ସସ୍ପେନ୍ସର ଅନ୍ତ ଘଟାଇ କଂଗ୍ରେସ ଘୋଷଣା କଲା ବ୍ରହ୍ମପୁର ପାଇଁ ମେୟର ପ୍ରାର୍ଥୀଙ୍କ ନାମ
ନାମାଙ୍କନର ଶେଷ ଦିନରେ କଂଗ୍ରେସ ତା’ର ବ୍ରହ୍ମପୁର ପାଇଁ ମେୟର ପ୍ରାର୍ଥୀଙ୍କ ନାଁ ଘୋଷଣା କରିଛି । ବ୍ରହ୍ମପୁର ମେୟର ପଦବୀ ପାଇଁ କଂଗ୍ରେସ ମଞ୍ଜୁ ରଥଙ୍କୁ ନିର୍ବାଚନୀ ମଇଦାନକୁ ଓହ୍ଲାଇଛି । ଚଳିତ ଥର ଜଣେ ଗୃହିଣୀଙ୍କ ଉପରେ ଭରସା ଦେଖାଇଛି କଂଗ୍ରେସ ।
ତେବେ ପୂର୍ବରୁ ବିଜେଡି ଓ ବିଜେପି ତାଙ୍କ ମେୟର ପ୍ରାର୍ଥୀ ଘୋଷଣା କରିସାରିଥିବାବେଳେ ସବୁ ସସ୍ପେନ୍ସର ଅନ୍ତ ଘଟାଇ ଶେଷ ଦିନରେ କଂଗ୍ରେସ ନିଜର ମେୟର ପ୍ରାର୍ଥୀଙ୍କ ନାମ ଘୋଷଣା କରିଛି । ବିଜେଡି ପକ୍ଷରୁ ସଙ୍ଘମିତ୍ରା ଦଳେଇ ଏବଂ ବିଜେପି ପକ୍ଷରୁ ସବିତା ସ୍ୱର ପାଣିଗ୍ରାହୀଙ୍କୁ ଦଳ ଟିକେଟ ଦେଇଛି ।
ଆସନ୍ତା ୨୪ ତାରିଖ ପୌର ନିର୍ବାଚନ ଲାଗି ମତଦାନ ହେବ । ରାଜ୍ୟର ୧୦୬ଟି ମ୍ୟୁନିସିପାଲିଟି ଓ ଏନ୍ଏସି ଏବଂ ୩ଟି ମହାନଗର ନିଗମ ଭୁବନେଶ୍ୱର,କଟକ ଓ ବ୍ରହ୍ମପୁର ପାଇଁ ହେବ ଭୋଟ୍ ଗ୍ରହଣ । ଏଥିପାଇଁ ମାର୍ଚ୍ଚ ୨ତାରିଖରୁ ନାମାଙ୍କନ ଦାଖଲ ପ୍ରକ୍ରିୟା ଆରମ୍ଭ ହୋଇଥିଲା ବେଳେ ଆଜି ଏହାର ସମୟ ସରୁଛି । ଆସନ୍ତା ୯ତାରିଖରେ ପ୍ରାର୍ଥୀପତ୍ର ଯାଞ୍ଚ ହେବ । ଏବଂ ଆସନ୍ତା ୧୪ତାରିଖ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାର ପାଇଁ ଦିନ ଧାର୍ଯ୍ୟ ହୋଇଛି । ୨୬ ତାରିଖରେ ଭୋଟ ଗଣତି ହେବ । ଏହାପରେ ଜଣାପଡ଼ିବ ପୌର ନିର୍ବାଚନରେ କିଏ ବାଜିମାତ୍ କରିବ ।
