ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଘୋଳଦହି ବଣ୍ଟନ କରୁଛି ଓମଫେଡ୍…

ନୂଆପଲ୍ଲୀ ଏବଂ ବରମୁଣ୍ଡା ବସଷ୍ଟାଣ୍ଡରେ ୩ ହଜାର ପ୍ୟାକେଟ୍ ଘୋଳଦହି ବଣ୍ଟନ
ଭୁବନେଶ୍ୱର, ୦୮/୫ : ରାଜ୍ୟରେ ଜାରି ରହିଛି ପ୍ରବଳ ଗ୍ରୀଷ୍ମ ପ୍ରବାହ । ଖାସ କରି ଭୁବନେଶ୍ୱର ମହାନଗର ନିଗମ ଅଂଚଳରେ ଏହାର ପ୍ରଭାବ ପରିଲକ୍ଷିତ ହେଉଛି । ପାରଦ ସଦାବେଳେ ଉପର ମୁହାଁ ହୋଇ ରହିଥିବାରୁ ବିଭିନ୍ନ ସ୍ୱେଚ୍ଛାସେବୀ, ସଂଗଠନ, ସରକାରୀ, ବେସରକାରୀ, ଅର୍ଦ୍ଧସରକାରୀ ସଂସ୍ଥା ଜଳଛତ୍ରଠାରୁ ଆରମ୍ଭ କରି ଅବଢା ତୋରାଣୀ ପର୍ଯ୍ୟନ୍ତ ପଥଚାରୀଙ୍କୁ ବଣ୍ଟନ କରୁଛନ୍ତି । ଏଥିରେ ଆଉ ପାଦେ ଆଗେଇ ଯାଇଛି ଓଡିଶା ସରକାରଙ୍କର ଓମଫେଡ୍ ସଂସ୍ଥା । ପ୍ରବଳ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଓମଫେଡ୍ ପକ୍ଷରୁ ଘୋଳଦହି ପ୍ୟାକେଟ ବଣ୍ଟନ କରାଯାଇଛି ।

ଓମଫେଡର ପରିଚାଳନା ନିର୍ଦେଶକ ଶ୍ରୀବିଜୟ ଅମୃତା କୁଲାଙ୍ଗେଙ୍କ ନିର୍ଦେଶକ୍ରମେ କୌଣସି ସଂସ୍ଥା କିମ୍ବା ସ୍ୱେଚ୍ଛାସେବୀ ସଂଗଠନ ଜରିଆରେ ନୁହେଁ, ଓମଫେଡ ସିଧାସଳଖ ଏହି ଘୋଳଦହି ଲୋକମାନଙ୍କ ନିକଟରେ ପହଞ୍ଚାଇବାକୁ ପ୍ରୟାସ ଆରମ୍ଭ କରିଛି । ଲୋକମାନଙ୍କୁ ଖରା ଦାଉର ସାମାନ୍ୟ ଆଶ୍ୱସ୍ତ ଦେବା ପାଇଁ ଏହି ପ୍ରୟାସ ଆରମ୍ଭ କରିଛି ଓମଫେଡ୍ । ଲୋକଙ୍କ ସ୍ୱାସ୍ଥ୍ୟ, ଓମଫେଡର ଦାୟିତ୍ୱବାକ୍ୟକୁ ସାକାର କରିବା ଉଦେଶ୍ୟରେ ସକାଳ ୭ଟାରୁ ୯ ଟା ପର୍ଯ୍ୟନ୍ତ ନୂଆପଲ୍ଲୀସ୍ଥିତ ନାବାର୍ଡ କାର୍ଯ୍ୟାଳୟ ସମ୍ମୁଖରେ ଏବଂ ବରମୁଣ୍ଡା ବସଷ୍ଟାଣ୍ଡ ଭିତରେ ଘୋଳଦହି ସର୍ବତ ପ୍ୟାକେଟ୍ ବଣ୍ଟନ କରାଯାଇଥିଲା । ବିଭିନ୍ନ ବର୍ଗର ହଜାର ହଜାର ଲୋକ ଘୋଳ ଦହି ପିଇ ବେଶ୍ ଖୁସିବ୍ୟକ୍ତ କରିବା ସହ ଓମଫେଡ୍ର ଏପରି ପ୍ରୟାସକୁ ଉଚ୍ଚ ପ୍ରସଂଶା କରିଛନ୍ତି । ମୁଖ୍ୟତଃ ଏଠାରେ ପ୍ରତିଦିନ ପରି ଜମା ହୋଇଥିବା ହଜାର ହଜାର ମହିଳା, ପୁରୁଷ ଓ ଯୁବ ଶ୍ରମିକ ସରକାରଙ୍କର ଏପରି ପ୍ରୟାସକୁ ସାଧୁବାଦ ଜଣାଇଛନ୍ତି ।

ପୂର୍ବରୁ ଓମଫେଡ୍ ବିଭିନ୍ନ ସଂସ୍ଥା ଜରିଆରେ ତାର ଉତ୍ପାଦ ବଣ୍ଟନ କରୁଥିଲା । ମାତ୍ର ଏବେ ବିଭିନ୍ନ ପର୍ବ ପର୍ବାଣୀରେ ସିଧା ସଳଖ ଲୋକମାନଙ୍କୁ ଦେଉଛି । ଏହା ଦ୍ୱାରା ଓମଫେଡର ଦୁଇଟି ଉଦେଶ୍ୟ ସାଧିତ ହେଉଛି । ପ୍ରଥମତଃ ଲୋକମାନେ ଖରା ସମୟରେ ଓମଫେଡ୍ ଘୋଳଦହି ପାଉଛନ୍ତି । ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ଲୋକେ ଅନେକ ସମୟରେ ଓମଫେଡ୍ ଘୋଳଦହି କିଣିବାକୁ ପାଇନଥାନ୍ତି କିମ୍ବା ସମସ୍ତଙ୍କ ପାଖରେ ଉପଲବ୍ଧ ହୋଇନଥାଏ । ମାତ୍ର ଏବେ ସିଧାସଳଖ ସେମାନଙ୍କୁ ପ୍ରଦାନ କରାଯାଉଛି ଏବଂ ମାଗଣାରେ । ଏହା ଦ୍ୱାରା ସେମାନେ ଉଭୟ ପ୍ରକାର ସୁଫଳ ପାଉଛନ୍ତି । ଓମଫେଡ୍ ଉତ୍ପାଦର ସ୍ୱାଦ ଚାଖିବା ସହ ଖରା ଦାଉରୁ ନିଜକୁ ରକ୍ଷା କରୁଛନ୍ତି । ଅପରପକ୍ଷେ ନିଜକୁ ସିଧାସଳଖ ଖାଉଟିଙ୍କ ନିକଟରେ ପହଞ୍ଚାଇ ପାରୁଛି ଓମଫେଡ୍ । ଏହା ଦ୍ୱାରା ଓମଫେଡର ମଧ୍ୟ ପ୍ରଚାର ପ୍ରସାର ହେଉଛି ବୋଲି ଓମଫେଡ୍ ପକ୍ଷରୁ କୁହାଯାଇଛି । ଆଗାମୀ ଦିନରେ ବିଭିନ୍ନ ଜନ ଗହଳିପୂର୍ଣ୍ଣ ସ୍ଥାନ ଯଥା-ଏମ୍ସ, କ୍ୟାପିଟାଲ ହସପିଟାଲ, ଲିଙ୍ଗରାଜ ମନ୍ଦିର ଆଦି ସ୍ଥାନରେ ଏହି ଘୋଳଦହି ବଣ୍ଟନ କରାଯିବ ବୋଲି ଓମଫେଡ୍ ପକ୍ଷରୁ କୁହାଯାଇଛି । ଓମଫେଡ୍ ମାର୍କେଟିଂ ମୁଖ୍ୟ ଆଲୋକ କୁମାର ଅଗ୍ନୀବେଶଙ୍କ ନେତୃତ୍ୱରେ ଓମଫେଡ୍ର ଏକ ଟିମ୍ ନୂଆପଲ୍ଲୀସ୍ଥିତ ନାବାର୍ଡ କାର୍ଯ୍ୟାଳୟ ଏବଂ ବରମୁଣ୍ଡା ବସଷ୍ଟାଣ୍ଡ ନିକଟରେ ଏହି ଘୋଳ ଦହି ପ୍ୟାକେଟ୍ ବଣ୍ଟନ କରିଥିଲେ ।