ବକେୟା ପାଉଣା ଅପେକ୍ଷାରେ ଗାଁ ସାଥୀ । ବିଡିଓଙ୍କ ନିକଟରେ ଫେରାଦ ହେଲା ସଂଘ…

କୋଦଳା, ୨୯/୬ : ଦୀର୍ଘ ବର୍ଷର ବକେୟା ପାଉଣା ପାଇନାହାନ୍ତି ଗାଁ ସାଥୀ । ଏବେ ଏକ ବର୍ଷରୁ ଊର୍ଦ୍ଧ୍ବ ହେଲାଣି ପାଉଣା ସମ୍ପର୍କିତ ତଥ୍ୟ ଅନଲାଇନରେ ଏଣ୍ଟ୍ରି କରାଯାଉନାହଁ । ଫଳରେ ଦୀର୍ଘ ଅଢେଇ ବର୍ଷରୁ ଉର୍ଦ୍ଧ୍ବ ସମୟ ଧରି ନିଜର ପାଉଣା ପାଇବାରୁ ବଞ୍ଚିତ ହୋଇଛନ୍ତି ଗାଁ ସାଥି । ବେଗୁନିଆପଡ଼ା ବ୍ଳକର ସମସ୍ତ ପଞ୍ଚାୟତ ଅନ୍ତର୍ଗତ ଗାଁ ସାଥୀ ମାନେ ଏଭଳି ଦୁର୍ଦ୍ଦଶା ଦେଇ ଗତି କରୁଛନ୍ତି । ସମସ୍ୟାକୁ ନେଇ ବ୍ଲକ ଏପିଓ, ଜିଆରଏସ୍ ମାନଙ୍କୁ ଅବଗତ କରାଇଲେ ମଧ୍ୟ କୌଣସି ସୁଫଳ ମିଳୁନି । ଏ ନେଇ ବାଧ୍ୟ ହୋଇ ସମସ୍ତ ଗାଁ ସାଥୀମାନେ ବେଗୁନିଆପଡ଼ା ବିଡିଓ ପ୍ରଜ୍ଞା ପ୍ରିୟଦର୍ଶିନୀଙ୍କୁ ଭେଟି ଦାବି ଜଣାଇଛନ୍ତି । ବ୍ଳକର ୧୦୬ ଜଣ ଗାଁ ସାଥୀ ବ୍ଲକ କାର୍ଯ୍ୟାଳୟରେ ପହଞ୍ଚି ଅଭିଯୋଗ କରିଛନ୍ତି । ତେବେ ଖୁବ୍ ଶୀଘ୍ର ଏକ ବୈଠକ ଡକାଇ ଘଟଣା ସଂପର୍କରେ ଆଲୋଚନା କରାଯିବା ସହ ପଦକ୍ଷେପ ନେବେ ବୋଲି କହିଛନ୍ତି ଗୋଷ୍ଠୀ ଉନ୍ନୟନ ଅଧିକାରୀଣୀ । ସୂଚନା ଯୋଗ୍ୟ ଯେ, ପ୍ରତି ରାଜସ୍ବ ଗ୍ରାମରେ ମନରେଗା କାର୍ଯ୍ୟର ତଦାରଖ କରିବା ପାଇଁ ଜଣେ ଜଣେ ଗାଁ ସାଥୀ ନିଯୁକ୍ତ ଅଛନ୍ତି । ମନରେଗା କାର୍ଯ୍ୟ ଯେତେଦିନ ଚାଲିଥାଏ ଏମାନଙ୍କୁ ଦୈନିକ ମଜୁରୀ ଦେବାର ବ୍ୟବସ୍ଥା ଅଛି । କିନ୍ତୁ ଦୀର୍ଘ ଅଢ଼େଇ ବର୍ଷର ପାଉଣା ନପାଇ ହଇରାଣ ହରକତ ହେଉଥିବା କହିଛନ୍ତି ଗାଁ ସାଥୀ ।