ଶିକ୍ଷା ବିଭାଗର ଦୃଷ୍ଟି ଆଢ଼ୁଆଳରେ ୧୦୭ ବର୍ଷର ପୁରାତନ ହିନ୍ଦୋଳ ସରକାରୀ ଉଚ୍ଚ ବିଦ୍ୟାଳୟ…

ନାହାନ୍ତି ନିୟମିତ ପ୍ରଧାନ ଶିକ୍ଷକ, ୫ ଜଣ ଶିକ୍ଷୟିତ୍ରୀ ଅନ୍ୟତ୍ର ଡେପୁଟେସନରେ
ଢେଙ୍କାନାଳ, (ଏଫ୍ଟୁଏସ୍/ ସୁଜିତ୍ କୁମାର ବେହେରା) : ଢେଙ୍କାନାଳ ଜିଲ୍ଲା ହିନ୍ଦୋଳ ଉପଖଣ୍ଡ ମହକୁମାରେ ୧୯୧୭ ମସିହାରେ ରାଜା ରାଜୁଡ଼ା ସମୟରେ ଗଢି ଉଠିଥିବା ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟଟି ଆଜି ୧୦୭ ବର୍ଷରେ ପଦାର୍ପଣ କରିଥିଲେ ହେଁ ନାନା ସମସ୍ୟା ମଧ୍ୟରେ ଗତି କରୁଛି । ପୂର୍ବ ସରକାରଙ୍କ ସମୟରେ ୫ଟି (ମୋ ସ୍କୁଲ) ଯୋଜନାରେ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମାଣ କାର୍ଯ୍ୟ କରାଯାଇ ଏହାର ସିରି ବୃଦ୍ଧି କରାଯାଇଥିଲେ ମଧ୍ୟ ଶିକ୍ଷାଦାନ କ୍ଷେତ୍ରରେ ନାନା ଅଭାବ ଅସୁବିଧା ଲାଗି ରହିଛି । ସରକାରଙ୍କ ଶିକ୍ଷା ବିଭାଗର ଦୃଷ୍ଟି ଆଢ଼ୁଆଳରେ ରହି ଯାଇଥିବାରୁ ଏଠାରେ ଏବେବି ଜଣେ ନିୟମିତ ପ୍ରଧାନ ଶିକ୍ଷକ ନିଯୁକ୍ତ ହୋଇ ପାରୁ ନଥିବା ବେଳେ ଅନେକ ଶିକ୍ଷକ ଶିକ୍ଷୟତ୍ରୀ ପଦ ଫାଙ୍କା ରହିଛି । ଯେଉଁ ଶିକ୍ଷୟିତ୍ରୀମାନେ କାର୍ଯ୍ୟରତ ସେମାନଙ୍କ ମଧ୍ୟରୁ କେତେକ ଡେପୁଟେସନରେ ନିଜ ନିଜ ସୁବିଧାରେ ଅନ୍ୟ ବିଦ୍ୟାଳୟରେ କାର୍ଯ୍ୟରତ ଥିବା ଜଣାପଡିଛି । ଏକ ସୂତ୍ରରୁ ମିଳିଥିବା ତଥ୍ୟ ଅନୁଯାଇ ଏଠାରେ ପ୍ରଥମରୁ ୧୦ ମ ଶ୍ରେଣୀ ପର୍ଯ୍ୟନ୍ତ ୧୪ ଜଣ ମହିଳା ଶିକ୍ଷୟିତ୍ରୀ କାର୍ଯ୍ୟରତ ଥିଲେ ହେଁ ତନ୍ମଧ୍ୟରୁ ୫ ଜଣ ଶିକ୍ଷୟିତ୍ରୀ ଅନ୍ୟତ୍ର ଡେପୁଟେସନରେ ଶିକ୍ଷାଦାନ କରୁଛନ୍ତି । ସେଥି ମଧ୍ୟରୁ ୩ ଜଣ ଶିକ୍ଷୟିତ୍ରୀ ସପ୍ତାହକୁ ୬ ଦିନ ଲେଖାଏଁ ଡେପୁଟେସନରେ କାର୍ଯ୍ୟ କରୁଥିବା ବେଳେ ଅନ୍ୟ ୨ ଜଣ ସପ୍ତାହକୁ ୩ ଦିନ ଲେଖାଏଁ ଅନ୍ୟ ସ୍କୁଲରେ ପାଠ ପଢାଉଛନ୍ତି । ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ସମୁଦାୟ ୬୧୯ ଜଣ ଛାତ୍ରଛାତ୍ରୀ ପାଠ ପଢୁଥିବା ବେଳେ ପ୍ରାଥମିକ ବିଦ୍ୟାଳୟସ୍ତରରେ ୪ ଜଣ ଶିକ୍ଷକ ଶିକ୍ଷୟିତ୍ରୀ ଶିକ୍ଷାଦାନ କରୁଛନ୍ତି । ଏବଂ ଉଚ୍ଚ ବିଦ୍ୟାଳୟସ୍ତରରେ ଦାୟିତ୍ୱରେ ଥିବା ପ୍ରଧାନ ଶିକ୍ଷକଙ୍କୁ ମିଶାଇ ୧୫ ଜଣ ଶିକ୍ଷକ ଶିକ୍ଷୟିତ୍ରୀ ଶିକ୍ଷାଦାନ କରୁଛନ୍ତି । ସେଥିମଧ୍ୟରୁ ୫ ଜଣ ଡେପୁଟେସନରେ ରହିଲେ ଶିକ୍ଷାଦାନର ମାନ କିଭଳି ହେଉଥିବ ସହଜରେ ବୁଝାପଡ଼ୁଛି ।

ସରକାରଙ୍କ ଶିକ୍ଷାନୀତି ଅନୁଯାୟୀ ବିଦ୍ୟାଳୟ ପରିସରରେ ଥିବା ପ୍ରାଥମିକ ବିଦ୍ୟାଳୟଟି ୨୦୧୮ ମସିହାରେ ହିନ୍ଦୋଳ ସରକାରୀ ଉଚ୍ଚ ବିଦ୍ୟାଳୟ ସହିତ ସାମିଲ ହୋଇ ଯାଇଥିଲା । ସେହିଭଳି ନିକଟରେ ଥିବା ପୁରାତନ ବାଳିକା ଉଚ୍ଚ ବିଦ୍ୟାଳୟଟି ୨୦୧୯ ମସିହାରେ ସରକାରୀ ଉଚ୍ଚ ବିଦ୍ୟାଳୟ ସହିତ ଏକାକାର ହୋଇ ଯାଇ ଥିଲା । ୨୦୨୩ ମସିହା ଜୁନ ଜୁଲାଇ ମାସରୁ ଜଣେ ବରିଷ୍ଠ ସହକାରୀ ଶିକ୍ଷକ ପ୍ରଧାନ ଶିକ୍ଷକ ଦାୟିତ୍ୱ ତୁଲାଉ ଥିବାବେଳେ ଏପର୍ଯ୍ୟନ୍ତ ଏହି ପୁରାତନ ବିଦ୍ୟାଳୟକୁ ବିଭାଗ ପକ୍ଷରୁ ଜଣେ ନିୟମିତ ପ୍ରଧାନ ଶିକ୍ଷକଙ୍କୁ ନିଯୁକ୍ତି ଦିଆ ଯାଇ ପାରି ନାହିଁ । ଫଳରେ ବିଦ୍ୟାଳୟର ଅନେକ ସରକାରୀ କାମଦାମରେ ଅସୁବିଧା ଉପୁଜୁଥିବା ଜଣାପଡ଼ିଛି । ପୂର୍ବରୁ ବାଳକମାନଙ୍କୁ ନେଇ ବିଦ୍ୟାଳୟର ଏନସିସି ଆଗକୁ ବଢ଼ିଥିବା ବେଳେ ଏବେ ୨୦୧୯ ମସିହା ପରେ ବାଳିକା ଉଚ୍ଚ ବିଦ୍ୟାଳୟର ସମ୍ମିଶ୍ରଣ ପରେ ଏନସିସିର ବାଳିକା ଟ୍ରୁପକୁ ନେଇ ସମ୍ଭାବନା କ୍ଷୀଣ ହେବାକୁ ଲାଗିଛି । ଏଥିପାଇଁ ବହୁ ଅଭିଭାବକ ଅସନ୍ତୋଷ ପ୍ରକଟ କରି ପ୍ରଧାନ ଶିକ୍ଷକଙ୍କଠାରୁ ଆରମ୍ଭ ଡିଇଓ, ହିନ୍ଦୋଳ ଉପଜିଲ୍ଲାପାଳ, ଜିଲ୍ଲାପାଳ, ସ୍ଥାନୀୟ ବିଧାୟିକା, ଶିକ୍ଷାମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ନିକଟକୁ ଅଭିଯୋଗ ପତ୍ର ପଠାଇଥିବା ଜଣାପଡିଛି ।

ଅଭିଯୋଗ ମୁତାବକ ଦାୟିତ୍ୱରେ ଥିବା ଶିକ୍ଷୟତ୍ରୀ ଜଣଙ୍କ ଏ ନେଇ ନିଜର ଅନିଚ୍ଛା ପ୍ରକାଶ କରିବା ସହ କୁଆଡେ ତିନି ଦିନିଆ ଡେପୁଟେସନରେ ଅନ୍ୟ ବିଦ୍ୟାଳୟରେ କାର୍ଯ୍ୟରତ । ଅଭିଯୋଗ ପରେ ପ୍ରଧାନ ଶିକ୍ଷକ ପିଟିଏ ବୈଠକ ଡକାଇ ଅନ୍ୟ ଶିକ୍ଷୟିତ୍ରୀଙ୍କୁ ବାଳିକା ଏନସିସି ଦାୟିତ୍ୱ ନେବାକୁ ପରାମର୍ଶ ଲୋଡ଼ିଥିଲେ ହେଁ କେହି ରାଜି ହେଉ ନଥିବା ଶୁଣା ଯାଉଛି । ଫଳରେ ସ୍କୁଲରେ ବାଳିକା ଏନସିସି ତିଷ୍ଠି ରହିବାରେ ଆଶଙ୍କା ଦେଖାଦେଇଛି । ବିଦ୍ୟାଳୟ ପରିସର ସଫା ସୁତୁରା ରଖିବା, ଫୁଲ ବଗିଚାରେ ଦାୟିତ୍ୱ ନେଇ ପାଣି ସିଞ୍ଚନ କରିବା ପାଇଁ ଜଣେ ଝାଡୁଦାର ଓ ମାଳିର ଆବଶ୍ୟକତା ଥିଲେ ହେଁ ତାହା ପୂରଣ ହୋଇ ପାରୁ ନାହିଁ । ସେହିଭଳି ପିଲାମାନଙ୍କ ପାଇଁ ଉଦ୍ଦିଷ୍ଟ ସାଇକେଲ ଷ୍ଟାଣ୍ଡ ପର୍ଯ୍ୟପ୍ତ ହେଉ ନଥିବାରୁ ଖରା ବର୍ଷା ଶୀତରେ ଅନେକ ପିଲା ବାହାରେ ସାଇକେଲ ରଖୁଥିବା ଦେଖାଯାଉଛି । ମୋଟାମୋଟି ବିଦ୍ୟାଳୟଟି ସମସ୍ୟା ମଧ୍ୟରେ ଗତି କରୁଥିବା ବେଳେ ବିଭାଗୀୟ ସୁଦୃଷ୍ଟି ପଡୁ ନଥିବାରୁ ଅବହେଳିତ ହୋଇରହିଛି ।