ସେବା ସମବାୟ ସମିତି ଲିଃରେ ସରକାରୀ ବାବୁଙ୍କ ମନମୁଖୀ ଶାସନ ଯୋଗୁଁ ନିର୍ବାଚନରୁ ବଞ୍ଚିତ ହେଲେ ଚାଷୀ

ଓଡାପଡା ବ୍ଲକ ସଦାଶିବପୁର ସେବା ସମବାୟ ସମିତି ଲିଃରେ ସରକାରୀ ବାବୁଙ୍କ ଅବହେଳା ଓ ମନମୁଖୀ ଶାସନ ଯୋଗୁଁ ନିର୍ବାଚନରୁ ବଞ୍ଚିତ ହେଲେ ଚାଷୀ । ବର୍ତମାନ ସାରା ଓଡ଼ିଶାରେ ଚାଲିଛି ସେବାସମବାୟ ସମିତି ଲିଃର ନିର୍ବାଚନ l ରାଜ୍ୟ ସରକାର ଚାଷୀକୂଳଙ୍କ ହିତ ପାଇଁ ବିଭିନ୍ନ ପ୍ରକାରର ନିୟମ ଓ ପଦ୍ଧତି ଅବଲମ୍ବନ କରି ଗ୍ରାମାଞ୍ଚଳ ତଥା ସହରାଞ୍ଚଳରେ ଗଢ଼ି ଉଠିଥିବା ସେବା ସମବାୟ ସମିତି ଲିଃରେ କିପରି ଶାନ୍ତି ଶୃଙ୍ଖଳାର ସହ ନିର୍ବାଚନ ହେବ ତାହାର ବିଧିବଦ୍ଧ ନିୟମ ପ୍ରଣୟନ କରିଥିଲେ ମଧ୍ୟ ସରକାରୀ ବାବୁମାନଙ୍କ ଅବହେଳା ଓ ମନମାନି ଯୋଗୁଁ ଆଜି ଜଣେ ଚାଷୀ ସେବା ସମବାୟ ଲିଃରୁ ନିଜେ ନିର୍ବାଚନ ଲଢ଼ିବାରୁ ବଞ୍ଚିତ ହୋଇଛନ୍ତି l ଆମେ କହୁଛୁ ଢେଙ୍କାନାଳ ଜିଲ୍ଲା ଓଡାପଡା ବ୍ଲକ ସଦାଶିବପୁର ଗ୍ରାମପଞ୍ଚାୟତର ସେବା ସମବାୟ ସମିତି ଲିଃ କଥା ।

ସୂଚନା ଅନୁସାରେ, ଗତ ଜୁନ ପାଞ୍ଚ ତାରିଖ ଦିନ ସଦାଶିବପୁର ସେବା ସମବାୟ ଲିଃରେ 32 ଜଣ ପ୍ରାର୍ଥୀ ନିଜର ନମାନଙ୍କ ପତ୍ର ଦାଖଲ କରିଥିଲେ । ସେଥିମଧ୍ୟରୁ ସେହି ସମବାୟ ସମିତି ଲିଃ ଅନ୍ତର୍ଗତ ବଉଳପୁର ଗ୍ରାମର ହାଡିବନ୍ଧୁ ବେହେରା ମଧ୍ୟ ନିଜର ସମର୍ଥକଙ୍କ ସହ ନିଜର ସମସ୍ତ ଦସ୍ତାବିଜ ଓ ନିଜର ବ୍ୟକ୍ତିଗତ ପ୍ରମାଣପତ୍ର ନେଇ ନିର୍ବାଚନ ଲଢ଼ିବା ପାଇଁ ନିଜକୁ ପ୍ରସ୍ତୁତ କରୁଥିଲେ । କିନ୍ତୁ ବଡ଼ ଦୁଃଖ ଓ ପରିତାପର ବିଷୟ ଯେ, ସେ ଯେତେବେଳେ ସଦାଶିବପୁର ସେବା ସମବାୟ ସମିତି ଲିଃର ପ୍ରାର୍ଥୀ ତାଲିକା ଦେଖିଲେ ସେଥିରୁ ସେ ବାଦ ପଡ଼ିଥିଲେ l ଏ ନେଇ ହାଡିବନ୍ଧୁ ବେହେରା ଓ ତାଙ୍କ ସମର୍ଥକମାନେ ସମସ୍ତ ଦସ୍ତାବିଜ୍ ସଠିକ୍ ହୋଇ ମଧ୍ୟ କାହିଁକି ନିର୍ବାଚନରୁ ବାଦ୍ ହେଲେ ବୋଲି ପ୍ରଶ୍ନ କରିଛନ୍ତି ।

ସେମାନଙ୍କ କହିବା କଥା ହେଲା ଗତ କୋଡିଏ ବର୍ଷ ହେବ ଏଠାରେ କେବେ ସମବାୟ ନିର୍ବାଚନ ହୋଇନଥିଲା ଏବଂ ଚଳିତ ବର୍ଷ ପ୍ରଥମ ଥର ପାଇଁ ନିର୍ବାଚନୀ ହୋଇଛି । ସେଥିପାଇଁ ପ୍ରକୃତ ନିର୍ବାଚନ ପ୍ରଚାର ପ୍ରସାର ନ ହୋଇ ନିଜେ ସମବାୟ କର୍ମଚାରୀ ତାଙ୍କର ଅବହେଳା ଓ ମନମାନି ପାଇଁ ସେ ହାଡିବନ୍ଧୁ ବେହେରାଙ୍କୁ ଆକ୍ରୋଶ ମୂଳକ ଭାବେ ତାଙ୍କର ନାମାନଙ୍କ ପତ୍ରକୁ କାଟି ଦେଇଥିବା ଅଭିଯୋଗ ହୋଇଛି । ଆଉ ଏବେ ନିଜର ଦୋଷ ତ୍ରୁଟିକୁ ଘୋଡାଇବା ପାଇଁ ବିଭିନ୍ନ ପ୍ରକାରର ଆଳ ଦେଖାଉଥିବା ସେମାନେ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି ।

ଏ ବାବଦରେ ସେଠିକାର ସେବା ସମବାୟ ଲିଃର ନିର୍ବାଚନ ଅଧିକାରୀଙ୍କୁ ପଚାରିବାରୁ ସେ କହିଛନ୍ତି ଯେ ଯେଉଁ ନିର୍ବାଚନୀ ନାମାଙ୍କନ ଦେୟ ରହିଛି ତାହା ସେ ଦାଖଲ କରିନଥିଲେ ସେଥିପାଇଁ ସେ ନିର୍ବାଚନ ତାଲିକାରୁ ତାଙ୍କୁ ବାଦ ହୋଇଛନ୍ତି । ତେବେ କଣ ଦସ୍ତାବିଜ ଦରକାର ହେବ କଣ ନୀତିନିୟମ ରହିବ ଏବଂ କେମିତି ପ୍ରଚାର ପ୍ରସାର ହେବ ତାହା ଆମ ଦାୟିତ୍ୱ ନୁହେଁ l ଏହା ହେଉଛି ସମବାୟ ସେକ୍ରେଟରୀଙ୍କ ଦାୟିତ୍ୱ କହି ନିଜ ଦୋଷତ୍ରୁଟିକୁ ଶେଷ କରିଛନ୍ତି ।

ଏଠି ପ୍ରଶ୍ନ ଉଠୁଛି ଯେ ଜଣେ ଓଡ଼ିଆ ଭାଷା ଜାଣିଥିବା ଚାଷୀ ନିଜର ସମସ୍ତ ଦସ୍ତାବିଜ୍ ଓ ବ୍ୟକ୍ତିଗତ ପ୍ରମାଣ ପତ୍ର ଦାଖଲ କରିଥିଲେ ମଧ୍ୟ ନିର୍ବାଚନୀ ବାବଦରେ ଅନ୍ୟ ଦସ୍ତାବିଜ୍ ସମ୍ପର୍କରେ ତାଙ୍କୁ କାହିଁକି ସୂଚନା ପ୍ରଦାନ କରାଗଲା ନାହିଁ । ଅନ୍ୟ ଦସ୍ତାବିଜ୍ ସମ୍ବନ୍ଧୀୟ ତଥ୍ୟ ଇଂରାଜୀରେ ରହିବାବେଳେ ସେ ବିଷୟରେ ଚାଷୀଙ୍କୁ ଅବଗତ କରାଇବା ଦାୟିତ୍ବ କାହାର । ତେବେ ଦେଖିବାକୁ ବାକି ରହିଲା ଆମର ଏହି ନିରପେକ୍ଷ ଖବର ପ୍ରସାରଣ ଚାଷୀକୂଳକୁ କି ନ୍ୟାୟ ପ୍ରଦାନ କରୁଛି ।

ଢେଙ୍କାନାଳରୁ ଗୋପବନ୍ଧୁ ବାରିକ