ମହାଦେବଙ୍କୁ କରିପାରିଲେନି ଦର୍ଶନ, ହାତରେ ବାହୁଙ୍ଗି ଧରି ଅନ୍ତିମ ଯାତ୍ରାରେ ଭକ୍ତ…

ସାଲେପୁର, (ଏଫ୍ ଟୁ ଏସ୍ /ଅଭୟ ଜେନା) : ଶ୍ରାବଣ ମାସ ଦ୍ୱିତୀୟ ସୋମବାରରେ ମହାଦେବଙ୍କୁ ଜଲଲାଗି କରିବାକୁ ଘରୁ ବାହାରିଥିଲେ ଭକ୍ତ । ହେଲେ ଜାଣି ନ ଥିଲେ ମହାଦେବଙ୍କ ନିକଟରେ ପହଞ୍ଚିବା ପୂର୍ବରୁ ଘଟିଯିବ ଅଘଟଣ । ରବିବାର ବିଳମ୍ବିତ ରାତିରେ କଟକ-ଚାନ୍ଦବାଲି ରାସ୍ତା ନିଶ୍ଚିନ୍ତକୋଇଲି ତହସିଲ ଅଫିସ ଛକରେ ଏକ କାର କାଉଡିଆମାନଙ୍କ ଉପରେ ମାଡିଯିବାରୁ ଦୁଇ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ଏହାସହ ତିନି ଜଣ ଗୁରୁତରଙ୍କୁ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି l ଘଟଣାରୁ ପ୍ରକାଶ, ଜିଗୀନପୁର ବସୁପଦା ଗ୍ରାମର ୩୭ ଜଣ କାଉଡିଆ ଭକ୍ତ ପାଣି ଉଠାଇ ନିଜ ଗ୍ରାମର ସିଦ୍ଧେଶ୍ୱର ମହାଦେବଙ୍କ ପାଖରେ ଜଳ ଲାଗି କରିବା ପାଇଁ ଯାଉଥିଲେ । ନିଶ୍ଚିନ୍ତକୋଇଲି ତହସିଲ ଛକ ରାସ୍ତା ଦେଇ କାଉଡିଆ ଭକ୍ତମାନେ ଯିବା ସମୟରେ ପଛରୁ ଦ୍ରୁତ ଗତିରେ ଆସୁଥିବା ଏକ କାର ସେମାନଙ୍କୁ ଧକ୍କା ଦେଇଥିଲା ।

ଘଟଣା ଘଟିବା ପରେ ପ୍ରଥମେ ପୋଲିସ ସହାୟତାରେ ଗୁରୁତରଙ୍କୁ ନିଶ୍ଚିନ୍ତକୋଇଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଛି l ଖବର ପାଇ ପରିବାରଠାରୁ ଆରମ୍ଭ କରି ଗ୍ରାମ ଲୋକଙ୍କ ପର୍ଯ୍ୟନ୍ତ ଭିଡ଼ ଲାଗିବା ସହ ଶୋକାକୁଳ ପରିବେଶ ସୁଷ୍ଟି ହୋଇଛି l ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି ।