ୍ଜାମରେ କାମ କରିବାର ସୁଯୋଗ ମିଳେ ତେବେ ସେ କଣ କରିବେ । ରାଜେନ୍ଦ୍ର ପ୍ରଶ୍ନର ଉତ୍ତରରେ କହିଥିଲେ ଯେ ଗଞ୍ଜାମରୁ ବହୁତ ଯୁବକ ଦାଦନ ଖଟିବାକୁ ଗୁଜୁରାଟ ଯାଇ ବୟନ ଶିଳ୍ପରେ କାମ କରୁଛନ୍ତି । ଏଣୁ ଯଦି ପ୍ରଶାସନ ସହଯୋଗ କରେ ତେବେ ସେ ବୟନ ଶିଳ୍ପ ପାଇଁ ଚେଷ୍ଟା କରିବା ସହ ରୋଜଗାରର ସୁଯୋଗ ସୃଷ୍ଟି କରିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିବେ । ତେବେ ରାଜେନ୍ଦ୍ରଙ୍କ ସଫଳତାରେ ଅଂଚଳରେ ଖୁସିର ଲହରୀ ଖେଳିଯାଇଛି ।

ବେଗୁନିଆପଡାରୁ ବାପୁନି କୁମାର ମାଲୁ