ସୂତା ଖିଅରେ ଚାଲିଗଲା ଜୀବନ, ୬ ମାସର ସମ୍ପର୍କରେ ଲାଗିଲା କାହା ନଜର ?

ଗୁଡି ସୁତାରେ ଭାଙ୍ଗିଗଲା ହସଖୁସିର ସଂସାର । ସ୍ବାମୀ-ସ୍ତ୍ରୀ ହସଖୁସିରେ ମାର୍କେଟିଂ କରି ଫେରୁଥିବାବେଲେ ଘଟିଗଲା ଅଘଟଣ । ଗୁଡି ସୂତାରେ ବେକ କଟି ଯୁବକ ମୃତ । ଏଭଳି ଦୁଃଖଦ ଘଟଣା ଦେଖିବାକୁ ମିଳିଛି କଟକ ଜିଲ୍ଲାର ସାଲେପୁର ବ୍ଲକ ପୀରବଜାର ଅଞ୍ଚଳରେ । ଗୁଡ଼ି ସୂତାରେ ବେକ କଟି ଭଇରିପୁର ଅଞ୍ଚଳର ଜୟନ୍ତ ସାମଲଙ୍କ ମୃତ୍ୟୁ ହୋଇଛି । ମିଳିଥିବା ସୂଚନା ମୁତାବକ ଗତ ରବିବାର ଅପରାହ୍ନରେ ସ୍ବାମୀ ସ୍ତ୍ରୀ ବାଇକରେ ଯାଉଥିବା ସମୟରେ ହଠାତ୍ ଗାଡ଼ିରୁ ଯୁବକ ପଡ଼ିଯାଇଥିଲେ । ଏହି ସମୟରେ ଗୁଡ଼ି ସୂତା ଜୟନ୍ତଙ୍କ ବେକରେ ଲାଗି ଯାଇଥିଲା । ତେବେ ସୂତାଟି ଅତି ଧାରୁଆ ଥିବାରୁ ସେତିରେ ତାଙ୍କର ବେକ କଟିଯିବା ସହ ପ୍ରବଳ ରକ୍ତ ସ୍ରାବ ହୋଇଥିଲା । ଗୁରୁତର ଅବସ୍ଥାରେ ତାଙ୍କୁ ମେଡିକାଲକୁ ନିଆଯାଇଥିଲେ ସୁଦ୍ଧା ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ । ମୃତ ଯୁବକ ଚଳିତ ବର୍ଷ ଜୁନ୍ ୨୮ ତାରିଖରେ ବିବାହ କରିଥିବା ଜଣାପଡ଼ିଛି । ଅପରପକ୍ଷେ ବିବାହକୁ ବର୍ଷେ ନ ପୁରୁଣୁ ଅକାଳରେ ତାଙ୍କ ବିୟୋଗକୁ ପରିବାର ଲୋକେ ବିଶ୍ବାସ କରିପାରୁ ନଥିବାବେଳେ ସମ୍ପୃକ୍ତ ଅଞ୍ଚଳରେ ଶୋକର ଛାୟା ଖେଳିଯାଇଛି । ସେପଟେ ବେଆଇନ ଘୋଷିତ ମାଞ୍ଜା ସୂତା ବିକ୍ରି ଏବଂ ଯୁବକର ମୃତ୍ୟୁକୁ ନେଇ ଜଗତପୁର ଥାନାରେ ଏତଲା ଦେଇଛନ୍ତି ପରିବାର ଲୋକ । ପରିବାର ଲୋକେ ମାଞ୍ଜା ସୂତା ବିକ୍ରି କରୁଥିବା ଦୋକାନୀ ଏବଂ ଏହାକୁ ବ୍ୟବହାର କରୁଥିବା ଲୋକଙ୍କୁ ଗିରଫ କରିବା ନେଇ ଦାବି କରିଛନ୍ତି ।

ସାଲେପୁରରୁ ଅଭୟ ଜେନା