ନଦୀ ଉପର ଦେଇ ବ୍ରିଜରେ ଯାଉଥିଲା ଟ୍ରେନ୍ । ସ୍ପାଇଡରମ୍ୟାନ୍ ଷ୍ଟାଇଲରେ ମୋବାଇଲ୍ ଚୋରି କଲା ଚୋର
ବ୍ରିଜ ଉପରେ ଜୁକ୍ ଜୁକ୍ ଶବ୍ଦ କରି ଚାଲିଥିଲା ଟ୍ରେନ୍ । ଜଣେ ଯୁବକ ଗେଟ୍ ପାଖରେ ବସି ନଦୀର ସୌନ୍ଦର୍ଯ୍ୟକୁ ନିଜ ମୋବାଇଲ ଫୋନରେ ଉତ୍ତୋଳନ କରୁଥିଲେ । ହଠାତ୍ ସେ ଆବାକ୍ ହୋଇ ପଡିଲେ । କିଛିକ୍ଷଣ ପରେ ତାଙ୍କୁ ଜଣାପଡିଥିଲା ଯେ ତାଙ୍କ ମୋବାଇଲ ଫୋନ୍ ଚୋରି ହୋଇଯାଇଛି । ଆଉ ସେତେବେଳେକୁ କିଛି ଶେଷ ନାହିଁ । ଏ ଦୃଶ୍ୟ ହେଉଛି ବିହାରର ବେଗୁସରାଇର ।
ଅନେକ ସମୟରେ ଚଳନ୍ତା ଟ୍ରେନରୁ ଚୋରି ଘଟଣା ବିଷୟରେ ଅଳ୍ପେ ବହୁତେ ଆପଣମାନେ ଅବଗତ ଥିବେ । ହେଲେ ପୂର୍ବ ପ୍ରସ୍ତୁତି କରି କୌଣସି ଚୋରୀ, ସେ ବି ସ୍ପାଇଡରମ୍ୟାନ ଷ୍ଟାଇଲରେ, ଏହି ଘଟଣା ଏବେ ସମଗ୍ର ଦେଶରେ ଚର୍ଚ୍ଚରା ବିଷୟ ପାଲଟିଛି ।
ତେବେ ଘଟଣାଟି କଣ ଜାଣେଇବା ପାଇଁ ପୁଣିଥରେ ଆମେ ଭିଡିଓକୁ ସ୍ଲୋ ମୋସନରେ ଦେଖାଉଛୁ । ଦେଖିଲେ ତ । ଗଙ୍ଗାନଦୀ ଉପର ଦେଇ ଯାଇଥିବା ରେଲୱେ ବ୍ରିଜରେ ମୁହଁରେ କପଡା ବାନ୍ଧି ଝୁଲି ରହିଛନ୍ତି ଜଣେ ବ୍ୟକ୍ତି । ଆଉ ସେହି ସମୟରେ ଉକ୍ତ ବ୍ରିଜ ଉପର ଦେଇ ଟ୍ରେନ ଯିବା ସମୟରେ ଜଣେ ଯାତ୍ରୀ ଗେଟ୍ ପାଖରେ ଭିଡିଓ ଉତ୍ତୋଳନ କରୁଥିବାବେଳ ସ୍ପାଇଡରମ୍ୟାନ୍ ଷ୍ଟାଇଲରେ ଚୋର ଯୁବକଙ୍କ ମୋବାଇଲ ଛଡାଇ ନେଇଥିଲା ।
ତେବେ ଜିଆରପି ପୋଲିସ ଚୋରକୁ ଧରିବା ପାଇଁ ଚେଷ୍ଟା କରିଥିଲେ ବି ବିଫଳ ହୋଇଥିଲେ । କାରଣ ଚୋର ଫୋନ୍ ଚୋରି କରି ନଦୀରେ ପହଁରି ପହଁରି କେଉଁଆଡେ ଚାଲିଯାଇଥିଲା । ଅପରପକ୍ଷେ ଚୋରିଟି ମୁହଁ ଢାଙ୍କିଥିବାରୁ ତାକୁ ଚିହ୍ନିବା ମଧ୍ୟ କଷ୍ଟସାଧ୍ୟ ଥିଲା ।
