ପକ୍ଷୀଙ୍କ ସାଥି ଶୁଭ୍ରାଂଶୁ ଶତପଥି । ପରିବେଶ ସୁରକ୍ଷିତ ରହିଲେ ସମାଜ ସୁରକ୍ଷିତ ରହିବ …
ଖରାଦିନେ ପାଣିପାଇଁ ଡହଳବିକଳ ପକ୍ଷୀଙ୍କ ସେବାରେ ଲାଗିଥାଆନ୍ତି ଢେଙ୍କାନାଳର ଯୁବକ ଶୁଭ୍ରାଂଶୁ ଶତପଥି । ତେଣୁ ତାଙ୍କୁ ତୁଷାର୍ତ୍ତ ପକ୍ଷୀଙ୍କ ସାଥି ବୋଲି କୁହାଯାଏ l ଆଧୁନିକ ଯୁଗରେ ମାଳ ମାଳ କଂକ୍ରିଟ ଜଙ୍ଗଲ ଯୋଗୁଁ ଅସହ୍ୟ ତାତିରେ ଅସ୍ତବ୍ୟସ୍ତ ଜନଜୀବନ । ଅସହ୍ୟ ତାତି ଯୋଗୁଁ ଘରୁ ବାହାରିବା କଷ୍ଟକର ହୋଇପଡୁଥିବାବେଳେ ଶୁଭ୍ରାଂଶୁ କିନ୍ତୁ ପକ୍ଷୀମାନଙ୍କ ସେବାରେ ନିଜକୁ ନିୟୋଜିତ କରିଛନ୍ତି । ପକ୍ଷୀଙ୍କ କଷ୍ଟକୁ ଅନୁଭବ କରି, ନିଜସ୍ବ ଖର୍ଚ୍ଚରେ ଘରର ଛାତ, ଅଗଣା, ବଗିଚା ଓ ଜଙ୍ଗଲରେ ମାଟି ପାତ୍ରରେ ସେମାନଙ୍କ ପାଇଁ ଜଳ ଯୋଗାଉଛନ୍ତି ଶୁଭ୍ରାଂଶୁ l ଆଜି ପର୍ଯ୍ୟନ୍ତ ପଚିଶି ହଜାରରୁ ଅଧିକ ମାଟି ପାତ୍ରରେ ପକ୍ଷୀମାନଙ୍କ ପାଇଁ ଜଳ ଯୋଗାଇ ଥିବା ଶୁଭ୍ରାଂଶୁଙ୍କୁ ମିଳିତ ଜାତି ସଙ୍ଘ ପକ୍ଷରୁ UN Environment ସମ୍ମାନରେ ସମ୍ମାନିତ କରାଯାଇଛି l ନିଜେ ପରିବେଶ ସୁରକ୍ଷା ଦିଗରେ କାମ କରୁଥିବାବେଳେ ସେ ସର୍ବଦା ଛାତ୍ରଛାତ୍ରୀଙ୍କୁ ମଧ୍ୟ ଏ ଦିଗରେ ସଚେତନ କରୁଛନ୍ତି ।
ଶୁଭ୍ରାଂଶୁଙ୍କ ବାପା ଉଦୟନାଥ ଶତପଥି ଜଣେ ଅବସର ପ୍ରାପ୍ତ ଜିଲ୍ଲା ବନଖଣ୍ଡ ଅଧିକାରୀ ହୋଇଥିବା ବେଳେ ମା ରାଜଲକ୍ଷ୍ମୀ ଶତପଥି ଜଣେ ଗୃହିଣୀ l ତେବେ ଉଭୟଙ୍କ ପରିବେଶ ପ୍ରତି ଥିବା ଦୁର୍ବଳତା ତାଙ୍କ ସାନପୁଅ ଶୁଭ୍ରାଂଶୁଙ୍କ ନିକଟରେ ପ୍ରତିଫଳିତ ହୋଇଛି । ସାମ୍ବାଦିକତାରେ ମାଷ୍ଟର ଡିଗ୍ରୀ କରିଥିବା ଶୁଭ୍ରାଂଶୁ ଅଧିକ ବେତନ ପାଉଥିବା ଚାକିରୀ ଛାଡି ଏବେ ପକ୍ଷୀଙ୍କ ପ୍ରେମରେ ବିମୋହିତ । କେବଳ ଏତିକି ନୁହେଁ, ସହରାଞ୍ଚଳରେ ନୂତନ ଜଙ୍ଗଲ ସୃଷ୍ଟି ତଥା ଜଙ୍ଗଲକୁ ନିଆଁ ଦାଉରୁ ରକ୍ଷା କରିବା, ପ୍ଲାଷ୍ଟିକି ବର୍ଜନ କରିବା ଓ ଏକ ମାନବ ଶୃଙ୍ଖଳ ତିଆରି କରିବା ଦିଗରେ ମଧ୍ୟ ସେ ବର୍ଷ ତମାମ କାର୍ଯ୍ୟ କରନ୍ତି l ତାହାସହ ଏଭଳି ବିଷୟବସ୍ତୁକୁ ନେଇ ସେ ପ୍ରାମାଣିକ ଚଳଚ୍ଚିତ୍ର ପ୍ରସ୍ତୁତ କରିଛନ୍ତି ।
2019ରେ ପ୍ଲାଷ୍ଟିକି ବର୍ଜନ ପାଇଁ ପାଞ୍ଚ କିଲୋମିଟରର ମାନବ ଶୃଙ୍ଖଳ ତିଆରି କରି ସେ ବିଶ୍ୱ ପରିବେଶ ହିରୋ ଭାବେରେ ମିଳିତ ଜାତି ସଙ୍ଘ ପକ୍ଷରୁ ଆୱାର୍ଡ ପାଇଥିଲେ । ଚଳିତ ବର୍ଷ ମଧ୍ୟ ଢେଙ୍କାନାଳର ଯୁବ ପରିବେଶବିତ୍ ଶୁଭ୍ରାଂଶୁଙ୍କୁ ଭୁବନେଶ୍ୱରରେ ଆୟୋଜିତ ‘ଆର୍ଟ ଅଫ୍ ଗିଭିଂ’ ନବମ ବାର୍ଷିକ ସମାରୋହରେ ସମ୍ମାନିତ କରାଯାଇଛି l ମାନ୍ୟବର ରାଜ୍ୟପାଳ ପ୍ରଫେସର ଗଣେଶୀଲାଲ୍ ତାଙ୍କୁ Birdman ଭାବେ ସମ୍ବୋଧିତ କରିବା ସହ ପରିବେଶ ସୁରକ୍ଷା ଲାଗି ତାଙ୍କ ଅବଦାନକୁ ଭୂୟସୀ ପ୍ରଶଂସା କରିଥିଲେ ।
ପରିବେଶ ବନ୍ୟପ୍ରାଣୀଙ୍କ ସୁରକ୍ଷା ବାର୍ତ୍ତା ନେଇ ମୁମ୍ବାଇ, ଚେନ୍ନାଇ, କୋଲକାତା, ପୁନେ ସମେତ ରାଜ୍ୟର 25ଟି ଜିଲ୍ଲାରେ ସେ କାମ କରିଛନ୍ତି । ବିଭିନ୍ନ ସ୍କୁଲ, ସ୍ବେଛାସେବୀ ସଂସ୍ଥାକୁ ପକ୍ଷୀଙ୍କ ପାଇଁ ପାଣି ବ୍ୟବସ୍ଥା କରିବାକୁ ମାଟିପାତ୍ର ମଧ୍ୟ ପ୍ରଦାନ କରିଛନ୍ତି । ଶୁଭ୍ରାଂଶୁ କୁହନ୍ତି ଆଗାମୀ ଦିନରେ ସେ ଆହୁରି 50ହଜାର ମାଟି ପାତ୍ର ପ୍ରଦାନ କରିବାକୁ ଲକ୍ଷ୍ୟ ରଖିଛନ୍ତି । ଏବଂ ସହରାଞ୍ଚଳରେ କିପରି ଭୂତଳ ଜଳକୁ ସଂଗୃହୀତ କରି ହେବ ସେ ଦିଗରେ ମଧ୍ୟ ସେ କାମ କରି ସମାଜକୁ ସଚେତନ କରିବେ ବୋଲି ଆଶା ରଖିଛନ୍ତି ।
ଏ ସଂକ୍ରାନ୍ତରେ ଶୁଭ୍ରାଂଶୁ କୁହନ୍ତି ପରିବେଶ ସୁରକ୍ଷିତ ହେଲେ ସମଗ୍ର ଜୀବଜଗତ ସୁରକ୍ଷିତ ରହିବ । ତେବେ ଶୁଭାଂଶୁଙ୍କ ଭଳି ଯଦି ପ୍ରତ୍ୟେକ ମାନବ ସମାଜ ପରିବେଶ ପ୍ରତି ଯତ୍ନବାନ ହୁଅନ୍ତେ ତେବେ ପରିବେଶ ସୁରକ୍ଷିତ ରହିବା ସହ ଆଗାମୀ ଭବିଷ୍ୟତ ସୁରକ୍ଷିତ ରହିବ ବୋଲି ଅନେକ ପରିବେଶବିତମାନେ ମତ ପ୍ରକାଶ କରିଛନ୍ତି ।
ଢେଙ୍କାନାଳରୁ ଗୋପବନ୍ଧୁ ବାରିକ
