ନୀଳଗିରିରେ ବିଜେଡି ଦୁଇ ଫାଳ; ସୁକାନ୍ତ ଶିବିରରେ ଖୁସି ସନ୍ତୋଷ ଶିବିରରେ ନିରାଶ…

କର୍ମୀଙ୍କ କ୍ଷୋଭରେ ବିଜେଡି ପୋଷ୍ଟର ଜଳାପୋଡ଼ା
ନୀଳଗିରି, ୩/୫ : ନୀଳିଗିରି ଆସନ ପାଇଁ ବିଜେଡି ସୁକାନ୍ତ ନାୟକଙ୍କୁ ପ୍ରାର୍ଥୀ କରିବା ପରେ ପୁରୁଣା କର୍ମୀଙ୍କ ମଧ୍ୟରେ ଦେଖବାକୁ ମିଳିଛି ଅସନ୍ତୋଷ । ନୀଳଗିରି ନିର୍ବାଚନ ମଣ୍ଡଳୀ ପାଇଁ ଦୀର୍ଘ ପାଞ୍ଚ ବର୍ଷ ଧରି ଦଳକୁ ଚଳାଇ ଆସିଥିବା ସନ୍ତୋଷ ଖଟୁଆଙ୍କ ଶିବିରରେ ଏଭଳି ଅସନ୍ତୋଷ ଦେଖାଦେଇଛି । ବିଜେଡି ନିଜର ନୀଳଗିରି ଆସନ ପାଇଁ ନିକଟରେ ପଦ୍ମ ଛାଡି ଶଙ୍ଖ ଧରିଥିବା ପ୍ରାର୍ଥୀଙ୍କୁ ଭରସା କରିଛି । ଏହା ଜଣାପଡିବା ପରେ ପ୍ରାୟ ପାଞ୍ଚ ଶହରୁ ଉର୍ଦ୍ଧ୍ୱ ସନ୍ତୋଷଙ୍କ ଶୁଭେଚ୍ଛୁ ପହଞ୍ଚି ସାମ୍ବାଦିକ ସମ୍ମିଳନୀରେ ଜରିଆରେ ସନ୍ତୋଷ ଖଟୁଆ ବିଜେଡିର ପ୍ରାଥମିକ ସଭ୍ୟ ପଦରୁ ଇସ୍ତଫା ଦେବାକୁ ସମର୍ଥନ ଜଣାଇଛନ୍ତି । ଏହାସହ ଜିଲା ଉପସଭାପତି ପଦରୁ ମଧ୍ୟ ସେ ଇସ୍ତଫା ଦେଇଛନ୍ତି । ତାଙ୍କ ସହ ଦଳ ବେଇମାନି କରିଥିବାରୁ ଇସ୍ତଫାପତ୍ର ବିଜେଡି ସୁପ୍ରିମୋ ନବୀନ ପଟ୍ଟନାୟକ ନିକଟକୁ ପଠାଇଛନ୍ତି ସନ୍ତୋଷ । ସେ ଇସ୍ତଫାପତ୍ର ଦେବା ଯୋଗୁଁ ପଞ୍ଚାୟତରୁ ଉର୍ଦ୍ଧ୍ୱ ଦଳର ବିଭିନ୍ନ୍ ପଦପଦବୀରେ ଥିବା କର୍ମୀ ମାନେ ମଧ୍ୟ ନିଜ ନିଜ ଇସ୍ତଫାପତ୍ର ଦେଇଛନ୍ତି । ଏପରିକି କର୍ମୀମାନେ କ୍ଷୋଭ ପ୍ରକାଶ କରି ବିଜେଡିର ବିଭିନ୍ ପୋଷ୍ଟର ବ୍ୟାନରକୁ ଚିରି ନିଆଁ ଲଗାଇ ଦେଇଥିବା ଦେଖିବାକୁ ମିଳିଛି । ନବୀନ ପଟ୍ଟନାୟକ ବେଇମାନ୍, ମୁର୍ଦା ବାଦ ଆଦି ସ୍ଲୋଗାନ୍ ଦେଇଛନ୍ତି ଅସନ୍ତୋଷ କର୍ମୀ । ନୀଳଗିରିର ଦୁଇ ବିଜେଡି ଶିବିରରେ ଦୁଇ ଭିନ୍ନ ଭିନ୍ନ ମାହୋଲକୁ ନେଇ ଏବେ ରାଜନୀତି ସରଗରମ ରହିଛି । ଅପରପକ୍ଷେ ସନ୍ତୋଷ ଖଟୁଆ ଯେଉଁ ଦଳକୁ ଯିବେ ତାଙ୍କ ସମର୍ଥକ ସମୂହ ତାଙ୍କ ସହ ଦଳ ପରିବର୍ତ୍ତନ କରିବେ ବୋଲି ପ୍ରତିଶ୍ରୁତି ଦେବା ପରେ ନୀଳଗିରି ବିଜେଡି ପାଇଁ ଏକ ବିରାଟ ସମସ୍ୟା ସୃଷ୍ଟି ହେଉଥିବା ଦୃଷ୍ଟିଗୋଚର ହୋଇଛି ।