ତିନିଦିନ ହେଲା ପାଣି ଯୋଗାଣ ବନ୍ଦ, ପିଇବା ପାଣି ପାଇଁ ହନ୍ତସନ୍ତ ଜନସାଧାରଣ…

ନୂଆପଡା, (ଏଫ୍ଟୁଏସ୍) ୦୮/୦୭ : ନୂଆପଡା ଜିଲ୍ଲା ବୋଡ଼େନ ସଦରମହକୁମାସ୍ଥିତ ଆଶ୍ରମପଡ଼ା ଓ ବସ୍ତିର ଅଧାମୁଣ୍ଡରେ ଗତ ୩ ରୁ ୪ ଦିନ ହେଲା ଜଳ ଯୋଗାଣ ବନ୍ଦ ରହିଥିବାରୁ ତୀବ୍ର ଜନ ଅସନ୍ତୋଷ ଦେଖାଦେଇଛି । ଲୋକେ ପିଇବା ପାଣି ପାଇଁ ବହୁ ହନ୍ତସନ୍ତ ହେଉଥିବା ଦେଖିବାକୁ ମିଳିଛି । ସୂଚନା ମୁତାବକ, ଗ୍ରାମପଞ୍ଚାୟତସ୍ତରରୁ ଆଶ୍ରମପଡ଼ାଠାରେ ଥିବା ଗଭୀର କୂପରୁ ମୋଟର ଲଗାଯାଇ ବୋଡ଼େନ ଆଶ୍ରମପଡ଼ା ଓ ବସ୍ତି ଅଧାମୁଣ୍ଡରେ ପାଣି ଯୋଗାଣ କରାଯାଉଥିଲା । ଗତ ୩ -୪ ଦିନ ତଳେ ମୋଟର ପୋଡ଼ି ଯାଇଥିବାରୁ ଜଳ ଯୋଗାଣ ହେଉନଥିବା ଜଣାପଡ଼ିଛି । ଏଭଳି ପରିସ୍ଥିତିରେ ଏଲଏନଟି ପାଇପ ପାଣି ମଧ୍ୟ ମରାମତି କାମ ଚାଲୁ ରହିଥିବା ଜଣାପଡିଛି । ଫଳରେ ସ୍ଥାନୀୟବାସୀ ବାଧ୍ୟ ହୋଇ ନଳକୂପର ଫ୍ଲୋରାଇଡ ପାଣି ପିଇବା ସହ ବିଶୁଦ୍ଧ ପାନୀୟ ଜଳ ପାଇଁ ଡହକ ବିକଳ ହେଉଛନ୍ତି । ଏକବିଂଶ ଶତାବ୍ଦୀରେ ପାଣି ଟିକିଏ ପାଇଁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏ ନେଇ ବିଭାଗୀୟ କନିଷ୍ଠ ଯନ୍ତ୍ରୀଙ୍କୁ ବାରମ୍ବାର ଅଭିଯୋଗ କଲେ ମଧ୍ୟ କେହି ଏଥିପ୍ରତି କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଶେଷରେ ଗ୍ରାମବାସୀ ଗଣମାଧ୍ୟମ ପ୍ରତିନିଧିମାନଙ୍କୁ ଭେଟି ସେମାନଙ୍କ ସମସ୍ୟା ସମ୍ପର୍କରେ ଜଣାଇଛନ୍ତି । ଅପରପକ୍ଷେ ଘଟଣାର ସତ୍ୟାସତ୍ୟ ଜାଣିବା ପାଇଁ ଗଣମାଧ୍ୟମ ପ୍ରତିନିଧି ବିଭାଗୀୟ ଯନ୍ତ୍ରୀଙ୍କୁ ଏ ସଂପର୍କରେ ପଚାରିବାରୁ ଯନ୍ତ୍ରୀ ମହୋଦୟ ସଠିକ୍ ଉତ୍ତର ଦେଇ ନ ପାରି ଫୋନ୍ କାଟି ଦେଇଥିଲେ । ସେପଟେ ପ୍ରଶାସନ ପକ୍ଷରୁ ଯଦି ପାଣି ସମସ୍ୟାକୁ ଗମ୍ଭୀରତାର ସହ ଗ୍ରହଣ ନ କରାଯାଏ ତେବେ ଆଗାମୀ ଦିନରେ ରାସ୍ତାରୋକ କରାଯାଇ ଆନେ୍ଦାଳନ କରାଯିବ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।