ଧନ୍ୟବାଦ ସରକାର ଏବଂ ସହାୟତା ପ୍ରଦାନକାରୀ… ଆଉ ଅଳ୍ପ ସହାୟତା ଲୋଡା …

ସଫଳ ଅସ୍ତ୍ରୋପଚାର ପରେ ଫୋନଯୋଗେ ଆମ ପ୍ରତିନିଧିଙ୍କୁ ଧନ୍ୟବାଦ ଜଣାଇଲେ ପୀଡିତଙ୍କ ପତ୍ନୀ । ନିଶ୍ଚିନ୍ତକୋଇଲି ବ୍ଲକ ମଣିଜଙ୍ଗ ପଞ୍ଚାୟତ ଅନ୍ତର୍ଗତ ଓଡ଼ଖଣ୍ଡ ଗାଁର ଜିତୁନ କୁମାର ଦାସ ଗତ ୨ବର୍ଷ ହେବ କିଡିନୀ ରୋଗରେ ପୀଡ଼ିତ ହୋଇ ଚିକତ୍ସାଧୀନ ଥିଲେ । ତାଙ୍କର ଦୁଇଟି କିଡିନୀ ଖରାପ ହୋଇଯାଇଥିବାବେଳେ କିଡନୀ ପ୍ରତ୍ୟାରୋପଣ ଲାଗି ତାଙ୍କ ପତ୍ନୀ ଜିତୁନଙ୍କୁ ଏକ କିଡନୀ ପ୍ରଦାନ କରିଥିଲେ । ତେବେ ଘରୋଇ ହସ୍ପିଟାଲରେ ଜିତୁନଙ୍କର ସଫଳ ଅସ୍ତ୍ରୋପଚାର ହୋଇଛି । ହେଲେ ଏବେ ପୁଣି ଜିତୁନ ଓ ପତ୍ନୀଙ୍କ ଚିକିତ୍ସା ଲାଗି ଅର୍ଥ ସାଜିଛି ବାଧକ । ପୂର୍ବରୁ ଜିତୁନ କିଡନୀ ରୋଗରେ ପୀଡିତ ହେବା ପରେ ସାହାୟତା ପାଇଁ ଆମେ ଏକ ଖବର ପ୍ରାସରଣ କରିଥିଲୁ । ସର୍ବପ୍ରଥମେ ଆମ ମାଧ୍ୟମରେ ଖବର ପ୍ରସାରଣ ଫଳରେ ଜିତୁନଙ୍କ ଚିକିତ୍ସା ଲାଗି ସହାୟତା ମିଳିଥିଲା । ଏ ନେଇ ଜିତୁନଙ୍କ ପତ୍ନୀ ଆମ ପ୍ରତିନିଧିଙ୍କୁ ଧନ୍ୟବାଦ ଦେବା ସହିତ ଆଉ କିଛି ସାହାଯ୍ୟ ସହଯୋଗ ମିଳିଲେ ଉଭୟ ପତିପତ୍ନୀ ସୁସ୍ଥ ହୋଇପାରିବେ ବୋଲି ସେ ଅନୁରୋଧ କରିଛନ୍ତି । ଏପଟେ ବାପା-ମାଙ୍କ ବାଟକୁ ଚାହିଁ ରହିଛନ୍ତି ଜିତୁନଙ୍କ ଦୁଇ ଛୁଆ ଏବଂ ବୃଦ୍ଧ ବାପା ମା ।

ଜିତୁନଙ୍କ ଚିକିତ୍ସା ପାଇଁ ଡାକ୍ତରଙ୍କ ଆକଳନ ଅନୁଯାୟୀ ୧୦ ରୁ ୧୨ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ପ୍ରକାଶ କରିଥିଲେ । ତେବେ ବିଭିନ୍ନ ସାମାଜିକ ସଂଗଠନ, କେନ୍ଦ୍ର ସରକାରଙ୍କ ରିଲିଫ ଫଣ୍ଡ, ସ୍ୱେଚ୍ଛାସେବୀ ସଗଠନ ଓ ବଦାନ୍ୟବ୍ୟକ୍ତି ଜିତୁନଙ୍କ ଚିକିତ୍ସା ପାଇଁ ଯାହା ସହଯୋଗ କରିଥିଲେ ସେଥିରେ ତାଙ୍କର ଅସ୍ତ୍ରୋପଚାର ଓ କିଡ଼ନୀ ପ୍ରତିରୋପଣ କରାଯାଇଛି । ମାତ୍ର ଏବେ ଉଭୟ ପତି ପତ୍ନୀଙ୍କ ଅଧିକ ଚିକିତ୍ସା ଓ ଆଶୁ ଆରୋଗ୍ୟ ନିମନ୍ତେ ଅଧିକ ଅର୍ଥର ଆବଶ୍ୟକତା ରହିଛି । ଏଣୁ ସରକାରୀ ତଥା ବେସରକାରୀ ଭାବେ ଆର୍ଥିକ ସହାୟତା ମିଳିଲେ ସେମାନେ ଉପକୃତ ହୋଇପାରନ୍ତେ ବୋଲି ନିବେଦନ କରିଛନ୍ତି ଜିତୁନଙ୍କ ପତ୍ନୀ ।

ସାଲେପୁରରୁ ଅଭୟ ଜେନା