ବେଗୁନିଆପଡ଼ାରେ ମାଣ୍ଡିଆ ଚାଷୀଙ୍କ ଅସନ୍ତୋଷ, ଏଯାଏଁ ମିଳିନି ବିହନ…

ଗଞ୍ଜାମ, (ଏଫ୍ ଟୁ ଏସ୍/ବାପୁନି କୁମାର ମାଲୁ) : ଗଞ୍ଜାମ ଜିଲ୍ଲା ବେଗୁନିଆପଡ଼ା ବ୍ଳକରେ ଚାଷୀମାନଙ୍କୁ ମାଣ୍ଡିଆ ବିହନ ଦିଆଯାଉ ନ ଥିବା ଅଭିଯୋଗ ହୋଇଛି । ନିର୍ଦ୍ଧାରିତ ସମୟରେ ଯଦିଓ କୃଷି କାର୍ଯ୍ୟାଳୟରେ ମାଣ୍ଡିଆ ବିହନ ପହଞ୍ଚି ସାରିଛି, କିନ୍ତୁ ଏଯାଏଁ ମାଣ୍ଡିଆ ବିହନ ଚାଷୀଙ୍କୁ ଯୋଗାଇ ଦିଆଯାଇନାହିଁ । ଯାହାକୁ ନେଇ ବ୍ଲକର ବିଭିନ୍ନ ପଞ୍ଚାୟତରୁ ଚାଷୀ ଅସନ୍ତୋଷ ଦେଖିବାକୁ ମିଳୁଛି । ଖାଦ୍ୟରେ ପୋଷଣ ଥିବା କ୍ଷୁଦ୍ର ଖାଦ୍ୟ ଶସ୍ୟ ଗୁଡ଼ିକର ବ୍ୟବହାର ପାଇଁ ସରକାର କହୁଛନ୍ତି । ମାତ୍ର ଏହାକୁ ଆବଶ୍ୟକ ପ୍ରୋତ୍ସାହନ ଦିଆ ଯାଉନଥିବା ପରିଲକ୍ଷିତ ହେଉଛି । ମାଣ୍ଡିଆ ପୂର୍ବରୁ ଗରିବ ଲୋକଙ୍କର ପ୍ରଧାନ ଖାଦ୍ୟ ଥିଲା । ହେଲେ ଏବେ ଏହାକୁ ବଡ଼ ବଡିଆମାନେ ଜଳଖିଆରେ ବ୍ୟବହାର କରୁଛନ୍ତି । ବହୁ ଲୋକଙ୍କର ପ୍ରିୟ ଖାଦ୍ୟ ହୋଇଛି ମାଣ୍ଡିଆ । ତଥାପି ଏହାର ଚାଷ କମି କମି ଯାଉଛି । ସଠିକ୍ ସମୟରେ ଚାଷୀଙ୍କୁ ବିହନ ଯୋଗାଇ ଦିଆଯାଉ ନ ଥିବାରୁ ଚାଷ ପ୍ରତି ମୁହଁ ଫେରାଉଛନ୍ତି ଚାଷୀ । ଅପରପକ୍ଷେ ବେଗୁନିଆପଡ଼ା ବ୍ଳକର ନିର୍ଦ୍ଧିଷ୍ଟ କିଛି ପଞ୍ଚାୟତର ଚାଷୀଙ୍କୁ ବିହନ ଦିଆଯିବ ବୋଲି ଶୁଣିବାକୁ ମିଳୁଛି । ଏହି ବିହନ ୪ଟି ପଞ୍ଚାୟତର ହିତାଧିକାରୀଙ୍କୁ ଦିଆଯିବ ବୋଲି କୁହାଯାଉଥିବାବେଳେ ଏପର୍ଯ୍ୟନ୍ତ ହିତାଧିକାରୀ ଚୟନ କରାଯାଇ ନାହିଁ ବୋଲି କହିଛନ୍ତି ବେଗୁନିଆପଡ଼ା ବ୍ଳକ କୃଷି ଅଧିକାରୀ ରାମଲାଲ ସାମଦ । ଖୁବ୍ ଶୀଘ୍ର ହିତାଧିକାରୀ ଚୟନ କରାଯିବ ବୋଲି ସେ କହିଛନ୍ତି । ସେପଟେ ମାଣ୍ଡିଆ ବିହନ ହିତାଧିକାରୀଙ୍କୁ ନେଇ ବିଜେଡି – ବିଜେପି ଟଣାଓଟରା ତଥା ରାଜନୈତିକ ଅଭିସନ୍ଧି ରହିଥିବା ମଧ୍ୟ ଚର୍ଚ୍ଚା ହେଉଛି ।