କ୍ୟୁରିଅସ୍ କବ୍ସ ପ୍ରି-ସ୍କୁଲର ନୂଆ କେନ୍ଦ୍ର ଝାରସୁଗୁଡ଼ାରେ ଉଦ୍ଘାଟିତ

କ୍ୟୁରିଅସ୍ କବ୍ସ ପ୍ରି-ସ୍କୁଲ୍ ହେଉଛି ପୂର୍ବ ଭାରତ ଓ ଦେଶର ଅନ୍ୟ ପ୍ରାନ୍ତ ମଧ୍ୟରେ ଆଦ୍ୟ ବାଲ୍ୟକାଳ ଶିକ୍ଷାର ଗୁଣାତ୍ମକ ମାନରେ ରହିଥିବା ଅଭାବକୁ ଦୂର କରିବା ଲାଗି ଏକ ଅଭିଯାନ । ଝାରସୁଗୁଡ଼ାରେ ଏହାର ନୂତନ କେନ୍ଦ୍ର ଖୋଲିଛି । ଝାରସୁଗୁଡ଼ାର ମଙ୍ଗଲବଜାରରେ କ୍ୟୁରିଅସ୍ କବ୍ସ ପ୍ରି-ସ୍କୁଲର ନୂଆ କେନ୍ଦ୍ରକୁ ବେଦାନ୍ତ ଝାରସୁଗୁଡ଼ାର ସିଇଓ ସୁନିଲ ଗୁପ୍ତା ମୁଖ୍ୟ ଅତିଥି ଭାବେ ଯୋଗ ଦେଇ ଉଦଘାଟନ କରଥିଲେ । ଏହି ଅବସରରେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବ କିଶୋର ଦାସଙ୍କ ପ୍ରତିନିଧି ତଥା ତାଙ୍କ ସୁପୁତ୍ରୀ ଦୀପାଲି ଦାସ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ ।

କ୍ୟୁରିଅସ୍ କବ୍ସର ପ୍ରଥମ ଶାଖା ସମ୍ବଲପୁରରେ ରହିଛି । ସମ୍ବଲପୁର, ରାଉରକେଲା ଓ ଭୁବନେଶ୍ୱର ଆଦିରୁ ୬୦୦ରୁ ଅଧିକ ଛାତ୍ରଛାତ୍ରୀଙ୍କୁ ନେଇ ଅନ୍ୟତମ ଅଗ୍ରଣୀ ପ୍ରି-ସ୍କୁଲରେ ତାହା ପରିଣତ ହୋଇଛି । କ୍ୟୁରିଅସ୍ କବ୍ସର ସହ ପ୍ରତିଷ୍ଠାତା ଓ ସହ ଅଧ୍ୟକ୍ଷା ଦେବଶ୍ରୀ ଦେବଯାନି ନିଜ ଅଭିଭାଷଣରେ କହିଥିଲେ ଯେ, ଏହି ସ୍କୁଲର ଯାତ୍ରା ୭ ଜଣ ଛାତ୍ରଛାତ୍ରୀଙ୍କଠାରୁ ଆରମ୍ଭ ହୋଇ ୫ରୁ ଅଧିକ କେନ୍ଦ୍ରରେ ୬୦୦ରୁ ଅଧିକ ଛାତ୍ରଛାତ୍ରୀରେ ପହଂଚିଛି । ଏହା ହେଉଛି ସମ୍ପୂର୍ଣ୍ଣ ରୂପେ ମହିଳାଙ୍କ ଦ୍ୱାରା ପରିଚାଳିତ ସଂସ୍ଥା ।

କ୍ୟୁରିଅସ୍ କବ୍ସ ପ୍ରି-ସ୍କୁଲ, ଝାରସୁଗୁଡ଼ାର ନିର୍ଦେଶକ ମିସ୍ ଶିତଲ ଅଗ୍ରୱାଲ୍ କହିଛନ୍ତି ଯେ, କ୍ୟୁରିଅସ୍ କବ୍ସ ପ୍ରି-ସ୍କୁଲ ହେଉଛି ପଶ୍ଚିମ ଓଡ଼ିଶାର ଅଗ୍ରଣୀ ଓ ଅନ୍ୟତମ ପ୍ରିମିୟମ୍ ପ୍ରି-ସ୍କୁଲ । ଏହାର ଉପସ୍ଥିତି ସମ୍ବଲପୁର, ରାଉରକେଲା, ଭୁବନେଶ୍ୱର ଓ ଏବେ ଝାରସୁଗୁଡ଼ାରେ ରହିଛି । ଏହା ନିଜର ଆନ୍ତର୍ଜାତିକ ପାଠ୍ୟକ୍ରମ, ଉନ୍ନତ ଭିତିଭୂମି ଓ ଅଭିନବ ଶିକ୍ଷାଦାନ ପଦ୍ଧତି ପାଇଁ ପରିଚିତ ।