ଏଥର ଭୁବନେଶ୍ବରରୁ ଅପରାଜିତା-ମନ୍ମଥ ଲଢେଇ…

ଭୁବନେଶ୍ବର ଲୋକସଭା ସଂସଦୀୟ କ୍ଷେତ୍ରରେ ପୁରୁଖା ଯୋଦ୍ଧା ଅପରାଜିତାଙ୍କୁ ପରାଜୟ କରିବା ପାଇଁ ମନ୍ମଥଙ୍କୁ ଚକ୍ରବ୍ୟୁହକୁ ପଠାଇବା ପାଇଁ ପ୍ରସ୍ତୁତି କରିଛି ବିଜେଡି । ରାଜନୀତିର ଯୁଦ୍ଧ ମଇଦାନରେ ନୂଆ କରି ପାଦ ଥାପିଥିବା ଅଭିମନ୍ୟୁ, ମନ୍ମଥଙ୍କ ହାତରେ ଯୁଦ୍ଧାସ୍ତ୍ର କଣ ବିଜେଡିକୁ ସଫଳତା ଦେବ ? ତାହାକୁ ନେଇ ଏବେ ଚାରିଆଡେ ପ୍ରଶ୍ନ । ବୁଧବାର କଂଗ୍ରେସର ବରିଷ୍ଠ ନେତା ସୁରଙ୍କ ସାନପୁଅ ଶଙ୍ଖ ଧରୁ ଧରୁ ତାଙ୍କୁ ଭୁବନେଶ୍ବର ମୈଦାନକୁ ଅବତରଣ କରିଛି ବିଜେଡି । ଗତ କିଛିଦିନ ହେବ ବିଜେଡି ପର୍ଯ୍ୟବେକ୍ଷକ ଶ୍ରୀମୟୀ ମିଶ୍ରଙ୍କୁ ବିଜେଡି ଭୁବନେଶ୍ୱର ସଂସଦୀୟ କ୍ଷେତ୍ର ପାଇଁ ଚୟନ କରିଥିବା ଚର୍ଚ୍ଚା ହେଉଥିଲା । ଏପରିକି ଶ୍ରୀମୟୀଙ୍କୁ ମଧ୍ୟ ଭୁବନେଶ୍ୱରରେ ବିଭିନ୍ନ କାର୍ଯ୍ୟକ୍ରମରେ ଦେଖିବାକୁ ମିଳୁଥିଲା । ମାତ୍ର ଭୁବନେଶ୍ୱର ସଂସଦୀୟ କ୍ଷେତ୍ର ପାଇଁ ବିଜେଡି ପ୍ରାର୍ଥୀ ବଦଳାଇବା ଚର୍ଚ୍ଚା ହେଉଥିବା ବେଳେ ଶ୍ରୀମୟୀ ମଧ୍ୟ ଦୂରେଇ ଯାଇଛନ୍ତି । ତେବେ ଦଳ ତାଙ୍କୁ ଦୂରେଇ ରହିବା ପାଇଁ କହିଥିବା ସୂଚନା ରହିଛି । ଏପରକି ମନ୍ମଥଙ୍କ ମିଶ୍ରଣ ପର୍ବରେ ଶ୍ରୀମୟୀଙ୍କୁ ଅନୁପସ୍ଥିତି ଏଥିରୁ ସ୍ପଷ୍ଟ ବାରି ହୋଇ ପଡୁଛି ।

ସୂଚନାଯୋଗ୍ୟ, ଗତ ଲୋକାସଭା ନିର୍ବାଚନରେ ଭୁବନେଶ୍ୱର ସଂସଦୀୟ ଆସନରୁ ଅପରାଜିତ ଷଡଙ୍ଗୀ ୪ ଲକ୍ଷ ୮୬ ହଜାର ୯୯୧ ଭୋଟ ପାଇଥିବାବେଳେ ବିଜେଡି ପ୍ରାର୍ଥୀ ଅରୁପ ପଟ୍ଟନାୟକ ୪ ଲକ୍ଷ ୬୩ ହଜାର ୧୫୨ ଭୋଟ ପାଇ ମୋଟ ୨୩ ହଜାର ୮୩୯ ଭୋଟରେ ପରାଜୟ ହୋଇଥିଲେ । ଏଥର କିନ୍ତୁ ଯୁଦ୍ଧ ମଇଦାନରେ ବିଜେଡିର ମାଇଣ୍ଡ ଗେମ୍, ଅପରାଜିତାଙ୍କ ପାଇଁ ଗେମ୍ ଚେଞ୍ଜର ହେବ ନା ତାଙ୍କୁ ପୁଣି ବିଜୟର ସ୍ବାଦ ପ୍ରଦାନ କରିବ ତାହାକୁ ନେଇ ଚର୍ଚ୍ଚା ।

ସୁରଙ୍କ ପୁଅକୁ ମଇଦାନକୁ ପଠାଇ ବିଜେଡି ଉଭୟ କଂଗ୍ରେସ ଏବଂ ବିଜେଡି ଭୋଟ ହାତେଇବା ପାଇଁ ଆଶାବାଦୀ ଥିଲାବେଳେ, ଅପରାଜିତାଙ୍କ ଲୋକପ୍ରିତା ଏବଂ ନରେନ୍ଦ୍ର ମୋଦିଙ୍କ ବିକାଶମୂଳକ ଯୋଜନା ଓ ମୋଦି ଗ୍ୟାରେଣ୍ଟି ଅପରାଜିତାଙ୍କୁ ପୁଣି ଥରେ ବିଜୟ କରିବ ବୋଲି ରାଜନୈତିକ ବିଶେଷଜ୍ଞ ମହଲରେ ଚର୍ଚ୍ଚା ଚାଲିଛି ।