ନୀଳଗିରିରୁ ପ୍ରାର୍ଥୀ ଘୋଷଣା କଲା କଂଗ୍ରେସ…
ନୀଳଗିରି, ୦୬/୫ : ସବୁ କଳ୍ପନା ଜଳ୍ପନାର ଅନ୍ତ ଘଟାଇ ବାଲେଶ୍ୱର ଜିଲ୍ଲା ନୀଳଗିରି ନିର୍ବାଚନ ମଣ୍ଡଳୀ ପାଇଁ କଂଗ୍ରେସ ତାର ପ୍ରାର୍ଥୀ ଘୋଷଣା କରିଛି । ପୂର୍ବତନ ବିଧାୟକ ଅକ୍ଷୟ କୁମାର ଆଚାର୍ଯ୍ୟଙ୍କ ଉପରେ ଭରସା କରି ଦଳ ତାଙ୍କୁ ଟିକେଟ ପ୍ରଦାନ କରିଛି । ଅକ୍ଷୟଙ୍କୁ ଟିକେଟ୍ ମିଳିବା ପରେ ନୀଳଗିରି କଂଗ୍ରେସ ମହଲରେ ଖୁସିର ଲହରି ଖେଳିଯାଇଛି । ଅକ୍ଷୟ କୁମାର ଆଚାର୍ଯ୍ୟ ନୀଳଗିରି ନିର୍ବାଚନ ମଣ୍ଡଳୀରେ ଦୁଇ ଦୁଇ ଥର ବିଧାୟକ । ତାଙ୍କ ସମୟରେ ନୀଳଗିରିର ବ୍ୟାପକ ବିକାଶ ହେବାସବ ସେ ନୀଳଗିରି ବାସୀଙ୍କର ପ୍ରିୟ ହୋଇ ପାରିଥିଲେ । ୧୯୮୦ ରୁ୧୯୮୫ ଏବଂ ୧୯୯୫ ରୁ ୨୦୦୦ ପର୍ଯ୍ୟନ୍ତ ନୀଳଗିରିର ବିଧାୟକ ଭାବେ ନିର୍ବାଚିତ ହୋଇଥିଲେ ଅକ୍ଷୟ । ପରବର୍ତ୍ତୀ ସମୟରେ କଂଗ୍ରେସ ପକ୍ଷରୁ ନୀଳଗିରି ନିର୍ବାଚନ ମଣ୍ଡଳୀରେ ସେଭଳି କୌଣସି ପ୍ରାର୍ଥୀ ଦିଆଯାଇ ନ ଥିବାରୁ କଂଗ୍ରେସ ଲୋକଲୋଚନକୁ ଆସି ପରିନଥିଲା । ବର୍ତ୍ତମାନ ଅକ୍ଷୟ ବିଧାୟକ ପ୍ରାର୍ଥୀ ହେବା ପରେ ନୀଳଗିରିବାସୀ ପୁଣି ଥରେ ଅକ୍ଷୟ କୁମାର ଆଚାର୍ଯ୍ୟଙ୍କୁ ବିଧାୟକ ଭାବେ ଚାହୁଁଛନ୍ତି ବୋଲି ସୂଚନା ମିଳିଛି । ଟିକେଟ୍ ମିଳିବା ପରେ ଅକ୍ଷୟ କୁମାର ଆଚାର୍ଯ୍ୟଙ୍କ ବାସ ଭବନରେ କର୍ମୀଙ୍କ ଭିଡ ଜମିଛି । ଏ ନେଇ ଅକ୍ଷୟ କୁମାର ଆଚାର୍ଯ୍ୟ କହିଛନ୍ତି, “ମୋ ସମୟରେ କାର୍ଯ୍ୟ ଅସମ୍ପୂର୍ଣ୍ଣ ଥିବା କାଯ୍ୟ ସମ୍ପୂର୍ଣ୍ଣ କରିବା, ଆଦିବାସୀଙ୍କ ବିକାଶ, ପଞ୍ଚଲିଙ୍ଗେଶ୍ୱର ଶୈବପୀଠ ବିକାଶ, ଶିଳ୍ପାଞ୍ଚଳ ବିକାଶ ଉପରେ ଗୁରୁତ୍ୱ ଦେବି ।”
