ମାହାଙ୍ଗା ଚଡେଇପୁଟିଆ ଗାଁ’କୁ ନାହିଁ ପକ୍କା ସଡ଼କ, ପିଇବା ପାଣି । ଚଳିତ ନିର୍ବାଚନରେ ଭୋଟ ବର୍ଜନ ନିଷ୍ପତ୍ତି…

ସାଲେପୁର, ୨୩/୪ : ଭୋଟ ବେଳ ଆସିଲେ ନେତାଙ୍କୁ ସାବାଡ଼କରିବାକୁ ଭୋଟର ଏବେ ସଚେତନ ହେଲେଣି । ନିର୍ବାଚନ ବେଳେ ନେତାଙ୍କ ପକ୍ଷରୁ ମିଳୁଥିବା ଗଦା ଗଦା ମିଥ୍ୟା ପ୍ରତିଶୃତିକୁ ଭରସା କରି ଭୋଟ ଦେବା ସମ୍ଭବ ନୁହେଁ ବୋଲି ବୁଝି ସାରିଲେଣି ଗ୍ରାମବାସୀ । ସ୍ୱାଧୀନତାର ୭୫ ବର୍ଷ ପରେ ବି ଗାଁକୁ ନାଁ ଅଛି ପକ୍କା ରାସ୍ତା, ନାଁ ମିଳୁଛି ପିଇବା ପାଣି । ଏହାର ପ୍ରତିବାଦରେ ଏଥର ଭୋଟ ବର୍ଜ୍ଜନ ପାଇଁ ଚେତାବନୀ ଦେଇଛନ୍ତି ଗାଁର ମହିଳା ଓ ପୁରୁଷ । କେବଳ ସେତିକି ନୁହେଁ, କୌଣସି ନେତାଙ୍କୁ ଗାଁ ଭିତରକୁ ପ୍ରଚାର ପାଇଁ ପ୍ରବେଶ କରିବା ମନା ବୋଲି ବ୍ୟାନର ମାରି ସତର୍କ କରେଇ ଦେବାକୁ ମଧ୍ୟ ସେମାନେ ଭୁଲି ନାହାନ୍ତି । ଏହି ଘଟଣା ହେଉଛି ବହୁ ଚର୍ଚିତ କଟକ ଜିଲ୍ଲା ମାହାଙ୍ଗା ନିର୍ବାଚନ ମଣ୍ଡଳୀର । ଏହି ନିର୍ବାଚନ ମଣ୍ଡଳୀରୁ ୩ ଥର ନିର୍ବାଚିତ ହୋଇଥିବା ବିଧାୟକ ବିଭାଗୀୟ ମନ୍ତ୍ରୀ ହୋଇଥିବା ବେଳେ, କିପରି ଅଣଦେଖା ହୋଇଗଲା ଏହି ଗାଁ ? ଏହାକୁ ନେଇ ସ୍ଥାନୀୟ ଅଂଚଳରେ ଉଠିଛି ବହୁ ପ୍ରଶ୍ନ !
ଆଶ୍ଚର୍ଯ୍ୟର କଥା ଏହି ନିର୍ବାଚନ ମଣ୍ଡଳୀର ବ୍ଲକ ସଦର ମହକୁମା ଶ୍ରୀକୃଷ୍ଣପୁର ପଞ୍ଚାୟତ ସବୁ କ୍ଷେତ୍ରରେ ଅବହେଳିତ ବୋଲି ଅଭିଯୋଗ ହୋଇଛି । ଅଡମ ମହେଶପୁର ରାଜସ୍ୱ ଗ୍ରାମର ଏକ ପଡା ଗାଁ ହେଉଛି ଚଡେଇପୁଟିଆ ଗାଁ । ବିକାଶ କଣ ଏମାନେ ଜାଣନ୍ତି ନାହିଁ । ଗାଁର ୧,୨ ଏବଂ ୫ ନମ୍ବର ୱାର୍ଡରେ ପିଇବା ପାଣି ମୁନେ୍ଦ ଏପର୍ଯ୍ୟନ୍ତ ପହଂଚି ପାରିଲାନାହିଁ । ମାଟି ରାସ୍ତାରେ ଏମାନେ ଆଗରୁ ଚାଲୁଥିଲେ ଆଉ ଆଜିବି ଚାଲୁଛନ୍ତି । କୁଆଁପାଳଠାରୁ ଚଡେଇ ପୁଟିଆ ଦଳିତ ବସ୍ତି ଏବଂ ଚଡେଇ ପୁଟିଆରୁ ମାଳି ହତା ପର୍ଯ୍ୟନ୍ତ ଭଲ ରାସ୍ତାଟିଏ ନଥିବାରୁ, ଗାଁ ଭିତରକୁ କେବଳ ଟ୍ରଲି ଛଡା କୌଣସି ଗାଡି ଯାଇପାରୁନି । ଆମ୍ବୁଲାନ୍ସ କିମ୍ବା ନିଆଁ ଲିଭା ଫାୟାର ଗାଡି ଯିବା ଏଠି କଷ୍ଟକର । ସରପଞ୍ଚଙ୍କଠାରୁ ବିଡ଼ିଓ, ଜିଲ୍ଲାପାଳ, ବିଧାୟକ, ମନ୍ତ୍ରୀ, ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ଏମାନେ ଗୁହାରି କରିଥିଲେ ମଧ୍ୟ ଫଳ ମିଳିନାହିଁ । ସେଥିପାଇଁ ହାତରେ ଠେଙ୍ଗା ଧରି ଗାଁ ମୁଣ୍ଡ ଜଗିଲେଣି ମହିଳା ଓ ପୁରୁଷ । ଦେଖିବାକୁ ବାକି ରହିଲା ଗ୍ରାମବାସୀଙ୍କ ଏଭଳି ପ୍ରତିବାଦ କିଭଳି ପ୍ରଭାବ ପକାଉଛି ସ୍ଥାନୀୟ ପ୍ରଶାସନ ଉପରେ ଆଉ କେବେ ବଦଳୁଛି ଏହି ଗାଁର ଚିତ୍ର ।

ସାଲେପୁରରୁ ଅଭୟ ଜେନା