କଳାହାଣ୍ଡି ଦେଖିବ କୋଟିପତି ରାଣୀ ବନାମ ଆଦିବାସୀ ମହିଳାଙ୍କ ଲଢେଇ, ସେପଟେ ରେସରେ ଅଛନ୍ତି ବରିଷ୍ଠ ନେତା…

ଧର୍ମଗଡ, ୯/୫ : କଳାହାଣ୍ଡିରେ ନିର୍ବାଚନ ତାତି ଦିନକୁ ଦିନ ବଢି ବଢ଼ି ଚାଲିଥିବା ବେଳେ ଆଉ କେଇଟା ଦିନ ପରେ ନିର୍ବାଚନର ମହାନ୍ ପର୍ବରେ ନିଜର ପ୍ରତିନିଧିତ୍ୱଙ୍କୁ ଦିଲ୍ଲୀ ଦରବାରକୁ ପଠାଇବା ପାଇଁ ଜନତା ପ୍ରସ୍ତୁତ ହେଉଛନ୍ତି । କଳାହାଣ୍ଡି ଲୋକସଭା ମଣ୍ଡଳୀ ଏକ ଚର୍ଚ୍ଚିତ ଲୋକସଭା ମଣ୍ଡଳୀ ଭାବେ ନିଜର ପରିଚୟ ବହନ କରି ଆସିଛି । ବିଗତ ଦିନରେ ଏହି ନିର୍ବାଚନ ମଣ୍ଡଳୀରୁ ଅନେକ ନେତା ଦିଲ୍ଲୀ ଦରବାରରେ କଳାହାଣ୍ଡିର ପ୍ରତିନିଧିତ୍ୱ କରିଛନ୍ତି । କଳାହାଣ୍ଡିର ବିକାଶ ଦିଗରେ ବିଭିନ୍ନ ଦଳର ଅନେକ ସରକାର ଅନେକ ଉନ୍ନତି ମୂଳକ କାର୍ଯ୍ୟ କରିଛନ୍ତି । କିନ୍ତୁ ଆମେ ଯଦି ପ୍ରତିନିଧିତ୍ୱକୁ ଦେଖିବା ତାହେଲେ ଏକ ରାଜ ବଂଶର ପରିବାର ଅନେକ ଥର କଳାହାଣ୍ଡି ପ୍ରତିନିଧିତ୍ୱ କରିଥିବା ନଜିର ରହିଛି ।

ବର୍ତମାନର ବିଜେପି ପ୍ରାର୍ଥିନୀ ମାଳବିକା ଦେଓଙ୍କ ଶଶୁରଙ୍କ ବାପା ଥରେ ଲୋକସଭା ସାଂସଦ ହୋଇଥିବା ବେଳେ ତାଙ୍କ ଶଶୁର ତିନି ଥର ଓ ତାଙ୍କ ସ୍ୱାମୀ ଅର୍କ କେଶରୀ ଦେଓ ଥରେ ଦିଲ୍ଲୀ ଦରବାରରେ ଯାଇ କଳାହାଣ୍ଡି ପାଇଁ ପ୍ରତିନିଧିତ୍ୱ କରିଛନ୍ତି । ମାଳବିକା ଦେଓଙ୍କ ରାଜ ପରିବାର ଏତେ ବର୍ଷ ଶାସନ କଲା ପରେ କଳାହାଣ୍ଡିବାସୀଙ୍କ ପାଇଁ କି କି କାର୍ଯ୍ୟ କରିଛନ୍ତି ସେ ଉପରେ ଏବେ ଭୋଟର ପ୍ରଶ୍ନ ପଚାରିଛନ୍ତି । ଏଭଳି ସମୟରେ ମାଳବିକା ଦେଓ ଅତି ଚତୁରତା ସହ ଲୋକଙ୍କ କଥାକୁ ଏଡ଼ାଇ ମୁଁ କଳାହାଣ୍ଡିକୁ ଏକ ନମ୍ଭର ଜିଲ୍ଲା କରିବି ବୋଲି କହିଥିବା ଗଣ ମାଧ୍ୟମରୁ ଜଣାପଡ଼ିଛି ।
ପ୍ରଥମତଃ କଳାହାଣ୍ଡି ଲୋକସଭା ସଂସଦୀୟ କ୍ଷେତ୍ର କଳାହାଣ୍ଡି ଓ ନୂଆପଡା ଜିଲ୍ଲାକୁ ନେଇ ଗଠିତ । ତେବେ କଳାହାଣ୍ଡି ଜିଲ୍ଲାକୁ ନେଇ ମତ ରଖିଥିବା ବେଳେ ନୂଆପଡା ଜିଲ୍ଲା ନେଇ ମତ ନ ରଖିବା ପଛରେ କି ରହସ୍ୟ ଅଛି ତାହା ବୁଝାପଡୁ ନାହିଁ । ଓଡ଼ିଶା ଲୋକସଭା ପ୍ରାର୍ଥୀ ମାନଙ୍କ ମଧ୍ୟରେ ମାଳବିକା ଦେଓଙ୍କ ୪୦ କୋଟିରୁ ଅଧିକ ସମ୍ପତ୍ତି ଥିବା ତଥା ସର୍ବାଧିକ ଧନୀ ପ୍ରାର୍ଥୀ ଭାବେ ଜଣାପଡ଼ିଛି ।
ଅନ୍ୟପଟେ ଦ୍ରୋପଦୀ ମାଝୀ ହେଉଛନ୍ତି ମୂଳନିବାସୀ ଆଦିବାସୀ ମହିଳା ପ୍ରାର୍ଥିନୀ । ନିଜସ୍ୱ ସଂଘର୍ଷ ବଳରେ ଆଜି ସେ କଂଗ୍ରେସର ପ୍ରାର୍ଥିନୀ ଭାବରେ ଜନତାଙ୍କ ନିକଟରେ ଛିଡା ହୋଇଛନ୍ତି । ବଣ ପାହାଡ ଘେରା ଆଦିବାସୀ ଅଧ୍ୟୁଷିତ ଥୁଆମୂଳ ରାମପୁର ଭଳି ଅନଗ୍ରସର ଅଞ୍ଚଳର ମହିଳା ଯୋଦ୍ଧା ଭାବେ ଉଭା ହୋଇ ଅନବରତ ଲୋକଙ୍କ ସେବା କରି ଜନ ସାଧାରଣଙ୍କ ପ୍ରିୟ ପାତ୍ରୀ ହୋଇ ପାରିଛନ୍ତି ଦ୍ରୋପଦୀ । ସେଥିପାଇଁ ସେ ସରପଞ୍ଚ ଓ ବ୍ଲକ ଅଧକ୍ଷା ଭାବେ ଜନତାଙ୍କ ସେବା କରିବା ପରେ ଜାତୀୟ କଂଗ୍ରେସର ଲୋକସଭା ପ୍ରାର୍ଥିନୀ ହେବାର ସୁଯୋଗ ପାଇଛନ୍ତି । ଏ ଦୁଇ ମହିଳା ପ୍ରାର୍ଥିନୀଙ୍କୁ ତୁଳନା କଲେ ଜଣେ ସମ୍ଭ୍ରାନ୍ତ ଘରର ବୋହୂ ଓ ଅନ୍ୟ ଜଣେ ସାଧାରଣ ବର୍ଗର ମହିଳା କହିଲେ ଅତ୍ୟୁକ୍ତି ହେବ ନାହିଁ ।

ଚଳିତ ସାଧାରଣ ନିର୍ବାଚନ ୨୦୨୪ ତ୍ରିକୋଣୀୟ ପ୍ରତିଦ୍ୱନ୍ଦିତା ହେବାର ସମ୍ଭାବନା ରହିଛି । କଂଗ୍ରେସ, ବିଜେଡି, ବିଜେପିର ରଣନିତିକାର ମାନେ ନିଜ ନିଜ ସପକ୍ଷରେ ଜନମତ ସୃଷ୍ଟି କରିବା ନିମନ୍ତେ ପ୍ରୟାସ ଜାରି ରଖିଛନ୍ତି । ବିଜେପିର ମାଳବିକା, କଂଗ୍ରେସର ଦ୍ରୌପଦୀ ଓ ବିଜେଡିର ଲମ୍ବୋଦର ନିଆଲ ପ୍ରତିଦ୍ୱନ୍ଦିତା କରୁଛନ୍ତି ।

ଲମ୍ବୋଦର ନୂଆପଡା ଜିଲ୍ଲା ବାସିନ୍ଦା ହୋଇଥିବା ବେଳେ ମାଳବିକା ଓ ଦ୍ରୌପଦୀ କଳାହାଣ୍ଡି ଜିଲ୍ଲା ବାସିନ୍ଦା । ନିର୍ବାଚନ ପ୍ରଚାର ବେଳେ ମାଳବିକା ଦେଓ ଦଳିତ ବସ୍ତିମାନଙ୍କୁ ନ ଯିବା ମଧ୍ୟ ଚର୍ଚ୍ଚାର ବିଷୟ ହେଉଛି । ଏବେ ମଧ୍ୟ ତାଙ୍କ ମଧରେ ରାଜା ପରିବାର ମାନସିକତା ଥିବା ବୁଦ୍ଧିଜିବୀ ମାନେ ମତବ୍ୟକ୍ତ କରିଛନ୍ତି । ହେଲେ ଦେଖିବାକୁ ବାକି ରହିଛି କଳାହାଣ୍ଡିବାସୀ ରାଜା ପରିବାର ପ୍ରତି ଅଛନ୍ତି କି ଜଣେ ଆଦିବାସୀ ମହିଳା ପ୍ରାର୍ଥୀଙ୍କୁ ଦିଲ୍ଲୀ ଦରବାରରେ ନିଜର ପ୍ରତିନିଧିତ୍ୱ ପାଇ ପଠାଇବେ, ତାହା ନିର୍ବାଚନ ଫଳାଫଳ ପରେ ଜଣାପଡ଼ିବ ।