ବନ୍ଦ ରହିଛି ଉପଖଣ୍ଡ ସୂଚନା କେନ୍ଦ୍ର ଓ ପାଠାଗାର, ପାଠକ ମହଲରେ ଅସନ୍ତୋଷ…

ଢେଙ୍କାନାଳ, ୩/୫ : କର୍ମଚାରୀ ଥାଇବି ଦୀର୍ଘ ଦେଢ଼ ମାସ ହେବ ବନ୍ଦ ହୋଇ ରହିଛି ଉପଖଣ୍ଡ ସୂଚନା କେନ୍ଦ୍ର ଓ ପାଠାଗାର । ପାଠକ ମହଲରେ ଅସନ୍ତୋଷ । ୧୯୯୦ ମସିହାରୁ ରାଜ୍ୟ ସରକାରଙ୍କ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ସ୍ଥାପିତ ସୂଚନା କେନ୍ଦ୍ର ଓ ପାଠାଗାରରେ ଯଥେଷ୍ଟ ସଂଖ୍ୟକ କର୍ମଚାରୀ ନଥିଲେ ମଧ୍ୟ ଜଣେ ନିୟମିତ ଚତୁର୍ଥ ଶ୍ରେଣୀ କର୍ମଚାରୀ ଓ ଜଣେ ଭାରପ୍ରାପ୍ତ ଅଧିକାରୀଙ୍କୁ ନେଇ ଚାଲୁଛି । ତେବେ ବିଗତ ମାର୍ଚ୍ଚ ମାସ ୧୬ତାରିଖ ଠାରୁ ଆଜି ଯାଏଁ ଏହା ସଂପୂର୍ଣ୍ଣ ବନ୍ଦ ହୋଇ ରହିଥିବାରୁ ପାଠକ ମହଲରେ ଅସନ୍ତୋଷ ପ୍ରକାଶ ପାଇଛି । ଏକ ପ୍ରକାରେ ପାଠକ କେନ୍ଦ୍ରରୁ ମୁହଁ ଫେରାଉ ଥିବା ଦେଖାଯାଉଛି । ଏ ପର୍ଯ୍ୟନ୍ତ ଏହାର କାରଣ ଜଣା ପଡି ନଥିଲା ମାତ୍ର ଏକ ସୂତ୍ରରୁ ଜଣା ପଡିଲା ଯେ କର୍ମଚାରୀ ଜଣକ ନିୟୋମିତ ଭାବେ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଦାୟିତ୍ୱ ନିର୍ବାହ କରୁଥିବାରୁ କେନ୍ଦ୍ରକୁ ଖୋଲା ଯାଇ ପାରୁ ନାହିଁ ।

ଏଠାରେ ଉଲ୍ଲେଖଯୋଗ୍ୟ ଯେ, ପୂର୍ବରୁ ଏଠାରେ ବିଭାଗ ପକ୍ଷରୁ ଜଣେ ନିୟୋମିତ ଉପଖଣ୍ଡ ସୂଚନା ଓ ଲୋକ ସଂପର୍କ ବିଭାଗ ଅଧିକାରୀ, ଜଣେ ଲାଇବ୍ରେରିଆନ୍, ଜଣେ ଅପରେଟର ଓ ଦୁଇଜଣ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ନିଯୁକ୍ତି ଦିଆଯାଇ ସୁବିଧାରେ କାର୍ଯ୍ୟ ସମ୍ପାଦନ ହେଉଥିଲା । ମାତ୍ର ଦୀର୍ଘ ବର୍ଷ ହେବ ଧୀରେ ଧିରେ ସରକାରଙ୍କ ପକ୍ଷରୁ କର୍ମଚାରୀଙ୍କ ସଂଖ୍ୟା କାଣ୍ଟଛାଣ୍ଟ କରାଯିବା ଏବଂ କର୍ମଚାରୀଙ୍କ ଅବସର ଗ୍ରହଣ ସମସ୍ୟା ବଢାଇ ଦିଆଗଲା । କେନ୍ଦ୍ର ଓ ପଠାଗାର ଏବେ ଜରାଜୀର୍ଣ୍ଣ ଅବସ୍ଥାକୁ ଚାଲି ଆସିଥିବା ବେଳେ ଜଣେ ହିଁ ମାତ୍ର ଚତୁର୍ଥ ଶ୍ରେଣୀ କର୍ମଚାରୀ ଏହାର ଭାଗ୍ୟ ବିଧାତା । ଏଭଳି ପରିସ୍ଥିତିରେ ସୂଚନା କେନ୍ଦ୍ର ମାସ ମାସ ଧରି ବନ୍ଦ ହୋଇ ରହିବାକୁ ନେଇ ପାଠକଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏହାକୁ ତୁରନ୍ତ ଖୋଲା ଯାଇ ନିୟମିତ କରାଇବାକୁ ଏଠାକାର ଅଧିକାଂଶ ପାଠକ ଦୃଢ଼ ଦାବି କରୁଛନ୍ତି ।