ଓଡ଼ିଆ ଅସ୍ମିତା ଓ ସ୍ବାଭିମାନ ଉପରେ ପ୍ରଶ୍ନ; ଅଭିନବ ଢଙ୍ଗରେ ପ୍ରତିବାଦ କଲେ ଆଇ.ଟି ଇଞ୍ଜିନିୟର…
ଓଡିଆ ସ୍ୱାଭିମାନ, ଅସ୍ମିତା ଓ ରାଜ୍ୟର ସାମ୍ପ୍ରତିକ ରାଜନୈତିକ ସ୍ଥିତିକୁ ନେଇ ଅଭିନବ ଢଙ୍ଗରେ ପ୍ରତିବାଦ କରିଛନ୍ତି ଓଡିଆ ଯୁବ ଆଇ.ଟି ଇଞ୍ଜିନିୟର । ନେଦରଲାଣ୍ଡରେ କାର୍ଯ୍ୟରତ ଯୁବ ଆଇ.ଟି ବିଶେଷଜ୍ଞ ଶିବ ପ୍ରଧାନ ଓଡ଼ିଶା ଫେରିବା ପରେ ଭୁବନେଶ୍ବର ବିମାନ ବନ୍ଦରରେ ଅଭିନବ ଭାବରେ ନିଜର ପ୍ରତିବାଦ ଓ କ୍ଷୋଭ ବ୍ୟକ୍ତ ପ୍ରକାଶ କରିଛନ୍ତି । ଓଡ଼ିଆଙ୍କ ସ୍ବାଭିମାନ, ସାମାଜିକ ପରମ୍ପରା, ଚଳଣି, ଭାଷା, କଳା, ସଂସ୍କୃତି ଓ ଅସ୍ମିତାକୁ କଟାକ୍ଷ କରି ଓଡ଼ିଆଙ୍କ ଭାବାବେଗକୁ ଆଘାତ କରୁଥିବା କିଛି ରାଜନେତାମାନଙ୍କ ବିରୋଧରେ ଅସନ୍ତୋଷ ଜାହିର କରିଛନ୍ତି ଶିବ । ସେ ବିମାନ ବନ୍ଦରରୁ ବାହାରି ମୁହଁରେ କଳା ବୋଳି ଆଣ୍ଠେଇ ଆଣ୍ଠେଇ ବାହାରକୁ ଆସିଥିଲେ । ଏବଂ ତାଙ୍କ ଟି-ସାର୍ଟରେ ଲେଖାଥିଲା ମୁଁ ମୋର ରାଜ୍ୟର ରାଜନୈତିକ ପରିସ୍ଥିତି ପାଇଁ ଲଜ୍ଜିତ ଓ ଏହା ସ୍ବାଭିମାନୀ ଓଡ଼ିଆର ବେଦନା । ଏହାକୁ ଦେଖି ଅନେକ ସହଯାତ୍ରୀ ସମର୍ଥନ କରିବା ସହ ମୋବାଇଲରେ ଭିଡିଓ ଉତ୍ତୋଳନ କରିଥିଲେ । ରାଜ୍ୟ ରାଜନୀତିରେ ଅଣ-ଓଡିଆଙ୍କ ପ୍ରଭୁତ୍ବକୁ ସେ ଦୃଢ ନିନ୍ଦା କରିଛନ୍ତି । ଆମ ରାଜ୍ୟର ଏଭଳି ସ୍ଥାଣୁ ଶାସନ ନୀତି ପାଇଁ ସେ ବାହାର ଦେଶରେ ଲଜ୍ଜିତ ବୋଲି ପ୍ରକାଶ କରିଛନ୍ତି ।
ଆଇ. ଟି. ବିଶେଷଜ୍ଞ ଶିବ ପ୍ରଧାନ ହେଉଛନ୍ତି ଖୋର୍ଦ୍ଧା ଜିଲ୍ଲା ବାଣପୁରର ବାସିନ୍ଦା । ସେ ଗତ କିଛି ବର୍ଷ ଧରି ନେଦରଲାଣ୍ଡରେ ପ୍ରତିଷ୍ଠିତ କମ୍ପାନୀରେ କାର୍ଯ୍ୟ କରୁଛନ୍ତି । ଅନେକ ସମୟରେ ରାଜ୍ୟର ଶାସନ ନୀତିକୁ ନେଇ ସେ ତାଙ୍କର କ୍ଷୋଭ ଓ ସାମାଜିକ ବିସଙ୍ଗତିକୁ ବ୍ୟଙ୍ଗ କବିତା ମାଧ୍ୟମରେ ସାମାଜିକ ଗଣମାଧ୍ୟମରେ ପୋଷ୍ଟ କରିଥାନ୍ତି । ରାଜ୍ୟରେ ବର୍ତ୍ତମାନ ନିର୍ବାଚନ ସମୟରେ ଓଡ଼ିଆ ଅସ୍ମିତା ଓ ସ୍ବାଭିମାନକୁ ପ୍ରମୁଖ ରାଜନୈତିକ ଦଳମାନେ ମୁଖ୍ୟ ଆୟୁଧ କରିଥିବା ବେଳେ ଓଡ଼ିଶା ବାହାରେ ରହୁଥିବା ଏବଂ ଓଡ଼ିଶାକୁ ଭଲ ପାଉଥିବା ସାଧାରଣ ଓଡ଼ିଆ ମଧ୍ୟ ବର୍ତ୍ତମାନର ରାଜନୀତିକ, ପ୍ରଶାସନିକ ଓ ସାମାଜିକ ସ୍ଥିତି ଉପରେ ବୀତସ୍ପୃହ ହୋଇ ଏଭଳି ନୀରବ ପ୍ରତିବାଦ କରିବା ସମସ୍ତଙ୍କ ଧ୍ୟାନ ଆକର୍ଷଣ କରିଛି ।
