ସ୍ବର୍ଣ୍ଣ ଲକ୍ଷ୍ୟରେ ଗୋଲ୍ଡେନ ବଏ ନୀରଜ, ନିରାଶ କଲେ ଓଡିଆ ଆଥଲେଟ୍ କିଶୋର…
ପ୍ୟାରିସ୍ ଅଲିମ୍ପିକ୍ସରେ କମାଲ କରିଛନ୍ତି ଗୋଲ୍ଡେନ ବଏ ନୀରଜ ଚୋପ୍ରା । ପ୍ରଥମ ପ୍ରୟାସରେ ୮୯.୩୪ ମିଟର ଦୂରତାକୁ ଜାଭେଲିନ ଫିଙ୍ଗି ଫାଇନାଲରେ ପହଞ୍ଚିଯାଇଛନ୍ତି ନୀରଜ । ଆସନ୍ତକାଲି ଜାଭେଲିନ୍ ଫାଇନାଲ୍ ଅନୁଷ୍ଠିତ ହେବ । ଏଥିରେ ନୀରଜ ପୁଣି ଏକ ସ୍ୱର୍ଣ୍ଣ ପଦକ ଜିତିବେ ବୋଲି ଆଶାବାଦୀ ଅଛନ୍ତି ଭାରତୀୟ । ଚଳିତ ସିଜିନରେ ନୀରଜଙ୍କର ଏହା ଶ୍ରେଷ୍ଠ ପ୍ରଦର୍ଶନ । ଏହା ପୂର୍ବରୁ ନୀରଜ ଚଳିତ ବର୍ଷ ୮୮. ୩୬ ମିଟର ଥ୍ରୋ’ କରିଥିଲେ । ଟୋକିଓ ଅଲିମ୍ପିକ୍ସରେ ନୀରଜ ୮୭ .୫୮ ମିଟର ଥ୍ରୋ’ କରି ସ୍ୱର୍ଣ୍ଣ ପଦକ ଜିତିଥିଲେ । ସେପଟେ ଦେଶର ଅନ୍ୟତମ ଷ୍ଟାର ତଥା ଓଡିଆ ଆଥଲେଟ୍ କିଶୋର ଜେନା ଯୋଗ୍ୟତା ପର୍ଯ୍ୟାୟ ଗ୍ରୁପ ଏ’ରୁ ନିରାଶ କରିଛନ୍ତି । ଗ୍ରୁପ୍-ଏ’ରେ କିଶୋର ୮୦. ୭୩ ମିଟର୍ ଥ୍ରୋ’ କରି ନବମ ସ୍ଥାନରେ ରହିଛନ୍ତି ।
ଅପରପକ୍ଷେ ପ୍ୟାରିସ ଅଲିମ୍ପିକ୍ସ ପୁରୁଷ ହକିରେ ଭାରତକୁ ନିରାଶ ହେବାକୁ ପଡିଛି । ଗତକାଲି ଜର୍ମାନୀ ବିପକ୍ଷ ମ୍ୟାଚରେ ଲଢେଈ କରି ୩-୨ ଗୋଲରେ ହାରିଛି ଭାରତ । ଫଳରେ ଟୋକିଓ ଅଲିମ୍ପିକ୍ସରେ କାଂସ୍ୟ ପଦକ ଜିତିଥିବା ଭାରତୀୟ ଟିମ୍ ଏଥର ବି କାଂସ୍ୟ ପଦକ ପାଇଁ ଖେଳିବ । ଆସନ୍ତାକାଲି ସ୍ପେନ- ଭାରତ ମଧ୍ୟରେ କାଂସ୍ୟ ପଦକ ପାଇଁ ଲଢେଇ ହେବ ।
