ଦୀର୍ଘ ୫ ବର୍ଷର ଲଢେଇ, ଶେଷରେ ନିଜ ହକ୍ ପାଇଲେ ଅନୁଶ୍ରବ…
ଗଜପତି, (ଏଫ୍ ଟୁ ଏସ୍ /ବିବେକାନନ୍ଦ ବେହେରା) : ଦୀର୍ଘ ୫ ବର୍ଷର ସଂଘର୍ଷ । ଶେଷରେ ସଫଳତା ହାସଲ କଲେ ପାରଳାଖେମୁଣ୍ଡି ବେବର୍ତ୍ତା ସାହିର ବିଜୟାନନ୍ଦ ଗନ୍ତାଏତଙ୍କ ସୁଯୋଗ୍ୟ ପୁତ୍ର ଅନୁଶ୍ରବ ଗନ୍ତାଏତ । ଦୀର୍ଘ ୫ ବର୍ଷର ଦୃଢ ସଂଗ୍ରାମ ପରେ ସେ ଏହି କୃତିତ୍ୱ ହାସଲ କରିପାରିଛନ୍ତି । ନିଟ୍ ରାଉରକେଲାରୁ ପାଠ୍ୟକ୍ରମ ଶେଷ କରିବା ପରେ ଅନୁଶ୍ରବ ୨୦୧୭-୧୮ ଓପିଏସସି ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ । ଲିଖିତ ଓ ମୌଖିକ ପରୀକ୍ଷାରେ ମୋଟ ୧୩୬୫ ମାର୍କ ରଖିଥିଲେ ସେ । କିନ୍ତୁ ଦୁର୍ଭାଗ୍ୟର ବିଷୟ ତାଙ୍କଠାରୁ କମ୍ ମାର୍କ ରଖିଥିବା (୧୩୦୨-୧୦୬୫) ପ୍ରାର୍ଥୀ ମାନଙ୍କୁ ଚୟନ କରାଯାଇଥିଲା । ଏଥିରେ ସେ ମର୍ମାହତ ହୋଇ ରାଜ୍ୟପାଳ, ମୁଖ୍ୟମନ୍ତ୍ରୀ, ମୁଖ୍ୟ ସଚିବ ତଥା ରାଜ୍ୟ ପ୍ରଶାସନ ଟ୍ରିବ୍ୟୁନାଲଙ୍କ ଦ୍ୱାରସ୍ତ ହୋଇଥିଲେ । କିନ୍ତୁ ସେଥିରେ ବିଫଳ ହେବାରୁ ଉଚ୍ଚ ନ୍ୟାୟାଳୟଙ୍କଠାରେ ନ୍ୟାୟ ପାଇଁ ଲଢାଇ ଜାରି ରଖିଲେ ।
ଶେଷରେ ନ୍ୟାୟାଳୟଙ୍କ ବିଚାର ତାଙ୍କରି ନିଷ୍ଠାକୁ ସମ୍ମାନ ଜଣାଇ ରାଜ୍ୟ ସରକାରଙ୍କଠାରୁ ଯୋଗ୍ୟତା ଭିତ୍ତିକ ସମ୍ପୂର୍ଣ୍ଣ ବିବରଣୀ ମାଗିଥିଲେ । ଏହି ବିବରଣୀ ଉପରେ ନ୍ୟାୟାଳୟ ୫୬ ପୃଷ୍ଠା ସମ୍ୱଳିତ ନିଜର ଶୁଣାଣି କରିଥିଲେ । ଏଥିରେ ଜୁନ୍ ୨୦୧୯ ଯୋଗ୍ୟତା ଲିଷ୍ଟରେ ମାନ୍ୟବର କୋର୍ଟ ଅନୁଶ୍ରବଙ୍କୁ ପ୍ରଥମ ଶ୍ରେଣୀ ଜୁନିୟର କ୍ୟାଡରରେ ଅବସ୍ଥାପିତ କରିବାକୁ ନିର୍ଦ୍ଦେଶ ଦେଇଛନ୍ତି । ତତ୍ ସହିତ ଯେଉଁମାନେ ତାଙ୍କଠାରୁ କମ୍ ମାର୍କ ରଖି ଉଚ୍ଚ ପଦବୀ ପାଇଛନ୍ତି, ଅନୁଶ୍ରବଙ୍କୁ ସେହିସବୁ ସୁବିଧା ଦେବାକୁ ମାନ୍ୟବର ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି । ଏବଂ ଏହାକୁ ୩୧ ମାର୍ଚ୍ଚରେ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି । ମାନ୍ୟବର ଅଦାଲତଙ୍କ ଶୁଣାଣୀ ଭିତ୍ତିରେ ଅନୁଶ୍ରବ ୨୫ ଜୁଲାଇ ୨୦୨୪ ତାରିଖରେ ପୁରୀ ଜିଲ୍ଲାପାଳଙ୍କ ଅଧିନରେ ନିଯୁକ୍ତି ପାଇଛନ୍ତି । ତାଙ୍କରି ଏହି ବିରଳ କୃତିତ୍ୱ ପାଇଁ ପାରଳାଖେମୁଣ୍ଡିରେ ଚାରିଆଡୁ ଶୁଭେଚ୍ଛାର ସୁଅ ଛୁଟିଛି ।
