ଅମର ଶତପଥୀଙ୍କୁ କାହିଁକି ଭରଷା କଲାନି ବିଜେଡି ?

ଚଳିତ ନିର୍ବାଚନରେ ବିଜେଡିର ଷ୍ଟ୍ରାଟେଜୀକୁ ବୁଝି ପାରୁନାହାନ୍ତି ବିରୋଧୀ । ଦଳରେ ବଢୁଥିବା ଅସନ୍ତୋଷର ବହ୍ନି ଏବେ ଦଳକୁ ଚିନ୍ତାରେ ପକାଇଛି । ଫଳସ୍ୱରୂପ ଏଯାବତ୍ ସମସ୍ତ ବିଧାନସଭା ଆସନରୁ ପ୍ରାର୍ଥୀ ଦେଇପାରୁନି ୨୪ ବର୍ଷର ଶାସକ ଦଳ । କେଉଁଠି ସ୍ୱାମୀ ଅଯୋଗ୍ୟ ମାତ୍ର ପତ୍ନୀଙ୍କୁ ଭରଷା କରି ଦଳ ଟିକେଟ୍ ଦେଇଛି । ଆଉ କେଉଁଠି ବାପା ଅଯୋଗ୍ୟ ମାତ୍ର ପୁଅ ଯୋଗ୍ୟ, ପୁଣି ମା ଅଯୋଗ୍ୟ କିନ୍ତୁ ଝିଅ ଯୋଗ୍ୟ । ବିଜେଡିର ଏଭଳି ଟ୍ରେଣ୍ଡ ଆଗାମୀ ଭବିଷ୍ୟତର ପିଢି ପାଇଁ କି ସନେ୍ଦଶ ପ୍ରଦାନ କରିବ ତାକୁ ନେଇ ଦ୍ୱନ୍ଦ । ଅନେକ ସ୍ଥାନରେ ଦଳ ପୁରୁଣା କର୍ମୀ ଏବଂ ନେତାଙ୍କୁ ଛାଡି ନୂଆ ଚେହେରା ଉପରେ ଭରଷା କରିଛି ।
ଯାଜପୁରର ବଡଚଣା ବିଧାନସଭା କ୍ଷେତ୍ର ସବୁବେଳେ ଚର୍ଚ୍ଚାରେ ରହିଆସୁଥିବାବେଳେ ଏଥରର ପ୍ରାର୍ଥୀଙ୍କୁ ନେଇ ରାଜନୈତିକ ଉଷ୍ମତା ହଇଚଇ ସୃଷ୍ଟି କରିଛି । ଗତ ୧୮ ତାରିଖରେ ବିଜେଡିରେ ବିଧିବଦ୍ଧ ଭାବେ ମିଶିଥିବା ବର୍ଷାଙ୍କ ଉପରେ ଦଳ ଗୁରୁଦାୟିତ୍ୱ ଦେଇଛି । ବଡଚଣାରୁ ବର୍ଷା ପ୍ରିୟଦର୍ଶିନୀଙ୍କୁ ପ୍ରାର୍ଥୀ କରିଛି ବିଜେଡି । ବଡଚଣାରେ ବର୍ଷାଙ୍କ ସହ ପ୍ରତିଦ୍ୱନ୍ଦିତା କରିବେ ବିଜେପିର ଅମର ନାୟକ । ଗତ ୨୦୧୯ ନିର୍ବାଚନରେ ଅମର ନାୟକ ବିଜେଡିର ଅମର ଶତପଥୀଙ୍କଠାରୁ ମାତ୍ର ୧ ହଜାର ୪୮୫ ଭୋଟରେ ପରାସ୍ତ ହୋଇଥିଲେ । ତେବେ ଏଥର ଅମର ନାୟକ ଘର ଘର ବୁଲି ଲୋକଙ୍କ ସମସ୍ୟା ବୁଝିବା ସହିତ ଜନତାଙ୍କ ଭରଷା ସାଉଁଟିବାରେ ସକ୍ଷମ ଥିବା କହିଛନ୍ତି । ସେପଟେ ୬ ଥରର ବିଜୟୀ ଅମର ଶତପଥୀଙ୍କ ଉପରେ ଭରଷା କରିପାରିନି ଦଳ, ତେଣୁ ଏଥର ତାଙ୍କ ଟିକେଟ୍ କଟିଛି । ଅମର ଶତପଥୀ ଚଲିତ ନିର୍ବାଚନରେ ନିଜ ପୁଅକୁ ସେହି ଆସନରୁ ପ୍ରାର୍ଥୀ କରିବା ପାଇଁ ଲବିରେ ଥିଲେ । ଅପରପକ୍ଷେ ବଡଚଣା ବିଧାନସଭା କ୍ଷେତ୍ର ପାଇଁ ଜନ୍ମଜେୟ ଲେଙ୍କା, ନିକଟରେ ଜାତୀୟ କଂଗ୍ରେସରୁ ଆସି ବିଜେଡିରେ ମିଶିଥିବା ପୂର୍ବତନ ବିଧାୟକ ସୀତାକାନ୍ତ ମହାପାତ୍ରଙ୍କ ପୁଅ ରାଜ୍ ନାରାୟଣ ମହାପାତ୍ର ମଧ୍ୟ ଆଶାୟୀ ଥିଲେ ! ତେବେ ବର୍ଷା ଚଳିତ ନିର୍ବାଚନୀ ବୈତରଣୀରେ କେତେଦୂର ସଫଳତା ହାସଲ କରିବେ ତାହା ଫଳାଫଳ କହିବ ।