ବେସାହାରା ବିଶ୍ୱ… ଓଳିଏ ଖାଇଲେ ଓଳିଏ ଉପାସ, କିଏ ବୁଝିବ ଦୁଃଖ ?

ଖୋର୍ଦ୍ଧା, (ଏଫ୍ଟୁଏସ୍/ ପ୍ରସନ୍ନ କୁମାର ସ୍ୱାଇଁ) : ପିଲାମାନଙ୍କ ହାତ ଧରି ଅନ୍ଧାରରୁ ଆଲୋକ ଆଡକୁ ବାଟ ଦେଖାନ୍ତି ବାପା-ମାଆ । ଆଉ ସେମାନଙ୍କର କୁନି ଭବିଷ୍ୟତକୁ ନିଜ ହାତରେ ଗଢି ଦିଅନ୍ତି । ଆଉ ଯେତେବେଳେ ସେଇ ଆତ୍ମସ୍ପର୍ଶୀ ହାତ କୁଆଡେ ଉଭେଇଯାଏ, ସେତେବେଳେ ପିଲାର ଭବିଷ୍ୟତ ମଧ୍ୟ ଅନ୍ଧକାର ଭିତରକୁ ଠେସି ହେଇଯାଏ । ଏହି କାହାଣୀ ହେଉଛି ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ୍ ଅସରଳା ପଞ୍ଚାୟତ ପୁଆଣିଆ ଗ୍ରାମର ବିଶ୍ୱ ରଂଜନ ପ୍ରଧାନଙ୍କର । ବୟସ ମାତ୍ର ୧୫ ବର୍ଷ । ତାଙ୍କୁ ଯେତେବେଳେ ୯ ବର୍ଷ ହୋଇଥିଲା, ସେତେବେଳେ ବାପା ଅଫେରା ରାଇଜକୁ ଚାଲିଗଲେ । ସ୍ୱାମୀକୁ ହରାଇବା ପରେ ସ୍ତ୍ରୀ ନିଜ ଜୀବନ ପାଇଁ ଆଉ କାହା ହାତ ଧରି ଚାଲିଗଲେ । ଆଉ ସମାଜରେ ଏକାକୀ ବଂଚିବା ପାଇଁ ଛାଡିଦେଇଗଲେ ସେଇ ୯ ବର୍ଷର ପୁଅକୁ । ଯେଉଁ ବୟସରେ ବିଶ୍ୱ ରଂଜନ ସାଙ୍ଗ ସାଥୀଙ୍କ ସହ ଖେଳକୁଦ କରି ପାଠ ପଢିବା କଥା, ସେହି ବୟସରେ ସେ ଶିଖିଯାଇଥିଲା ସଂଘର୍ଷ । ଭଗବାନଙ୍କୁ ଭରସା କରି ମୁଣ୍ଡଝାଳ ତୁଣ୍ଡରେ ମାରି ପେଟ ପାଇଁ ସଂଘର୍ଷ କରୁଥିଲା । ହେଲେ ଦଇବ ସେତକ ବି ସହିଲାନି ।

ଶିଶୁ ସୁରକ୍ଷା ଆଇନ କଡାକଡି ହେବା ପରେ ଯିଏ ସାହାରା ଦେଇଥିଲା ସିଏ ଏବେ ତାଙ୍କ ଦୋକାନକୁ ବିଶ୍ୱଙ୍କୁ ନ ଆସିବାକୁ ବାରଣ କରିଛନ୍ତି । ବିଶ୍ୱଙ୍କ ମୁଣ୍ଡ ଉପରୁ ଉଠିଯାଇଥିଲା ବାପାର ହାତ ସାଙ୍ଗକୁ ମାଆର ପଣତକାନି । ଏବେ ବୃଦ୍ଧ ଅଜା ତାଙ୍କର ସାହା ଭରସା । ଏଭଳି ସ୍ଥଳେ ଖାଇବେ କ’ଣ ଏବଂ କରିବେ କ’ଣ ତାକୁ ନେଇ ପ୍ରଶ୍ନ । ଭାପୁର ବ୍ଲକ କରଡାପଲ୍ଲୀ ଗ୍ରାମର ଅନ୍ତର୍ଯ୍ୟାମୀ ବରାଡ଼ ନାତି ବିଶ୍ୱରଂଜନକୁ ପାଖରେ ନେଇ ରଖିଥିଲେ । ଏବେ ଅନ୍ତର୍ଯ୍ୟାମୀ ବୃଦ୍ଧାଅବସ୍ଥାରେ ଥିବା ହେତୁ ସଂସାର ଚଳେଇବା ତାଙ୍କ ପକ୍ଷେ କଷ୍ଟସାଧ୍ୟ । ଦିନେ ଖାଇଲେ ଦୁଇ ଦିନ ଉପବାସ ରହିବାକୁ ପଡୁଛି । ସେପଟେ ବିଶ୍ୱରଂଜନଙ୍କ ନବମ ଶ୍ରେଣୀରୁ ପାଠପଢ଼ାରୁ ଡୋରି ବାନ୍ଧିଛି । ସରକାରୀ ସହାୟତା ନିମନ୍ତେ ଆକୁଳ ନିବେଦନ କରୁଛନ୍ତି ବିଶ୍ୱ । ଖବର ଜଣାପଡିବା ପରେ ବ୍ଲକ ପ୍ରଶାସନିକ ଅଧିକାରୀ ତୁରନ୍ତ ଏ ଦିଗରେ ପଦକ୍ଷେପ ନେଇ ବିଶ୍ୱ ରଂଜନଙ୍କୁ ଆର୍ଥôକ ସହାୟତା ପ୍ରଦାନ କରିବା ସହ ରହିବା ପାଇଁ ଏକ ପକ୍କା ଘର ଯୋଗାଇଦେବା ପାଇଁ ନିବେଦନ କରିଛନ୍ତି ସ୍ଥାନୀୟ ଗ୍ରାମବାସୀ ।