କଟକର ଘରୋଇ ନର୍ସିଂହୋମରେ ଅଗ୍ନିକାଣ୍ଡ…
କଟକର ଘରୋଇ ନର୍ସିଂହୋମରେ ଅଗ୍ନିକାଣ୍ଡ । ପୁରୀଘାଟ ଥାନା ନିକଟ ନର୍ସିଂହୋମରେ ନିଆଁ । ନର୍ସିଂହୋମର ତୃତୀୟ ମହଲାରେ ନିଆଁ ଲାଗିଛି । ବିଦ୍ୟୁତ୍ ସର୍ଟସର୍କିଟ୍ ଯୋଗୁଁ ନିଆଁ ଲାଗିଥିବା ଅନୁମାନ କରାଯାଉଛି । ଉଦ୍ଧାର ରୋଗୀଙ୍କୁ ଅନ୍ୟତ୍ର ସ୍ଥାନାନ୍ତର କରୁଛନ୍ତି ଅଗ୍ନିଶମ ବାହିନୀ । କଟକ ପୁରୀଘାଟ ନିକଟ ରାଧାରମଣ ନର୍ସିଂହୋମରେ ନିଆଁ । ନର୍ସିଂହୋମର ତୃତୀୟ ମହଲାରେ ରହିଛି ଆଇସିୟୁ । ୧୦ରୁ ଅଧିକ ଗୁରୁତର ରୋଗୀ ଆଇସିୟୁରେ ଚିକିତ୍ସିତ ହେଉଥିଲେ । ଏହାଛଡ଼ା ସାଧାରଣ ବେଡ୍ରେ ମଧ୍ୟ ବହୁ ରୋଗୀ ଚିକିତ୍ସିତ ହେଉଥିଲେ । ତେବେ ଆଜି ଅପରାହ୍ନରେ ହଠାତ୍ ଆଇସିୟୁରେ ବିଦ୍ୟୁତ୍ ସର୍ଟସର୍କିଟ୍ ଯୋଗୁଁ ନିଆଁ ଲାଗି ଯାଇଥିଲା । ଖବରପାଇ ଘଟଣା ସ୍ଥଳରେ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଫାୟାର ଲିଫ୍ଟ ମାଧ୍ୟମରେ ଆଇସିୟୁରେ ଭର୍ତ୍ତି ହୋଇଥିବା ଗୁରୁତର ରୋଗୀଙ୍କୁ ମଧ୍ୟ ଉଦ୍ଧାର କରାଯାଉଛି । ଘଟଣାସ୍ଥଳରେ କଟକ ବାରବାଟୀର ପୂର୍ବତନ ବିଧାୟକ ମହମ୍ମଦ ମୋକିମ୍ ପହଞ୍ଚି ସ୍ୱାସ୍ଥ୍ୟ ବିଭାଗ ଏଥି ପ୍ରତି ଦୃଷ୍ଟି ଦେବାକୁ ଦାବି କରିଛନ୍ତି ।
କିଛି ପ୍ରତ୍ୟେକ୍ଷଦର୍ଶୀଙ୍କ କହିବା ମୁତାବକ, ହସ୍ପିଟାଲରେ ଏସି କାମ ଚାଲିଥିଲା । ସେହି ଏସିରୁ ସର୍ଟସର୍କିଟ ହୋଇ, ଏସି ବ୍ଲାଷ୍ଟ କରିବା ସହ ହସ୍ପିଟାଲରେ ନିଆଁ ଲାଗିଛି । ତେବେ ଅଗ୍ନିକାଣ୍ଡର ଅସଲ କାରଣ କଣ ସେ ନେଇ କୌଣସି ବି ସ୍ପଷ୍ଟ ସୂଚନା ମିଳିପାରିନି । ଉଦ୍ଧାର ହୋଇଥିବା ରୋଗୀଙ୍କୁ ଅନ୍ୟ ଘରୋଇ ମେଡ଼ିକାଲ୍ ଓ ଏସସିବିରେ ଭର୍ତ୍ତି କରାଯାଇଛି ।
ଅପରପକ୍ଷେ ଅଗ୍ନିଶମ ଡିଜି ସୁଧାଂଶ ଷଡଙ୍ଗୀ ନିଆଁ ଆୟତ୍ତ ହୋଇଥିବା ନେଇ ସୂଚନା ଦେଇଛନ୍ତି । ଧୂଆଁ ବାହାର କରିବା ପାଇଁ ଉଦ୍ୟମ ଚାଲିଛି । ନର୍ସିଂହୋମର ଆଇସିୟୁର ଗୋଟିଏ ପାର୍ଶ୍ୱରେ ଚିକିତ୍ସିତ ହେଉଥିବା ୧୨ ନବଜାତ ଛୁଆଙ୍କୁ ଉଦ୍ଧାର କରାଯାଇ ସେମାନଙ୍କୁ ଶିଶୁଭବନକୁ ପଠାଯାଇଥିବା ସୂଚନା ମିଳିଛି ।
