ଟ୍ରମ୍ପଙ୍କ ଉପରକୁ ଗୁଳିମାଡ କରିଥିବା ବ୍ୟକ୍ତି ହେଲା ଥୋମାସ୍ ମାଥ୍ୟୁ କ୍ରୁକ୍ସ…
ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରକୁ ଗୁଳିମାଡ କରିଥିବା ବ୍ୟକ୍ତି ଜଣକ ହେଲା ଥୋମାସ୍ ମାଥ୍ୟୁ କ୍ରୁକ୍ସ । ଏ ନେଇ ସୂଚନା ଦେଇଛି ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ । ପେନସିଲଭେନିଆର ବଟଲରରେ ଶନିବାର ନିର୍ବାଚନ ପ୍ରଚାର କରୁଥିବା ବେଳେ ୭୮ ବର୍ଷିୟ ରିପବ୍ଲିକାନ୍ ରାଷ୍ଟ୍ରପତି ପ୍ରାର୍ଥୀ ଟ୍ରମ୍ପଙ୍କ ଉପରକୁ ଗୁଳି ଚଳାଇଥିଲା ୨୦ ବର୍ଷିୟ କ୍ରୁକ୍ସ । ଘଟଣାସ୍ଥଳରେ ସୁରକ୍ଷା କର୍ମୀଙ୍କ ଗୁଳିମାଡରେ ନିହତ ହୋଇଥିଲା କ୍ରୁକ୍ସ ।
ସେପଟେ ଟ୍ରମ୍ପ କହିଛନ୍ତି ଯେ, “ଏକ ଗୁଳି ମୋର ଡାହାଣ କାନର ଉପର ଅଂଶକୁ ବିଦ୍ଧ କରିଥିଲା ।” ଆଇନ ଶୃଙ୍ଖଳା ଅଧିକାରୀମାନେ ପୂର୍ବରୁ ଗଣମାଧ୍ୟମକୁ କହିଥିଲେ ଯେ, ସେମାନେ ସନ୍ଦିଗ୍ଧ ସୁଟରକୁ ଚିହ୍ନଟ କରିଛନ୍ତି, ମାତ୍ର ସର୍ବସାଧାରଣରେ ଅଗବତ କରିନଥିଲେ । ସେମାନେ ଏହା ମଧ୍ୟ କହିଛନ୍ତି ଯେ ସେମାନେ ଏପର୍ଯ୍ୟନ୍ତ ଏହାର ଉଦ୍ଦେଶ୍ୟ ଚିହ୍ନଟ କରିନାହାଁନ୍ତି ।
ଏଫ୍.ବି.ଆଇ କହିଛି ଯେ, ପୂର୍ବତନ ରାଷ୍ଟ୍ରପତିଙ୍କ ଉପରକୁ ହୋଇଥିବା ଏହି ଗୁଳିମାଡକୁ “ହତ୍ୟା ଉଦ୍ୟମ” ଭାବେ ଗ୍ରହଣ କରାଯାଉଛି । ଗୁରୁତ୍ବପୂର୍ଣ୍ଣ କଥା ହେଲା, ରାଷ୍ଟ୍ରପତି ନିର୍ବାଚନକୁ ଚାରି ମାସ ଥିବାବେଳେ ଏଭଳି ଘଟଣା ଘଟିଛି । ସୂଚନା ଅନୁସାରେ, ନଭେମ୍ବର ୫ ରେ ରିପବ୍ଲିକାନ ପାର୍ଟି ପ୍ରାର୍ଥୀ ଟ୍ରମ୍ପ ଏବଂ ଡେମୋକ୍ରେଟିକ୍ ପ୍ରାର୍ଥୀ ଜୋ ବାଇଡେନଙ୍କ ମଧ୍ୟରେ ଲଢେଇ ହେବାକୁ ଯାଉଛି ।
