କନ୍ଧମାଳରେ ଲାଲ୍ ଆତଙ୍କ, ପଲିଥିନରେ ଶବ ପଠାଇଲେ ମାଓବାଦୀ…

କନ୍ଧମାଳ, ୨୮/୦୫ : ପୋଲିସ ଇନଫର୍ମର ସନ୍ଦେହରେ ଯୁବକଙ୍କୁ ହତ୍ୟା କଲେ ମାଓବାଦୀ । ଏଭଳି ଦୁଃଖଦ ଘଟଣା ଘଟିଛି କନ୍ଧମାଳ ଜିଲ୍ଲା ବାରିପଙ୍ଗା ଗ୍ରାମରେ । ଗ୍ରାମର ସ୍ୱର୍ଗତଃ ଗ୍ରସକା ରୋହିତଙ୍କ ପୁଅ ମେଟଲା ରୋହିତଙ୍କୁ ପୋଲିସ ଇନଫର୍ମର ସନ୍ଦେହରେ ଅତ୍ୟନ୍ତ ନିର୍ମମ ଭାବେ ହତ୍ୟା କରିଛନ୍ତି ମାଓବାଦୀ । ମେଟଲା ମାତ୍ର ୧ ମାସ ହେବ ବିବାହିତ ଥିଲେ । ସେ ନିଜ ଅଂଚଳରେ ଚାଲୁଥିବା ବିଭିନ୍ନ ଭନ୍ନୟନମୂଳକ କାର୍ଯ୍ୟରେ ମୁନସି ତଥା ଚାଷବାସ କରି ନିଜ ପରିବାରର ଭରଣପୋଷଣ କରୁଥିଲେ । ସୂଚନା ଅନୁସାରେ ଗତ ମେ ୨୫ ରେ ୧୨ରୁ ୧୫ ଜଣ ସଶସ୍ତ୍ର ମାଓବାଦୀ ମେଟଲାଙ୍କୁ ନିଜ ଘରୁ ଜୋର ଜବରଦସ୍ତ ଉଠାଇ ନେଇଥିଲେ । ପରେ ମେ ୨୭ରେ ମୃତ ଶରୀରକୁ ଏକ ପଲିଥିନ ଜରିରେ ଗୁଡାଇ ବାରିପଙ୍ଗା ଗ୍ରାମର ଅଙ୍ଗନବାଡି କେନ୍ଦ୍ର ପାଖରେ ଫିଙ୍ଗି ଦେଇଯାଇଥିଲେ । ମୃତ ଶରୀରରେ ବହୁ କ୍ଷତଚିହ୍ନ ରହିଥିବାବେଳେ ମାଓବାଦୀମାନେ ଅତ୍ୟନ୍ତ ନିର୍ମମ ଭାବେ ମେଟଲାଙ୍କୁ ହତ୍ୟା କରିଥିବା ଜଣାପଡିଛି ।
ମେଟଲା ହେଉଛନ୍ତି ଜଣେ ଗରିବ ନିରୀହ କନ୍ଧ ସମ୍ପ୍ରଦାୟର ପୁଅ । ସେ ପୋଲିସକୁ କୌଣସି ଖବର ଦେଉନଥିଲେ । ଏହା କେବଳ ମାଓବାଦୀଙ୍କ ଚକ୍ରାନ୍ତ ବୋଲି ପୋଲିସ ସୂତ୍ରରୁ ଜଣାପଡିଛି । ଅପରପକ୍ଷେ ନିରୀହ କନ୍ଧ ପୁଅର ଏଭଳି ହତ୍ୟାକାଣ୍ଡ ପରେ ପୋଲିସ ପକ୍ଷରୁ ମାଓ ବିରୋଧୀ ଅଭିଯାନକୁ ଜୋରଦାର କରାଯାଇଛି ।