ଅନ୍ଧାର ରାତ୍ରିରେ ଚାଲିଛି ରାସ୍ତା କାମ, ଦୁର୍ନୀତିର ନୂଆ ତରିକା…
ବ୍ୟାପକ ଅନିୟମିତତା ସହ ନିମ୍ନମାନର କାମ, ଅଭିଯୋଗ କଲେ ମିଳୁଛି ଧମକ
ଢେଙ୍କାନାଳ, (ଏଫ୍ଟୁଏସ୍/ ସୁଜିତ୍ କୁମାର ବେହେରା) : ବ୍ୟାପକ ଅନିୟମିତତା ଭିତରେ ଚାଲିଛି ରାସ୍ତାକାମ । କାର୍ଯ୍ୟସ୍ଥଳରେ ରହୁନାହାନ୍ତି ବିଭାଗୀୟ ଅଧିକାରୀ । ସେପଟେ କାମର ସଠିକ ତଦାରଖ ହେଉନଥିବାବେଳେ ସାଧାରଣ ଲୋକଟିଏ ପ୍ରତିବାଦ କଲେ ଦାଦାଗିରି କରି ଲୋକଙ୍କ ମୁହଁକୁ ଚୁପ କରିଦେଉଛି ଠିକା ସଂସ୍ଥା । ରାସ୍ତା ନିର୍ମାଣରେ ବ୍ୟବହୃତ ହେଉଥିବା ଢ଼ଳେଇରେ ମିଶାଯାଉଛି କମ୍ପାନୀ ପାଉଁଶ । ଏହାସହ ସିମେଣ୍ଟ ବାଲିର ମାନ ମଧ୍ୟ ଠିକ ରହୁନି । ଖାଲି ସେତିକି ନୁହେଁ, କିଏ କାଳେ ଦୋଷ ଦୁର୍ବଳତାକୁ ଧରିନେବ ସେଥିପାଇଁ ରାତି ଅଧିଆ ଚାଲୁଛି ରାସ୍ତା କାମ । ଏଭଳି ସଙ୍ଗୀନ ଅଭିଯୋଗ ଆସିଛି ଢେଙ୍କାନାଳ ଜିଲ୍ଲା ଓଡାପଡା ବ୍ଲକ ସଦାଶିବପୁର ଗ୍ରାମପଞ୍ଚାୟତରୁ । ପୁଣି ଅଭିଯୋଗ ଆଣିଛନ୍ତି ସଦାଶିବପୁର ଗ୍ରାମପଞ୍ଚାୟତର ସରପଞ୍ଚ ଧରିତ୍ରୀ ମଲ୍ଲିକ ।
ସୂଚନା ଥାଉକି, ଢେଙ୍କାନାଳ ଜିଲ୍ଲା ଝାରଗାଡ଼ିଆ ଛକଠାରୁ ପୂର୍ବତଟ ରେଳପଥ ସଦାଶିବପୁର ରେଳଷ୍ଟେସନ ଓ ବଉଳପୁର ସହ ସଂଯୋଗ କରୁଥିବା ରାସ୍ତା ସଂପ୍ରସାରଣ କାର୍ଯ୍ୟ ଜାରି ରହିଛି । ଏହି କାର୍ଯ୍ୟ ସମ୍ପୂର୍ଣ୍ଣ ଅନିୟମିତତା ଭିତରେ ହେଉଛି । ରାସ୍ତା ଯେତିକି ଚଉଡା ହେବ କଥା ତାହା ହେଉନାହିଁ । ବିନା ଭାଇବ୍ରେଟରରେ ହେଉଛି ରାସ୍ତା ନିର୍ମାଣ । ସର୍ବସାଧାରଣଙ୍କ କହିବା କଥା ହେଲା ରାସ୍ତାଟିର ଚଉଡା ଛ’ ମିଟର ହେବା କଥା କିନ୍ତୁ ତାହା ନହୋଇ ଜମା ପାଞ୍ଚ ମିଟର ହେଉଛି । କଂକ୍ରିଟରେ ଲୁହାଛଡ଼ ଦିଆଯିବା କଥା ତାହା ମଧ୍ୟ ଦିଆ ହେଉନଥିବା ନେଇ ଗଣମାଧ୍ୟମ ସାମ୍ନାରେ ପ୍ରକାଶ କରିଛନ୍ତି ସ୍ଥାନୀୟବାସୀ । ରାସ୍ତାରେ ବ୍ୟବହୃତ ହେଉଥିବା ଢ଼ଳେଇରେ କେତେବେଳେ କମ୍ପାନୀ ପାଉଁଶ ମିଶୁଛି ତ କେତେବେଳେ ଲିକ୍ୟୁଡ଼୍ । ଯାହା ଫଳରେ ରାସ୍ତାଟି ଖୁବୁ କମ ସମୟରେ ନଷ୍ଟ ହୋଇଯିବା ନେଇ ଚର୍ଚ୍ଚା ହେଉଛି । ରାଜ୍ୟ ସରକାର ଗ୍ରାମାଞ୍ଚଳରେ ଗମନା ଗମନକୁ ସୁଦୃଢ କରିବା ପାଇଁ ଅନେକ ଯୋଜନା ଆଣୁଛନ୍ତି ଏବଂ ଏ ନେଇ କୋଟି କୋଟି ଟଙ୍କାର ଅଟକଳ ମଧ୍ୟ ବ୍ୟୟ କରୁଛନ୍ତି । କିନ୍ତୁ ଗ୍ରାଉଣ୍ଡ ଜିରୋରେ କାର୍ଯ୍ୟ କେମିତି ଚାଲୁଛି, କାର୍ଯ୍ୟରେ ବ୍ୟବହାର ହେଉଥିବା ସାମଗ୍ରୀର ମାନ କେତେ ରହୁଛି, ତାହାର ସଠିକ ଯାଞ୍ଚ ଓ ତଦାରଖ ବିଭାଗୀୟ ଅଧିକାରୀ ମାନଙ୍କ ଦ୍ୱାରା ହେଉନି । ଯାହା ଫଳରେ ନିର୍ମାଣ ହେଉଥିବା ପ୍ରକଳ୍ପଟି ଜନ ହିତରେ ଦୀର୍ଘ ସମୟ ଯାଏଁ ନ ଆସି ଅଳ୍ପ କେଇ ମାସରେ ଭାଙ୍ଗି ନଷ୍ଟ ହେଇ ଯାଉଛି । ଏଣୁ ଏଦିଗରେ ଜିଲ୍ଲାସ୍ତରରେ ଉଚ୍ଚ ସ୍ତରୀୟ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ସଠିକ୍ ଭାବରେ କାର୍ଯ୍ୟ କରିବା ପାଇଁ ପଞ୍ଚାୟତ ସରପଞ୍ଚ ସମେତ ଅଞ୍ଚଳବାସୀ ଦାବି କରିଛନ୍ତି ।
