ପ୍ରସିଦ୍ଧ ଶୈବପୀଠ ଗଙ୍ଗେଶ୍ୱର ଓ ଅନନ୍ତେଶ୍ୱରଙ୍କ ପୀଠରେ ପାଟୁଆ ଓ ଝାମୁଯାତ୍ରା…

ସାଲେପୁର, ୧୫/୪ : କଟକ ଜିଲ୍ଲାର ସାଲେପୁରର ମିର୍ଜାପୁର ପଞ୍ଚାୟତର ଗଙ୍ଗେଶ୍ୱରପୀଠ ଓ ନିଶ୍ଚିନ୍ତକୋଇଲି ବ୍ଲକ ଅନ୍ତର୍ଗତ ଲେଣ୍ଡୁରା ଭଗବାନପୁର ଅନ୍ୟତମ ପ୍ରମୁଖ ପ୍ରସିଦ୍ଧ ଶୈବପୀଠ ଅନନ୍ତେଶ୍ୱର ମହାଦେବଙ୍କ ପୀଠରେ ଚଳିତ ବର୍ଷ ଝାମୁଯାତ୍ରା ଓ ପାଟୁଆଯାତ୍ରା ଅନୁଷ୍ଠିତ ହେଉଛି । ପ୍ରତିବର୍ଷ ଏହି ପୀଠକୁ ବିଭିନ୍ନ ଅଞ୍ଚଳରୁ ଭକ୍ତ ଓ ଶ୍ରଦ୍ଧାଳୁ ମାନେ ଆସିଥାନ୍ତି । ପ୍ରତିବର୍ଷ ଝାମୁଯାତ୍ରା ଓ ପାଟୁଆ ଯାତ୍ରାରେ ସହସ୍ରାଧିକ ଶ୍ରଦ୍ଧାଳୁ ତଥା ସାଧାରଣ ଲୋକଙ୍କ ସମାଗମ ହୋଇଥାଏ । ମାସନ୍ତ ଦିନ ଝାମୁଯାତ୍ରା, କଣ୍ଟାପାଟୁଆ ହୋଇଥାନ୍ତି । ପଣାସଂକ୍ରାନ୍ତି ଯାତ୍ରାରେ ଅଗ୍ନୀ ପାଟୁଆ, ଦଣ୍ଡପାଟୁଆ, ଖଣ୍ଡାପାଟୁଆ, ସିଡିପାଟୁଆ ହୋଇଥାନ୍ତି । ମାନସିକଧାରୀମାନେ ସେମାନଙ୍କର ମନୋବାଞ୍ଛା ପୂର୍ଣ୍ଣ ପାଇଁ ପାଟୁଆ ହୋଇଥାନ୍ତି । ସେହିପରି ୭ଦିନ ବ୍ୟାପି ବିଶ୍ୱଶାନ୍ତି ମହାଯଜ୍ଞ ଅନୁଷ୍ଠିତ ହୋଇଥାଏ । ଚଳିତ ବର୍ଷ ଏହି ଯାତ୍ରା ବେଶ ହରସୋଲ୍ଲାସ ଓ ଉଦିପନାର ସହ ଅନୁଷ୍ଠିତ ହେଉଥିବାରୁ ଭକ୍ତ, ମାନସିକଧାରୀ ଓ ଆୟୋଜକମାନେ ଖୁସି ବ୍ୟକ୍ତ କରିଛନ୍ତି । ସେହିପରି ଜନାର୍ଦନପୁରରେ ଦଶଭୁଜାଙ୍କ ପୀଠରେ ଏହି ଯାତ୍ରା ପାଳିତ ହେଉଛି । ବିଭିନ୍ନ ସ୍ଥାନରୁ ଆସିଥିବା ଉଠା ଦୋକାନୀମାନେ ସେମାନଙ୍କର ବ୍ୟବସାୟ କରିବା ସହିତ ବେଶ ଜନ ଗହଳି ପରିଲକ୍ଷିତ ହୋଇଛି ।

ରିପୋର୍ଟ : ଅଭୟ ଜେନା