କୂଳ ହରାଉଛି ବାଉଁଶ କାରୀଗରଙ୍କ କୌଳିକ ବୃତ୍ତି…

ଗଜପତି, ୨୭/୦୫ : ପ୍ରୋତ୍ସାହନ ଅଭାବରୁ ହଜିବାକୁ ବସିଲାଣି ବାଉଁଶ କାରୀଗରଙ୍କ କୌଳିକ ବୃତ୍ତି । ବାଉଁଶ କାରିଗର ମାନେ ବାଉଁଶରେ ବିଭିନ୍ନ ସରଞ୍ଜାମ ତିଆରି କରି ବିକ୍ରି କରିଥାନ୍ତି । ଧାନ ରଖିବା ଲାଗି ଡୋଲି,ତାଟ,କୁଲା, ଚାଉଳ ଧୁଆ, ତାଟି, ଛପା, କୁକୁଡ଼ା ଘୋଡୁ ଏହିଭଳି ବିଭିନ୍ନ ସାମଗ୍ରୀ ତିଆରି କରି ହାଟ ବଜାର ଗାଁ ଗହଳିରେ ବିକ୍ରି କରି ନିଜର ଜୀବନ ଜୀବିକା ନିର୍ବାହ କରିଥାନ୍ତି । ହେଲେ ଏବେ ଆଧୁନକତାର ସ୍ପର୍ଶରେ ହଜିବାକୁ ବସିଲାଣି ଏମାନଙ୍କ କୂଳବେଉଶା । ପାରଳାଖେମୁଣ୍ଡିର ଖଞ୍ଜା ମେଦିରିସାହିରେ ୬୦ଟି ପରିବାର ରହୁଛନ୍ତି । ସେମାନଙ୍କ ଜୀବନ ଜୀବିକା ହେଉଛି ବାଉଁଶର ବିଭିନ୍ନ ସରଞ୍ଜାମ କରି ବିକ୍ରି କରିବା । ସେଥିରେ ଯାହା ଦି ପଇସା ରୋଜଗାର ହୁଏ ସେଥିରେ ପରିବାର ଚଳେ । ଏହିଠାରେ ବସବାସ କରନ୍ତି ସିଂହଗିରୀ ବାଉଁଶ ବୁଣା ସମାଜ । କିନ୍ତୁ ସେମାନଙ୍କୁ ସରକାରଙ୍କ ପକ୍ଷରୁ କିଛି ପ୍ରୋତ୍ସାହନ ମିଳୁନଥିବା ପ୍ରକାଶ କରିଛନ୍ତି ଗ୍ରାମବାସୀ । ସେମାନଙ୍କୁ ସରକାରଙ୍କ ପକ୍ଷରୁ ବାଉଁଶ ଯୋଗାଇ ଦିଆଯାଉନାହିଁ । ଏପରିକି ସରକାରଙ୍କ ପକ୍ଷରୁ ଯଦି ସାହାଯ୍ୟ ସହଯୋଗ ରହେ କିମ୍ବା ପ୍ରୋତ୍ସାହନ ମିଳେ ତାହା ହେଲେ ନିଜର କୌଳିକ ବୃତ୍ତିକୁ ଆଗାମୀ ପିଢି ଆପଣେଇବେ ବୋଲି ଆଶା ପ୍ରକାଶ କରାଯାଉଛି । ଏହି କୌଳିକ ବାଉଁଶ କାରିଗର ବୃତ୍ତି ବଞ୍ଚି ରହିବ ବୋଲି ଆଶା କରାଯାଉଛି ।